最近電視新聞逢星期一至五都加插咗套連續劇「步步高睇真啲」，日日用高科技介紹「步步高」每天走勢，但由於趕住出街，真係好多都粗製濫造，以下係精華重溫：
TVB
呢個真係「超低能」，我都唔明點解要囉支筆圈圈圈，都唔知圈黎有乜用，諗起以前世界杯時代用黎講點入球果啲畫面，跟住重要個記者一路剔，背後人員就搵隻Mouse 框番個剔黎 Delete，之後又要剔到一Pat野咁…真係「勁攪笑」。 (林狗毒又發作)
除咗「圈圈」之外，重可以留意下啲差佬行路，係90度屈腳行，直頭「K」型人。
步步高隻腳好似兩條棍插咗入隻腳度，勁似啲模型咁，警員隻手又係，直頭係模型手。
CableTV
嘩！睇見呢個真係嚇撚死，好似睇緊鬼片「午夜凶警」咁…
呢位警察隻手，就好似一隻動物的腳 (鴨)…..果然係能人所不能….
HKBNTV
步步高個樣Q版化，變咗隻「Pinky高」咁，超得意。
隨心
回應的RSS
按此回應
暫時未有引用通告
(0)
2007年03月20日
前言：我起碼有六、七年冇番過深圳，我上一次番大陸的時候，最記得就係一出羅湖，就係一個大窿(起地鐵)，但由起完地鐵之後都已經兩年，但都未去過，呢次深圳一日遊係由我發起，我帶隊，我設計路線，但其實最主要目的係為咗打邊爐。原本最初只係話想打邊爐，咁就諗住去小肥羊，但後來話不如番大陸食，起碼平好多，咁所以就有呢個大陸一日遊。Plan呢個行程差唔多用咗一個星期，因為一來我真係有好多年冇去過，同埋都有好多野變咗，所以要睇下有咩玩、有咩食，不斷咁上網睇、搵書、問人等等囉資料，同埋又要睇下小肥羊點去呢，嘿嘿！
過關、換錢
以前番大陸可以洗港紙，呢家人民幣升值晒，攪到洗港紙都有難度，可能你又驚洗人仔都有假(不過呢家$1000港紙都有大量假抄)，所以你可以起羅湖過關前起羅湖站(出閘過關前月台)換定足夠人仔，由於呢家深圳物價指數都好高下，所以換多小小有So，番大陸換人仔重難過乜。
呢家過關大家應該都有智能ID Card，所以過香港海關應該超快，大陸呢家都有指紋過關，你可以先起中旅社做定手續先，或者起羅湖大陸過關度即時攪手續都得。大家一過咗羅湖橋之後，馬上落下一層過關，因為一過完關，就已經係地底隊道(圖)，再落一層就係深圳地鐵，超方便。
深圳地鐵
好似我呢啲怕坐巴士，都唔知自己去到邊又唔識落車的話，地鐵係最好的交通工具，深圳地鐵平到笑，坐一個站都只係兩蚊，坐長啲都係三蚊或者四蚊，重有廣東話廣播同埋閃燈路線路，唔怕唔識落車。
不過最麻煩係買飛，如果你岩岩換完人仔囉住一堆一百蚊紙的話，對唔住，你先要打散做幾蚊幾蚊的散紙先可以去買”Coin”搭車。另外就係售”Coin”機只係得幾部，所以買飛都要排長隊，尤其起羅湖同老街站(東門)，都幾煩。
如果你肯”投資”，你可以去買張”深圳通”卡(即香港的八達通卡)，一來唔洗排隊，二來搭車都有啲Discount，另外話張深圳通重可以搭巴士，但出張卡要比四十蚊按金，退卡要去指定地方退，另外早排又話有新聞講遲啲八達通都可以起深圳當深圳通咁用，所以買唔買你自己決定了。
深圳地鐵車箱比香港地鐵九鐵窄，同輕鐵差唔多，所以人多都會好迫，現時深圳地鐵只係有一號同四號線通車，一般大家都只會坐一號線，除非你想去新開的書城(少年宮站)，先會坐四號線，另外四號線呢家只係單線雙程行車，所以等車就要等下。
如果你未搭過，而又冇諗住買深圳通，咁要講下點買”Coin”，如果你係一班人，只需要派一個人去買Coin，可以一次過買多過一個Coin，一次入張$10銀紙，咁就方便好多，當你買完飛後，起抄錢時會同時間跌埋個綠色的Coin，果個Coin 就係用黎入閘用。
呢個Coin用高科技RFID製造，入閘時將個Coin拍起個入閘機個接收器度(好似八達通咁)，就可以入閘，而出閘時就將個Coin入落個出閘機個”窿”度，就可以出閘了。記住千其唔好跌咗個Coin，唔見咗要罰$15蚊架。
最後要提的就係深圳地鐵夜晚11點每邊開最後一班車，所以去食夜飯時記住起地鐵站Check下最後一班車番羅湖係幾點，否則就要坐的士番羅湖，再夜就真係要去搵皇崗24通關。
女人商場
老實講，行呢啲購物商場就真係唔岩我地幾個「麻甩老」，不過當然如果你拖男帶女上去，就要知下有咩商場同其他野行行。
國貿站：金光華廣場 (地鐵 A 出口已經是金光華地庫B2層) <--懶係高級商場咁
老街站：東門 (地鐵A出口直達) <--岩晒候生仔
大劇院站：萬象城 (地鐵C3出口) <--首推，多野食及玩(不過今次時間所限去唔成，下次去番)
科學館站：中信城市廣場[吉之島](地鐵D出口到達地面向前行一個街口）<--麻麻
購物商場站：CoCo Park (吉之島於07年4月開幕) ，但仍然比較爛，同埋太多香港舖頭，不值得去。
點解要知啲女人商場位罝呢，因為你搵野食，去女人商場一定有，起碼衛生啲，不過就唔好太大驚喜，因為可能去到發現有啲舖頭香港都有，例如味千拉麵、海皇粥店等，番大陸食真係有啲低能，更加你覺得已經番咗香港咁。
我的午餐：鼎泰豐
點解揀鼎泰豐？因為我起台灣八日都冇食過，所以番大陸咪借機試下，都好過食Pizza Hut或者味千拉麵呱。由於呢間鼎泰豐係囉專利開，價錢係貴的，不過用料都幾好，我地三個人食埋都要除番開每人六十幾蚊，都算貴架，推介係小龍包，有機會可以試下架。
地址：國貿站金光華廣場 B2 層，即地鐵一出果層，一出行到最尾轉右
金肉其外，敗絮其中
睇落深圳新開啲商場真係好高級，個格局又靚爆咁，但可能，當你一走去個廁所，就發現係另一個景況……..
下回預告：
旅遊/觀光
回應的RSS
按此回應
暫時未有引用通告
(0)
2007年03月19日
昨天收到了會考准考證，會考又黎了！今年好似覺得早咗會考，四月尾就已經要考中英文卷。
今年中英文卷全新改革，英文由以往的Syllabus A 同B合併，同時加入了校本評核 (SBA)，而中文就取消晒了所有廿多課背書，改為不同的形式結合而成的考試(有點似英文卷的模式)，最精彩的就是更加入了小組討論的環節，6個考生25分鐘互「片」一番，這是我最期待亦會是最好玩的一部份。另外就是評分方法，亦由以往「拉Curve」改為直接比分，即係「食自己」。
英文卷變極有限，可能會一部份超淺一部份超深去拉番開以往 Syllabus A 及 B的考生，Speaking Test (以前叫Oral)今年改了小小，由以往要學生問6條問題，改為倒番轉，先Group Discussion，然後由考官問番你一條起Discussion中相關的問題考番你，互動性大咗，而且冇得再以練的方式咁去考預設的六條問題。其實我係好憎果六條問題，因為有時睇見D Keyword都唔知佢想問乜，咁已經唔知點Set條問題，咁你又冇得亂Set問題，根本搵笨到爆。不過呢家倒番轉的話，難度更加大，因為真係考你平時的Speaking ，並唔係考你看Keyword去Set題目。
反而最囉命的，真係中文卷中全城至Hit 的「奪命四式」。題目係一篇閱讀理解，然會有一些像似是非題的問題，但共有四個答案你選擇，要你決定該句句子在文章中是「正確」、「部分正確」、「錯誤」還是「無從判斷」。
曾經過看考試局的 Sample 例子(並非剛出的Mock卷)，都覺得非常之難，你真的要有足夠的理解力，亦不可以過份想像近似的答案，否則必死。尤其佢的例子，真係埋明話你知，差小小都唔可以諗多，否則又係錯。
如果各位人兄路過見到邊個地方有2007會考Mock卷中、英文Downlaod，麻煩留個網址比我丫，等我平時上堂都可以Print 出黎做下….
PS:有人問我：「你今年又考？錢多定無聊過頭？」其實係我要報上年『一肥之仇』！加埋今年中文轉制，唔洗背書，還掂都要比錢報名費，咁順手報多科唔好蝕比佢。
隨心
回應的RSS
按此回應
暫時未有引用通告
(0)
2007年03月09日
新海城的動畫，總係有著一種魔力，魔力不是由自於故事，而係畫面顏色的運用以及用心的製作。
不少人認識他都是來自首個正式賣錢的作品星之聲(ほしのこえ)以及幾月前在香港正式有代理賣的雲之彼端，約定的地方(雲のむこう、約束の場所)。如果你重有印像的話，星之聲裏面的畫面，經常都係不斷咁Send 電話訊息，Send 一個Message要十萬九千年咁耐(老吹)，而雲之彼端就係坐架飛機去到個高高高塔度。(我都冇乜印像了XD)
呢套秒速 5cm 由 3個故仔組成(櫻花抄、太空人、秒速5cm)，第一集櫻花抄主要講遠野貴樹(男) 及篠原明里 (女) 自小後分開兩地居住，兩人一直以郵件通訊，但後來開始掛念，令貴樹坐火車遠渡與明里相會……
先講下新海誠的強項，就係CG繪圖，新海誠於動畫上所用的色調，是非常之鮮明及特出，不是其他動畫/插畫家所用開的，所以一看之後，完全會有點中毒的感覺，另外就是他製作的動畫從不偷工減料，每個畫面都會做足功課，畫面非常細緻，就算小小點亦會畫得非常之出色，這些都是吸引大家觀看之處，完全係值回票價，可能你更會話DVD解像度都不夠，要高清或更高解像度才滿足。
一般外界都對新海誠的弱項-故事內容-都有不同的評價，例如第一套星之聲，裏面過份地兩個主角自然自語對話，沒有直接的交流，只是看著一些XYZ光年前的訊息，畫面靚，但故事爛，這點我亦認同的，所以他在雲之彼端就改變了這個溝通方法，當然故事長了，內容亦較為有豐富，所以我覺得第二套已經是有進步的表現。
但來到這套，雖然第二、三話仍未看到(未上畫)，但從第一話中，故事似乎又有點翻炒冷飯，由電話文字通訊改為書信交流，雖地點不同，科技不同，但仍想表達兩人之間的溝通，故事有點「老土」，但由於仍未看到第二、三話，故不太多負面評論。
新海誠的動畫，越看越舒服，天門的音樂，我完全係覺得很好，他們一直合作無間，我亦非常滿意，可能我一直都有玩開 falcom 的Game，所以都聽慣了。不幸地，小品動畫，難以帶到香港的觀眾面前，尤其在戲院放影，出正版DVD 亦已經是很好的了(雖然可以訂日本/台灣版)，在台灣這類動畫有時候都會在戲院上映，在香港，就真的要看看電影節這類的活動，有沒有機會像銀髮阿基德，可以帶回香港上映。
小品故事，沒有打打殺殺，沒有大名星，沒有驚喜的情節，沒有特別的賣點，對一般觀眾的接受程度有多高呢，在日本雖然可以看到他的作品受到很高的評價，但不要忘記，這裏是香港。
消閒/嗜好
回應的RSS
按此回應
暫時未有引用通告
(4)
2007年03月02日
Animax 終於在網站公開了 3月9日首集Music Station 的內容，跟據他的清單，再於Music Station日本網站的清單核對，是本年第一集Music Station的歌手(1月19日，相隔6集)，所以其實都差不多Delay了近兩個月，但真的好過冇。所以都係幾期待有得睇，雖然睇開的，仍然會繼續B番黎睇，我就冇乜睇開呢啲音樂節目，所以有得睇就睇，冇得睇就冇所謂，不過都係一個新開始。
另外，原先Animax指Death Note 會於4月1日晚播出，但突然發現改為4月3日….但問題呢家Death Note 已經播出20集，劇情去得超快，他們真係想37集動畫完晒成個故仔？…..
隨心
回應的RSS
按此回應
暫時未有引用通告
(0)
2007年03月02日
前言：此事件只反映本人於整件事件上的的情況及意見，並不代表第三者任何一方面的最終解釋及決定權，請讀者自行分析事件並作出理性的分析。
我用呢部LG DVD錄影機都已經有兩年半的日子，當時於豐澤購買時，銷售員推銷了他們的延長保用計劃，加$398元，就可以有長達三年的保用，第一年由代理保養，第二年及第三年由豐澤保養。本人由於係以24個月長命分期，所以計算過我至少要用這部DVD錄影機至少兩年，才覺得化算，另外這$398保養費可同時與DVD錄影機一齊作24個月分期，所以我最後決定了參加這個保用計劃。
這部錄影機曾經在購買後四個月已經壞了雷射頭，當時曾經已經送往LG當時的維修中心(現已轉了維修代理)進行維修，過程順利，亦無順付任何費用。
到了上年的12月頭，部DVD錄影機開始出現問題，當錄影機連續開著超過兩小時，畫面就會開始花(如下圖)，但當關了DVD錄影機兩三小時後再開，就不會有這個問題出現。由於畫面是直接由AV線輸入，並不是由公眾天線調頻，以本人十多年的的知識，經過未經拆開DVD機的初部測試，應該是由於過熱所引起。
由於本人記起仍然有豐澤的三年保養，而限期未過，所以本人於12月22日致電豐澤查詢有關保養方法，於電話中的客戶服務員說要本人自行到LG保養中心付費維修，檢查費為$300，當維修好及預先付了所有費用，取回有關單據後，傳真到豐澤的指定電話號碼進行申請取回金額，而本人預繳之費用會以支票方式寄回給客戶。但電話中客戶服務員並無說有關申請領回費用的條款。
本人即日將DVD機送到LG的旺角客戶服務中心，以信用卡繳付$300檢查費，取回單據，等候消息。到了十二月尾，LG的師父打電話來說部錄影機沒有問題，我告訴他部錄影機長開一段時間，就會出現花畫面，他都說可能是散熱問題，問我部錄影機上面及後面有沒有其他物件，我說沒有，師父說會長開錄影機到另一日再試。第二天師父再打來說完全沒有問題，叫我取回家再試，驗查費包一個月，如一個月內再有問題，可交回給他們再試，而無需另繳費用。
由於一月頭比較忙，本人1月22日才取回，回家試，曾經長開超過兩星期，亦沒有再出現花畫面的情況(到現在亦未有發生)，問題是張維修單上，寫上 NO FAULT (沒有壞)，而且亦沒有換零件，當時我已經諗，有機會豐澤不會賠給我，所以我只好嘗試傳真回豐澤，以輸打贏要的心態，看看他們願不願意賠。
今天(3月1日)收到豐澤的回電，電話的客戶服務員指由於我的單據上寫上 NO FAULT，他們亦曾經聯絡LG查詢我的維修，同樣回覆是沒有壞，由於不是零件上的損壞，所以不作任何賠償給我，我向他解釋是由於機後散熱風扇可能有問題而引起，他叫我返回LG向LG爭取於單上寫回原因並再給回豐澤，我說由於太麻煩，而且我亦說如果部錄影機再壞，本人已經會買過部新，並不會再去維修(這是事實，本人其實有點想換部HDD錄影機)，電話的客戶服務員再次叫我去爭取，這樣是我自行放棄爭取賠償的機會，我亦說我不會無端端沒有壞都拿部機去整，但由於整事件上，我只可以說「黑仔」，我仍然說不會去做了。
最後於這件事上，我共損失了參加計劃的$398，及維修檢查費$300，合共$698，雖然部DVD錄影機現時仍然運作正常，所以我亦無意再為這件事上再加添麻煩。於豐澤來看，我覺得他們沒有做錯，如果個個都冇事囉部機去代理，有沒有壞都要求豐澤取回檢查費，以在商營商的角度，他們當然不會，否則多多錢都不夠賠。
可能有時候你都會試過，明明部機自己用係壞，但一上去代理維修，完全冇事，這個就是一個翻版事件了。但由於豐澤係第三者，要求客戶要自付有關維修金額，所以客戶實要付上一個無法取回費用的風險，所以這件事後，我如果真的會再去買HDD錄影機的話，我會選擇由代理方面推銷的續保計劃，雖然可能價錢貴一點，但從消費者角度看，至少無需要預先再繳付檢查費用而無法取回的風險，至少再會再發現這次的「黑仔」事件。
隨心
回應的RSS
按此回應
暫時未有引用通告
(0)
2007年03月02日
