新 BLOG - 2009起死回生

早幾日睇咗Princess Princess D 電視劇版第一集，不過講漏咗…呢家講番。

我係我有睇晒動畫版 Pri-Pri，漫畫版就冇睇，雖然大家都話好 BL ，但你明白上季根本就係 BL + GL 入侵，但 Pri-Pri 都唔係咁 BL (同學園 Heaven比，差十萬倍XD)。睇咗幾集就傳出話有電視劇版，睇落人設都 OK 啦(日本靚仔小生幾件咁啦 )，但當時未能想像佢地著起P服時會點(當時Website未有相)，呢家睇到第一集…嘩……。

OP 都算，忍你！跟住內容都係同動畫差唔多啦，講番河野亨入到黎「被迫」做公主，都重接受到….跟住…

嘩！開始嘔血了…. 真人版著咗 P 服真係好難頂
:O~~~~~~~~~
差啲一路睇一面成地都係血水，再加埋演得非常「神似」的家庭科部名田庄薰出場，嘔血一發不可收拾………….

第一集當然仍然要介紹下故事大剛啦，所以又要遊下各個學會部門(第一集嘅例牌劇情)，又繼續嘔血，跟住到坂本秋良樣出場又再繼續嘔血… (動畫版保志總一朗配得幾「攪野」架)，最後又係嘔血… (PS: 講咗幾多次「嘔血」呢)

老實講，如果睇咗動畫/漫畫的話，第一集咪就係故事重溫囉 (正如 Honey & Clover 2 第一集將第一輯廿幾集內容縮晒做一集又重溫….)，反而，好問題係，重睇唔睇落去呢？……

如果我已經頂唔順啲七月新番…..都會考慮下。
PS: 出街時部PSP已經係睇緊「霍金的宇宙」記錄片=.=

 電視  回應的RSS 按此回應  暫時未有引用通告   (0)
2006年07月08日

好忙，所以忘記咗呢度，最後陣亡。……..

1. 睇波不賭波，不賭笑呵呵。

世界盃已經場場爆冷，燈神再現，網友個個買波輸到喊，尤其英格蘭同巴西，個個叫苦連天。好在我冇買波，否則慘無人道。

2006世界盃金句：睇波不賭波，不賭笑呵呵。 (PS: 原本句野係…不賭老母多 ，不過比人問..「唔賭錢會爆多幾個呀媽？」所以就改咗佢了。)

2. 獸王星

近期其中一套幾鍾意的動畫就係獸王星，賣點當然係堂本光一初次配音啦，不過都唔好唔記得頭五集高山みなみ(柯南)一人配兩角，而且係分得清邊把聲配邊個，不過就真係好「柯南」 Feel :O 。

但睇晒 11集，最尾真係….唉…..我的「紙巾」 (ティズ) 啊，點解會咁架？唯有話….十幾年前老土劇情….唉….。但….繼「紙巾」後…又一令我傷心肉絕的事…….估唔到係….。(見下文)

3. ZEGAPAIN

另一套有追的動畫，就係老牌子 SUNRISE 的 ZEGAPAIN 。

另一個喜愛的角色(算唔算係女主角呢?) 守凪了子，突然間起EP13 就………………… (不過總係覺得 SUNRISE 啲劇情，每次一個角色有特別發展，就即係果個角色的末日。但，佢唔係女主角黎架咩？…..）好慘啊！！起地鐵睇呢集，睇到眼濕濕果隻…. PK SUNRISE!!!

一睇到呢幕…話..消失咗… 真係……….點解要亡！！！！！！

4. 全港動漫畫歌唱比賽 2006

7月2日晚當然要出席呢個歌唱比賽啦，參賽者果然水準幾高，而全場焦點當然係涼宮春日的OP/ED，全場拍晒獎，不過冇法啦，SOS團面對強敵，只可自娛不過未能獲獎。

不過我又諗咗啲衰野，日本街頭都有人跳涼宮春日舞，香港都得，起旺角街頭整個涼宮春日快閃黨。先有一條友，無端端起街邊放低部播音機，跟住走咗去，跟住部播音機突然間有啲音樂播出，快閃黨成員起四方八面咁行埋去部收音機度，跟住，涼宮ED開始播，大家就開始跳涼宮舞，跳完，成班四方八面極速快閃，囉埋部播放機走，最後大家起吉野家集合。得唔得呢？

5. Fancy Frontier 8 (開拓動漫祭)

估唔到我又因為去睇 Fancy Frontier 而飛去台灣，而且又去8日（當然FF8只係兩日)。 不過，當我同其他人講我飛嘅時候，佢地異口同聲話：「又飛？你三月尾先去完日本黎咋播，都唔夠四個月又飛？又去8日？」……. 呢次真係冇錢，真係冇架….要忍手手手手手手手手手手。FF8 有咩睇呢？同人誌囉，中原麻衣囉！！

不過，FF8令我諗起一樣野，我帶唔帶套衫去 FF8 Cosplay 感受下台灣同人活動的氣氛呢？不過我啲國語真係「波波波波」 (國語四個音節都係讀同一個音，明啦 :X) ，要急急學下啲國語….

不過最初大家係安排去漫畫博覽會，但發覺嘉賓太以漫畫為主，聲優Cast 都麻麻，但FF8有中原麻衣，差好遠呢，所以就改去FF8了。如無意外，兩日都會去晒FF8，當然當晚我地會即時報導一下裏面情形啦。

PS: 我起日本動畫展囉果個紙袋(爛咗果個呢)，其中一邊就係 ZEGAPAIN….。

 隨心  回應的RSS 按此回應  暫時未有引用通告   (0)
2006年07月06日

近排忙到抽根，工作、娛樂與訓覺時間安排得密麻麻….

1. 世界波

世界波令到工作心情減慢，精神無法集中，食無定事，杯麵零食買多咗等等。起屋企一條友睇波都幾悶，尤其Chat Room 網友各有Delay (由十幾秒到一分鐘不等，原因不明 )，被「媽」話唔該同佢地Sync番個鐘先打 “Goal~~~~”等字眼，大家一齊Goal咁話  所以最好都係成班一齊睇，上星期六就成班Chat Room友上黎一齊睇住個電視Go Go Go~~

不過啲友仔話電視機張相，好似打緊WE… (相片中冇一個係我:X)

2. 飛天彈道真人版

星期日有個朋友帶咗我去啟德打 Golf，但我其實係第一次打，所以就即係黎學 Lesson 1，經過個半鐘地獄式訓練，初部都明白點打，重話我第一次打已經幾好，跟住叫我番去囉支藤條練習下。

學完 Lesson 1 ，只要學識三大口決，就識「打」 Golf (發球)，包括：腳要曲(凸Pat)，左手要直，腰要直。只要練熟，就可以打得好好。不過 Golf 真係好貴，比起其他運動都貴，場貴、用具貴….真係上等人玩意。但至少唔洗走黎走去，又唔係考眼力，又唔係考體力，都幾岩好似我呢啲體育傷兵。不過，第二日就慘了，腰痛，腳痛，手指痛膊頭痛等，成個廢人。（圖中之人都唔係我，亦唔係我嘅 Friends，只係起場中亂影:X)

3. 小記者 Volume 3

上星期某日下午，突然有人打黎搵我，原來係某小學的一位老師，今年又想搵我教小記者訓練班，佢好驚咁話我係咪今年唔黎教(出面真係冇人教?參看下文)，計埋今次，我已經係第三年幫呢間小學教小記者課程，但痛苦在，由於佢地小記者呢個課外活動係由小四至小六，每年黎一啲走一啲，即係可能有個學生三年都會見到我(即三年一個Cycle)，咁我咪又要諗過晒要教乜？經過一番痛苦的討論後，決定今年當興趣課程收晒所有新同學仔，然後起裏面再揀啲精英出黎做小記者。不過今次會有小量改改啲內容，同埋Update番啲報紙/片段，活動都會有更改，而且諗咗一啲新遊戲，有難度之如亦富有真實感，教乖嘅小朋友真係幾好。

(相中係上年10月教小記者果時影嘅，佢地玩緊一個好簡單，但又好多小朋友都想出黎玩嘅小遊戲，就係讀稿。畫面播住一條 TVB 新聞片，同學仔手上有呢段片的 VO 文字，佢地只要跟住 VO 睇住畫面讀一次，就係咁。不過，佢地讀得比較慢，而且讀到好似念書咁，所以就要比佢地讀下，知道應該要讀得生動啲，否則悶親觀眾。)

校園小記者係教局近年推廣嘅重點興趣小組，可以比小朋友可以自己親自去見識不同嘅事物，亦訓練佢地嘅思考與、文字、說話及表達的技巧，都算係全人發展架。不過由於都算係新嘅活動，而裏面亦包活了新聞稿件寫作的技考以及拍攝 (DC/DV)嘅應用，一般小學老師都唔會識呢啲，咁所以就好多時都要搵外面公司幫手攪，或者參加報社攪嘅小記者訓練。不過全港有七百幾間小學，而且唔係間間都抽到去參加報館攪嘅小記者訓練，所以其實呢個都係一個幾吃香嘅生意。我都搵到一間攪小記者嘅公司，佢地由一啲新聞/傳理嘅畢業生攪，佢啲套餐有平有貴啦，不過都真係幾好搵架。

不過又諗起一個笑話，每次上堂，都會有小朋友問我：「你係咪記者黎架！」。其實，我唔係 :X

4. 風水大師

自從起電視跟完蘇師父學咗十幾堂風水之後，呢家已經識睇八宅、基本風水布局，呢家教緊九宮飛星，的確幾難，要專心啲上堂先得。網友知我學識睇風水之後，就走黎問我同佢睇下，又問我佢公司搬新Office應該坐咩靚位，連客都打黎問我話同佢新Office睇下，係咪真係咁恐怖？不過…講都唔信，自從二月尾我起移媽買咗兩支富貴竹番黎之後，突然間開始旺到爆，做到踢晒腳，講都冇人信。

5. 香港突急見客之 Band 3 中學

今日突然間入咗去間 Band 3 嘅中學見客，佢地想搵公司寫套訓導資料嘅管理軟件，咁就約我上黎傾下，講下佢地學校啲違規點計數，點Gen Stats 等等，咁講起佢地呢家Existing嘅 DB，就係搵 Excel 一行行裝住，佢地話一年都成二萬幾個違規記錄，用 Excel 黎處理同埋做統計，都幾囉你命。點解會搵到我地？因為我地同佢啲辦學機構另一間中學 (今次呢間Band 1 :X)，做咗個老師進修統計嘅系統，呢家好鬼煩，要年年計下啲老師進修時間，報上去教局，咁所以就要搵人寫套 System 了，咁呢間Band3中學想搵人寫，又知同母學校有個咁嘅System，就問佢地囉咗我地Info，朝早11點打黎，想下午2PM去開會，真係急過坐火車…而且間學校位置好偏僻….真攪笑。

 隨心  回應的RSS 回應(2)  引用通告(2)   (0)
2006年06月13日

電子傳媒大戰一日比一日嚴重，尤如賽跑一樣，新聞真的跑出來，看見攝記由紅隨門口被職員阻止，到殺入紅隧跑數百米，還有一部極重的攝錄機，小點氣力都輸。

傳媒競爭大了，壓力自然來，各間傳媒都急忙拍片，傳片，收片，未看過就播片，要比其他台快一部，「真人Show」自然出現，完全未看過片段就播出紅隧職員與報社攝記打交場面，一句「X街」在全港電視機播出，控制室急忙將片段音量收上，之後攝記一手將手上的相機搞到紅隧職員的頭上，攝影師急忙在這場面突圍，跑入隧道內拍片，再長跑數百米跑到電單車位置，還要拍攝其他場面，訪問市民，再要做Live，百忙不亂，真的不易。

還有主播，只看片，作故仔，不致於 Dead Air，當沒有故事時就即時重覆故事大剛，小些經驗都不能。

不過由於科技進步，近年推出的手提電話大部份都有拍攝功能，讓身處其中的市民可拍下事件片段（例如「巴士呀叔」事件），所以電視台有時候亦會播放市民拍下的片段（觀眾提供片段），不過片段質素真的較為差，但亦可作一個事實的補充。

所以如你有留心的話，可能已發現，有不少記者已經不見了，主播亦是一樣，他們已經離職，有些轉了去做公關，有些就去了其他傳媒工作，更有些，去了一些小型新聞台工作，不知是否因為大型新聞台的緊迫力，尤其 LIVE 及特發的風氣，令他們轉去小型新聞台。

老手離去，每年都有不少大學畢業生殺出來，不過新手仍然需要經驗，近年新聞風氣有變，除了內容外，連記者/主播的外貌亦非常重要，所以如果你有時在街中見到下了班的記者/主播的樣子，就會說：「那台的化裝師真是勁。」

新丁入行，幹勁十足，不過做電視記者與文字記者各有差異，電視記者講求畫面，故事只需要提及重點，一針見血，故事長度通常大約1-2分鐘內，所以無需過份詳細。

文字記者需要內容詳盡，寫故仔方法亦要有方法(如倒金字塔)，資料及內容亦比電視記者多，不過時間就始終會比電視記者多一些。另一樣是記憶力，由於電視記者要出鏡或直播，都總要背幾句稿件，否則要經常望「貓紙」就不夠專業了。

不過一個記者最重要的，都是安守本份，報導事實的真相，就算拍不到好片段，寫出一個好故事，亦已經是很好了。

 時事/新聞  回應的RSS 回應(2)  暫時未有引用通告   (0)
2006年06月06日

1. YouTube 瓜咗都幾大回響………….

最近我將我啲陳年舊片，upload 晒去YouTube，攪笑在，唔知點解都有幾千人走去click 李臻鬧香港警察條片黎睇，而且又有人留Comments，我又試過起yahoo/google search 過，又搵唔到有人起forum放咗條link出黎，古怪..

2. 機戰演唱會事件，問完律師的意見…..如果真係攪上庭的話，成本都好高，包括要查佢係被迫清盤，定係自行清盤(申請文件$$$)，公司資料($$$$)，去登記債權人資料($$$$$)，刑事方面，由於佢真係有曾經去攪過個活動(聯絡過日本方面,日本方面黎過香港…等)，只係未有能力完成，咁就唔算係訛騙..所以仍然有難度…不過今日都有五十幾人去旺角警署報案…但由於今日要開工，未能去.:P 不過..呢單野，如果條友起個網站自稱清盤，但其實冇清盤走佬，先有得上庭追，又或者有啲痛腳可以告佢刑事，否則都幾難(至多真係備案..)，而且，除非清盤官有特別處理，否則只會等派餅，但隨時一蚊都囉唔番。

3. 收工，起屯門坐巴士番屋企，當然又係囉住部PSP睇片啦，之前坐巴士都諗過，如果可以整個L字型的架扣起前面個位，咁就好似機鐵咁，有個Screen起車位度，不過今日坐正架前面有個窿位的巴士，前面又冇人坐，咁我就將成部PSP 放起個窿位入面 :X，果然幾正…不過……..

睇緊套叫 TOKKO 特工(EP6)，睇到下半，無端端….個女角除咗條衫露咗兩點=.=;;;;;;;;;;;;; ………好在格黎條友都係囉住部PSP打機，唔知坐我另一邊後面個女仔睇唔睇到 (圖片經過打格處理 :X)

4. 早兩日終於將起日本 Anime Expo 囉番黎嘅新番 Postcard 貼晒起門後面，跟住我妹番黎見到，望完後，見到張學園天堂 (第3行第1張)，指住話：「呢套，好似成班都係『鴨』黎架播！」…….

吾…………

(我有追架…………:p)

吾………

(GL 片我都有睇架:X 無所不歡:P)

5. 上星期起Lab，無聊一刻…起啲日曆背面變出黎的Recycle Paper度……畫下公仔…..

PS:

 隨心  回應的RSS 回應(4)  暫時未有引用通告   (0)
2006年06月04日

一黎到六月，就爆出兩大笑話…

估唔到世界名片「巴士阿叔」，那位阿叔就係陳乙東，大家唔識佢都唔奇，一般電視新聞/報紙都唔會報導佢，因為佢都唔係咁出名，次次選特首新聞真係冇乜幾何報導過佢，以下獨家TV Cap真係難得一見，而且重有「有壓力熱線號碼」比你打去同佢減壓。(編按:電視出街時電話號碼並無打格仔)

特登走去買本壹週睇下啦，佢屋企極恐怖，亂都算，成地都係沙，重話佢有女友，報紙話佢有幾個學位，呢啲真係驚….香港奇人！

另一單…

一個錯誤的決定，攪個演唱會「未解決」就攪到公司倒閉，呢家話要登記，退唔退得番到錢都係問題，如果真係進行債務重組，我地呢啲小債仔實係排到最後，所以未必有得囉得番。我都囉住兩張飛起手，現在正問緊律師囉意見，是否去報警及搵埋其他有飛人士去法庭告佢訛騙….

6月1日下午更新：

咁快清埋盤…..咁應該可以上庭了…法律意見仍等候回覆中…應該今晚/聽日會有….到時再決定進一部行動…正所謂，「你不仁，我不義」。(2006年新版應為「你有壓力，我有壓力。」)…

 隨心  回應的RSS 回應(5)  暫時未有引用通告   (0)
2006年06月01日

我有個花名，叫「傻新」，因為啲人話我傻傻地。由於我「傻傻」地，最近玩咗兩個真人電話Sales 保險以及研究如何一向聲都唔出就可以令街邊問卷姐姐仔。(以下全部都係真人真事，但唔知有冇改編。)

真人電話Sales 保險：

滙X銀行編：
有朝早滙X銀行一位女推廣員打黎Sales 家居保險，講咗三分鐘講晒份保險有幾好，呢家做有乜乜特價，有乜乜回饋等等，我細細聲話：「冇需要了。」
佢問我點解，呢家個個都會買家居保險。我話：「關我咩事。」
跟住佢就話如果屋企有事，屋企人都可以有保障，跟住我又話：
「超！佢地有事關我咩事！我都就快死啦，佢地食自己啦！」
佢就好冇癮咁同我拜拜收線。

蘇X細保險編：
由於我曾經同蘇X細買過份旅遊保險，所以就有我Record了..有一日起StarBxxx咖啡舖飲緊咖啡(其實係溫緊書)就打黎了。同樣Sales 家居保險，又講咗幾分鐘，又話乜都保得呀，唔洗單呀，只要留番條屍就可以 Claim到錢等等。講完之後我又話冇興趣啦，佢又係話呢家個個都會買家居保險架播。跟住我就話：
我：「我對家居保險冇乜興趣，我最近想跳樓，你地有冇啲跳樓有得陪嘅保險？」
佢：「全球都冇呢隻保險架播！」
我：「咁呀，我最近真係好想跳樓，如果你地有啲呢保險，你快啲通知我拿拿林買份。」
佢：「咁呀，多謝你嘅意見先，我會向公司反映一下，如果有我地聯絡你呀。」
我：「噢，咁呀，咁你地一有好快知通知我拿！我等住死。」
佢：「好的，拜拜。」

街邊問卷：

報仇編：起旺角街頭，如果你想啲問卷姐姐唔行埋黎，你只要拿住部PSP扮睇片，跟住狂笑，最好行埋去個姐姐身邊，大大聲笑兩三下，嚇下佢，報仇咁報。

一粒聲都唔洗出自動彈開編：呢個方法，我試過係Work的。當個姐姐拿住塊板沖埋黎，頂住你去路，係咁bababa 講野時，你只要慢慢起袋囉部電話出黎，禁去相機模式(斜斜地咁比個姐姐仔望到你個電話熒幕)，跟住對住佢影相，佢即刻就會自動彈開。你無需要講任何野，笑笑咀咁行住囉個電話出黎就得了，試過好Work架，佢好驚你影佢/錄音，所以佢一見就會縮開。

 隨心  回應的RSS 回應(3)  暫時未有引用通告   (1)
2006年05月27日