新 BLOG - 2008 放眼世界

某日凌晨2:30AM獨自走進旺角一間廿四老麥

行到櫃枱買餐…發生了以下對話…

我：當然係我　　　麥：老麥姐姐 

我：唔該一個5號餐
麥：(望望後面…)5號餐冇了
我：咁…(望望天花餐牌..)咁6號餐..
麥：(再望望後面..) 5、6、7號餐都賣晒了，不如要板燒餐..
我：(諗咗一陣..) 咁要4號餐…
麥：要星星薯餅？
我：(..?…突然唔識答佢..) 普通薯條得了..
麥：飲乜野？
我：可樂

老麥姐姐禁禁收銀機，之後行去囉薯條同包…我望見收銀機寫住$24.8，再望番上面，明明4號餐係$24.3，唔通深夜加收五毫子？咁我再起銀包囉多五毫子出黎…跟住..

老麥姐姐囉個板燒包出黎放起餐盤，我一見到就話，我係要4號餐播。老麥姐姐拿拿林囉番走個包，然後改收銀機，銀碼顯示 $24.3，我又收回五毫子。

囉完包回來，我同姐姐講話比現金(八達通)儲分，然後我放銀包起八達通機上，收銀機顯示要拍卡，等了十多秒，都未有反應，後來出現”Bee”一聲，老麥姐姐話卡錯誤。

我：吓？
麥：你張卡係咪未啟動？佢話你張卡有問題。
我：唔係呀嘛，未啟動？我儲咗差唔多8蚊架啦。
麥：你試下呢家再拍卡我同你Check下。
(我放回銀包起八達通機，收銀機即時顯示有 $7.77 積分)
我：冇事播。
麥：咁冇法了，唔好意思。
我：咁同我Cancel咗個餐佢我再買過。
麥：唔得架播。
我：咁，有佢啦。(比面色佢睇..)
麥：一係我比番一毫子你啦。
我：唔洗拿。 (比一毫子我，當我係乞衣？乞衣都唔要啦)

食緊薯條期間，門口黎咗一個紫色衫小肥女人，她起老麥行來行去，她一見老麥姐姐拿住袋大垃圾走入後行位，她馬上跟隨，重想入埋去，咁我心諗就知佢係專食「口水尾」嘅女人，後來佢見到我起度食緊薯條，就企起我面前十幾秒，後來重坐起我格黎張檯，好明顯係等緊我走食薯條。

咁我就特登食晒所有薯條，然後囉埋個盤去垃圾桶倒埋佢，點之一野「線」手，成塊餐盤跌埋落垃圾桶入面 (呆) 。

你估下我之後點做？

• A. 起個垃圾桶入面囉番塊餐盤上黎
• B. 扮唔知，然後離開老麥 
• C. 走去同個肥女人講我啲薯條Dum晒入垃圾桶，你自己伸隻手入去囉黎食啦。

 隨心  回應的RSS 按此回應  引用通告(18)   (1)
2006年10月06日

特登走出去西九龍海演長廊影呢個「大型綵燈展覽」嫦娥奔月，點之入到去，真係得一千零一個綵燈 -_- ，搭車去九龍站，再步行入去足足15分鐘….呃晒 -.-

 隨心, 攝影  回應的RSS 回應(2)  暫時未有引用通告   (0)
2006年10月01日

1. 螢の祭 PART 2

每 見一次呢張相都令我好想快啲中六合彩，雖然尋日唔記買中秋金多寶，但好在冇人中，今次六千萬點都要仆去買張。不過經過兩星期的反思後，呢家都係想買支70 -200 4 小小白玩住先，應該都可以夠用下。(但遲下可能友人借支70-200 2.8 L IS 比我吸毒 -_-)

講下螢の祭，雖然我上年要開工冇去，今年去足兩日，覺得係攪得幾好，現場氣氛亦很好，衰啲講句，氣氛好過CW添。

2. 賣卡潮

無 聲無聲 SmarTone 除咗轉Logo唔見埋自己個Logo 外，推埋隻華為3.6Mbps USB Modem HSDPA 無線上網，價錢都係$2488，早前一出PCMCIA 1.8Mbps版本果時買咗同埋起暑假電腦展特價買咗的話，真係屌晒鬼，突然就引發一場賣卡潮，賣去PCMCIA 卡轉投 3.6Mbps USB版本，如果你都係PCMCIA 時代買咗的一份子，又想轉去 3.6Mbps，係時候放去拍賣場賣鬼咗佢…

3. 中大未完之約

提 完IVE 咁提下中大未完之約，雖然今次真係有工作在身未能出席，但夜晚已經趕入去CU去睇個晚會，不過真係天不造美，壞冷氣焗死你，再加埋後排有個肥「怪叔叔」係 咁囉部手提電話影靚女，如果你就係果個怪叔叔，呵呵，小心相片已被流出各大Forum XD。對於涼宮免疫的我，佢唱幾多次我都冇興趣，最有興趣都只係「藍貓」。

PS: 用350D 當傻瓜機影相都靚普通 DC 仔架 XD

4. 城門水塘

星期日跟老餅大隊去城門水塘影相「交功課」，不過不幸地落雨，影唔到流水小橋…只係影到花花草草，而且又被Marco +細光圈景深迷上，精選了以下三張圖片交功課，歡迎評評。全部都係用支Kit鏡影的，「以有限的硬體，作無限的智慧。」

5. 打「網」釘

睇Forum有人介紹咗一個叫 StumbleUpon 的物體，佢會不停介紹一啲大家都睇過而覺得好的網站比你睇，而且分門別類，你只要登記咗後，再選擇你喜歡的Topic，禁個制，就會帶你去一網站，如果你 喜歡呢個網站，就可Click I like It 咁，越多人讚呢個Website ，佢會介紹呢個網站比其他人，如果你唔鍾意的話，禁唔要佢又會Mark低，都幾有趣，當你無聊上網冇野睇想搵嘅野「打網釘」，呢個真係岩晒，而且有時佢介 紹比你嘅Website，非常實用而且可以話係重大發現(Google 都未必咁易比你Search到出黎)，間唔中都有個驚喜。

6. 窮人搵錢大法

最 近阿Y主持的「以一敵百」我都有睇下，除咗當知多啲外，吸引我搵錢更係一大推動力 (多謝吸毒…)，不過計計下，佢裏面嘅問題都話深唔深， 話淺唔淺，又冇得揀唔答囉錢走，所以炒粉機會都幾大。不過 TVB果個 Deal or No Deal 易玩好多，而且唔係考智識，只係考你運氣同埋心唔心軟，較為啱我玩，可能我都會填份Form去玩下先….

7. 配音比賽？

下個月 HKU 會有一個配音員的講座， 同埋會有個配音比賽，我地已經有三個人組成一Team準備參賽，自選參賽片段同埋讀稿已經Ready，差在未報名 ，不過我地參賽都係至在去玩，並唔係至在囉獎，而且佢啲獎品…er…DUNNO ~ 我另外兩個Team Member 從來未玩過配音(亦冇睇開動畫)，今次將會由我領導出戰，埋明倒米，如果你睇到呢段文又想黎同我開戰，歡迎報名，我地嘅自選片段將會係BLOOD+ 第42集的其中一段，亦都歡迎大家拉大Banner 黎支持我地， Team 名暫定會叫 #heha ，埋明黎 heha 。

下週預告：

又有電影節..將會連睇三場戲… 其中一場就係日本都未播而香港優先播出的金敏的盜夢探偵，另外會介紹下起10月26號上畫宮崎駿兒子宮崎吾郎導演的地海傳說！

 隨心  回應的RSS 按此回應  引用通告(2)   (0)
2006年09月27日

又係350D 出動嘅時候，今次係觀塘IVE螢之祭，但已經對支kit 55mm鏡極度不滿！平時室外係OK，但一到舞台上面，影到的，就只係頭同埋手！

所以，我要整番個Wish List，經過多方面專業人士推介後，就得出呢個Wish List：

玻璃：

大光圈 (28-75彈性大) ：

Tamron AF 28-75mm f/2.8 SP XR Di LD ASL IF Macro ($2850)

PS: 有人話不如買呢支Tamron AF 17-50mm f/2.8 SP XR Di II LD ASL IF (A16) ($2780)，但我貪佢有75mm 2.8 同Macro。

或 呢支 (1.8光圈但定焦50mm，而且平，影大頭一流) ：

Canon EF 50mm f/1.8 II ($650)

Canon EF 55-200mm f/4.5-5.6 II USM (HK$1780)

或者呢支：(呢次好在有IS，但$$$$)

Canon EF-S 17-85mm f/4-5.6 IS USM (HK$4180)

Canon Speedlite 430EX (HK$2100)

Lightsphere II 奶罩($450)

附件：

Nikon EK-21M ($200) (裝起350D 都OK…)

Canon RC-1 Remote ($190)

Safrotto / Crumpler (OEM/貪靚) 袋 ($250)

最後一句：啲錢從何來？唔通個個星期「惠澤社群」？

 隨心  回應的RSS 按此回應  暫時未有引用通告   (0)
2006年09月17日

前言：一直都覺得屋企隻芒睇相偏暗，而且冇層次，所以一直都想買呢類測芒硬件，但價錢太貴，但Pantone出咗呢隻huey的家用級熒幕測光硬件，購入價只係 HK$780，真係超值，所以就買黎一試。

裏面內附兩包清潔熒幕的濕紙巾、一塊藍色的清潔布、huey一支、坐檯架、USB線、CD及Manual。

首先使用清潔濕紙巾及清潔布清洗熒幕表面，然後安裝軟件，重新啟動Windows後就可以正式測試。

1. 開啟了huey軟件後先選擇LCD / CRT 熒幕

2. 再放huey起檯面測現場光度

3. 跟住畫面將huey 貼在熒幕上

5. 完成

你可以即時比較調校前後之後的顏色差異，例如我的手提電腦的Wallpaper 原本在熒幕睇係偏藍，調校後Wallpaper 顏色轉為灰色。

不要以為這樣就完，你可以啟動房間光暗設定，huey會定時(如1分鐘)檢查一次室內光度而對熒幕即時作出調校，所以是可以長插著huey使用。

而於huey 的軟件設定內，你可以啟動及設定huey檢查室內光度更新的設定，而於Setting內，可以隨時啟動或停止huey的顏色設定，而huey亦有多個不同的Profile讓你調效huey，如遊戲模式、上網模式、繪圖編輯模式等。

而於熒幕的顏色管理內，加入了huey的Profile，但不要以為就可以Uninstall huey，原來當你uninstall huey軟件後，顏色設定就會打回原型，所以開機後要啟動huey Tray 先會對顏色作出調校。

最後看看圖片比較，我選擇了一張在台灣攝影的風景相片：
(由於係用相機對住熒幕影，所以顏色會有差異)

看看放大圖，未調校前，顏色比較黑，欠缺層次，調校後，可以看到草叢的綠色以及層次。

再睇另一個位置，吊橋的末端較黑，看不清交叉的鐵鍊以及背後的山景，而調校後，可以清楚看到交錯的鐵鍊，而且亦看到層次。

最後，由於我在Notebook裝huey開始測試時，一開就出C++ Error(CD內的版本為1.0)，咁正想去下載更新，但需要註冊，登記又說只供美加客戶，麻麻煩煩，最後Google一下找到新版本(1.0.4)的網址下載，安裝後在Notebook試終可成功進行調校。

你可以去這個 Monitor Adjustment Target 及 Photo Center 網站看看你的熒幕顏色是否層次不清，如果是的話，huey可能幫到你。

 消閒/嗜好  回應的RSS 回應(3)  引用通告(3)   (0)
2006年09月15日

前言：十年前首次起之前打工間公司(hongkong.com的前身)試過用 Mac 機，但真係唔知點用，果時就已經想玩下Mac機，半年前起某人家試G5 + Final Cut ，用用下就炒，雖然感覺唔好，但都想玩下，直至早排Apple轉投Intel家，至坊間又流傳一套可在PC機安裝的 OSX，終於可以有機會自己有一部「偽」Mac機。

不過今次我係用一部舊舊的 P4 1.8 再加上一堆唔支援的硬件黎裝，同埋冇 Read Your FXXKing Manual ，所以Day1 裝咗四次都炒。

呢部PC 有幾恐怖？
Pentium P4 1.8GHz CPU
512MB DDR RAM (256x2)
PC Chip底版 (VIA Chipset)
ATI All-in-Wonder Radeon [不支援]
Onboard VIA Rhine II Lan (VIA) [不支援]
Hercules Gamesound Fortissimo II Soundcard [不支援]
PCI 1394 Card
2隻WD 60GB HDD(一隻用緊的WinXP + Data Disk)
1隻 Seagate 40GB HDD (裝OSX用)

經過不斷的試練，終於起Day2 成功安裝 OSX 10.4.7 起呢部PC上面。

OSX 都幾惡，由於本身部機已經有 WinXP，今次特登加多一隻硬碟機黎裝OSX，原先插佢落Secondary Master黎裝，裝完Boot 唔起，出 “Waiting for root device” 的 Error message，Google 一下，原來一定要插 OSX 隻硬碟落Primary Master，光碟機插Primary Slave，咁唯有再調調，將原本兩隻WinXP 硬碟插晒落Secondary Master/Slave，用時先起Boot機禁Boot Menu揀黎Boot，裝到OSX後入番Windows 望都冇問題，冇改到Drive Letter，睇落好似幾好，不過呢家先係「開始」。

由於 Onboard VIA Lan 唔支援，所以上唔到網，當然係起Google搵下有冇3rd Party Driver 啦，係搵就搵到，不過，一裝咗落去就 Kernel Panic，一開機不斷Panic，最後又要出動隻安裝碟入 Terminal 刪咗個 Driver 佢先Boot得番OSX。最後都係去床下底搵番張陳年 3COM 3C905B出黎裝落去用。唔識玩 OSX 就唔好自己亂裝 Driver，否則好易Kernel Panic 。

Sound Card 初頭以為呢張奇卡難Support啦，跟住去搵番張又係陳年 SoundBlaster Live! 落去試，點之一樣唔得，再望番 HCL ，原來又係唔支援，反而 VIA 支援，真攪笑。

咁由於 ATI AIW 起OSX認唔到，所以就只係當咗一個Standard Display Card，出到1024x768x32，但後來睇到呢個Website 教改，呢家可以改到1280x1024x32，非常滿意。

可能真係P4 1.8 啦，用黎做Dreamweaver 同 Photoshop 都幾慢，但上網就很好，都幾快，而且畫面又靚，中文字又靚仔，真係「上網一流」。

不過用落就開始發現一兩個怪問題，例如 USB，插落去， System Profiler 係認到，但係用唔到，例如我插條 IPod落去，認到的，但iTune 認唔到(OSX 10.4.7 跟iTune 6.02)，咁諗住Update下啦，裝完 iTune 7 落去重慘，一開就話Memory 不足，真攪笑。

另一個問題就係Windows Keyboard，小咗Apple制，同埋Ctrl同Alt 起Mac 就倒番轉，所以起Dreamweaver/Photoshop 禁Shortcut 就會好唔慣，不過呢個起OSX可以自己改到，起番System Preference -> Keyboard & Mouse 入面將 Control 同 Command 制倒轉就攪掂了。

至於軟件方面，我幾喜歡Safari同Mail，可能因為中文字太靚仔關係，Office (Word/Excel/Powerpoint) 、MSN、Remote Desktop都有，不過真係慢咗啲，唔知 Core 2 Duo 會唔會順好多呢？不過早排聽某君講佢自起 Core 2 Duo 裝唔到，但我望番 HCL 有人裝到的。

最後，如果你又想裝黎玩，以下係一啲意見：

1. 睇睇 HCL 睇下有咩硬件支援/唔支援，尤其如果你諗住用新機玩的話，對住黎買有So。
2. 如果你都係裝「果個」坊間版本，記住揀黎裝啲Patch，我就係試過一野剔晒全部安裝，就炒晒了，最主要係Intel同AMD 果個Patch影響咗。當然重有SSE2/SSE3 果啲啦。
3. 如果你係想一隻硬碟界Partition黎裝OSX 同Windows係有啲風險，雖然Google你都會搵到啲人講成功裝到，不過都係有危機，所以你清楚，最好都係獨立一隻硬碟。
4. 推介你去呢個 InsanelyMac Fourm，有唔少人裝唔到OSX都起呢度問野，可能幫到你。

 預告：Pantone Huey 用後報告

 消閒/嗜好  回應的RSS 回應(1)  暫時未有引用通告   (1)
2006年09月15日

呢家每日的Schedule 都係…..

11-12AM訓醒沖涼，1:30PM出門口番工，番到公司處理檯頭堆工作，聽埋啲無聊電話，10PM收工，番屋企，叮番個晚飯，睇DVD(錄影咗Animax的奇幻旅程)，繼續開工，4-5AM坐起度訓著咗，7AM爬番上床訓，10AM 開始比電話炒醒…………通常11點再被炒醒後就會落床……

呢個Schedule 由去完台灣番黎之後….持續咗一個月…..

望見手上三大Project … Project A 完成度70%，Project B 完成度 60%，Project C 95%….但其實重有小Job D, E, F, G…… 極大Project H….都排緊隊…

當然，始終有偷懶的一兩天….否則冇Blog 好寫

突然諗起，我重未睇Keroro電影同 Death Notes =.=..落咗畫未?…… -_-

奇幻旅程 

先講奇幻旅程，睇呢套野，劇情唔計，我最留意到 OP 同 ED 的酒井ミキオ以及 ED 的 梁邦彦，酒井唱歌都幾好聽架，不過真係好小小小，最上次真係三年前 Planet-ES 同scryed 的歌，好聽得黎係推介，講番劇情，初頭真係唔知UP乜的，後尾睇到十三四集先知佢講乜，如果你冇乜心機追，真係三、四集就會放棄，不過故事到呢家都重係冇「緊張」成份，完全係「故事」一個，希望打後七、八集會緊張啲啦… (Animax 呢家只係得番呢套有睇，其他一係睇咗，一係唔岩睇-_-)

CW22

一年兩次的 CW 幾忙都要去的…亦都係首次 350D 出場的時候，不過今年總係怪怪咁…一來拆咗兩個館，另一邊起保鈴球場，所以個場縮咗一半，而因為拆咗兩個館，人流散晒，一個場有事發生都傳唔到過黎， 另外就係兩個場燈光完全唔同，一個白光，一個黃光，玩死晒，再加上首次實戰，對Setting 認識未深，出師不利，大部份相都影得非常差，無法見人。(後尾私影果啲影得好DD…)

呢次 CW 真係任人魚肉，比小妹妹圍住買Keroro真係走唔甩，最後都唔覺唔覺買咗成百蚊 Keroro 野 (真係唔覺唔覺，當然重有買其他野啦)…..er…….

咁當然重有買其他野啦，雖然表明由上年開始唔會買同人誌，只會買啲用得睇得實用產品，不過有時見到嘅真係好靚的同人誌(尤其 CG 畫冊)，都會忍唔住手買…最後好似都買咗三百幾蚊-_-

老麥 Keroro

老麥Keroro熱又殺到，好在我起台灣帶咗幾套老麥 Keroro 番黎，私下+放起Yahoo炒賣都賺到個Double，衰在我冇帶到印章番黎香港，估唔到比個PK 小朋友一鑊炒起老麥印章停賣，突然間印章升值四、五倍，一個 $8印仔起Yahoo炒到 $35+，如果有一套重勁，好在老麥抱抌起香港未賣，因為有傳聞話香港老麥都會有得賣，內部定價 $30 一個，原本話9月1號launch，不過呢家冇咗影… 9月1號落去老麥，連 Keroro廣告都抽起晒，要印過晒抽走印章果Part，變咗「老麥神秘換軍曹」。

香港寬頻 2B (續)

最近又囉番個 2B 黎研究，今次係飛佢落 IP 電話機/Gateway度，然後囉黎玩野，不過今次係應用起商用方面，由於 2B 係用 nortel 的 SIP 系統，所以件 Device 都要支援 nortel 的格式，最後成功起 PA168S 的IP電話機成功登入 2B，呢隻 IP 電話機有 Hold 線同 Forward，都成功起 2b 上用度，不過就做唔到三人會議，只可以兩條線分開講電話。之前試過幾隻電話都唔得，原因係因為隻電話冇得Set noretl 的專用設定，有啲就唔支援 Domain，呢隻 PA1688 精片的電話好多大陸/台灣廠都佢OEM，所以唔難搵。設定參考可以望下個圖，最主要都係service type 揀番nortel，電話號碼後面要加 hk ，Server 要睇你個號碼係 s21 定其他再nslookup 番個 ip ，同埋要開stun，其他冇乜大特別。

上到 IP 電話/Gateway 又有咩玩呢？上到 IP電話，就可以唔洗開電腦都打到電話啦(廢話)，上到Gateway先好玩，例如你有一個大陸 SIP 戶口+ HKBN 2B 戶口，咁就可以經隻 Gateway 由大陸 SIP Route去 2B 香港線，咁即係打一個大陸電話號碼經Dial Plan Route去香港電話(例如大陸Office 打大陸號碼 Route 番去香港Office號碼)，佢就唔洗比 IDD錢(國內同區或國內長途)，當然唔一定大陸啦，總之你有果個國家的 SIP 戶口都冇問題。另一個用途就係如果你隻 Gateway 有 VPN 功能，就可以用隻 Gateway 起大陸連 VPN 番黎香港黎打 2B，咁就唔怕中國電訊Block你 (早排聽過一個客講，佢公司買咗三個2B囉番大陸，比中國電訊Check到，罰咗兩日冇得上網 -_-)。

其實2B account重有好多用途，例如做 IVR線，由於申請電話線貴(商業平極都要$80/up)，2B 每條線平均只係$40蚊，而且可流動性，咁就可以用2B出 IVR 硬件，每條Line 成本平一半而且Reuseable。另外就係 2B 本身有 Schedule Dial Plan，咁你就可以set 唔同時間，Office Hour 就聽電話，Non office hour 就飛晒去 voicemail，不經人手，辦公室Hotline 必備之選。

小記者2006

今年的小記者課程月尾開班了，今年的題目係「節目構思」，如何去製作一個有題的報道/專題。內容仍然諗緊…暫時未有 idea …. -_-

乙-HiME (誘姬 II)

娛樂台終於起9月3日晚播Z-HiME，回望番，原來上年又係呢個時候播HiME，再回望，我由去完日本番黎之後，就冇再寫到個HiME Blog….爛咗尾添=.=不如我就起娛樂台播到 EP23 就補完番佢啦 (同樣日式麵包王 TVB播到 last 兩三集補完番佢:X)

最後，又黎到看圖找錯處 II 的環節，看看下圖，有咩問題？ -_- 答案起全文見到…

 隨心  回應的RSS 回應(7)  引用通告(16)   (0)
2006年09月04日