「港娛國際控股集團」十周年大會
今夜真難忘，於「港娛國際控股集團」十年大會中，一晚內，見到港娛十年來經典人物，而且有些重係外國遠度回來。不過我真係識唔晒咁多個港娛經典人物，主要係因為我唔係第一代港娛人物，當年(1996)我起Newgroups的時間又唔多。問親啲外國番黎的網友，個個都係話因為機票平先番黎，但下星期又番過去了…..不過好多網友都變咗，例如嵐，唔認得了….(me too，企理一黎話我blog張相都唔係咁：p)，最有趣就係，原來有個有影開Cosplay的，就係斑紋。
估唔到會見到Bird，因為冇聽過話佢會黎，佢呢家又起馬來西亞繼續再戰通訊界。不過咁耐我都重未去過Bird屋企食私房菜，冇法，大家都係IT大忙人，佢有佢忙(飛黎飛去)，我有我忙(讀書工作同埋訓)。Bird真係好睇得起我，佢96年已經介紹我去佢公司(當年香港三大做Web公司之一)做暑期工，果晚都重有提起呢件事，真係鳴謝。
當然要曬下見到mocasting 老細(企理)啦：X ，重即場向他Repot Bugs添：P 。難得見到呢期紅人，咁緊係要同佢傾下生意經，同埋八掛下佢公司的近況。他預告好快mocasting 主頁會大改，期待中 ：P
重見到好多其他老友，Vincent、47、嵐、癲、骨、Jan、Joe、ball、飛天、敵等等唔知重有乜名。大談工作及生活，謝謝關心。
不過我可能老了，飲兩支青島就已經醉下醉下，最後飲左三支就已經倒地：X
PS：黎唔到的某某君同Claim 緊交通傷亡基金的偶偶君真係走寶。
PS2：港娛個個番黎，但笨蛋台就開始走佬潮，個個開始失蹤/發展，繼 fee 離家出走去咗奧利地，跟住又到 ken 仔上個月去完Turkey之後呢個月去咗法國睇暴動，今朝已經話去咗倫敦睇大笨鐘….
隨心
回應的RSS
暫時未有引用通告
2005年11月13日
我係「香港寬頻專上客戶」？
哈哈，香港寬頻打黎，話我因為長期使用香港寬頻的服務，呢家話我列入專上客戶名單，跟住就即刻介紹咗個家居電話優惠比我，話第一年$58第二年$78平均$64。我話，我申請咗轉台o拿播！跟住電話中職員後尾望番電腦，發現已經申請咗過台，咁就去介紹數碼電視優惠，頭半年$28，後半年$88平均$68。跟住我話：我會CUT的了。
個職員呆咗………
個職員問：做乜用得好好地要CUT？
我話：我轉咗去NOWTV了。NOWTV 收我$21蚊冇最低消費冇租解碼器費….
職員：但我地有七十個台播。
我：但我只係睇一個台咋播。
職員：我地68蚊有七十個台，你呢家廿蚊先睇到一個台咋播。
我：但我睇一個台，$68除1咪即係$68蚊睇一個台，所以我會CUT。
再互屌期間，我話佢地客戶服務好差。Download唔到首歌個半月都Solve唔到我，重要收我錢再收埋附加費，最後只係叫我打另一個電話去問。我話我打得到去搵佢地就唔洗個半月個個星期打黎問啦。個職員話可以再跟進番個Case，我話唔洗跟進了，半年前首歌，你呢家會唔會再Download丫，唔好話半年，個半月都冇咗興趣啦，重要囉黎煩。
跟住佢話，我地的客戶服務會不斷提升，會盡快處理我的問題。我問佢咁我呢家專上客戶，係咪有另一個客戶電話號碼，會優先處理客戶的問題？佢答：專上客戶係提供特別優惠比長期客戶。咁我有幾專上？
跟住我話我只係睇動畫同新聞台，佢就話佢地有新聞台，我即時話你地個新聞台同 Cable比，真係天壤之別，邊有得比。佢話我地新聞台每半小時update架，我即刻話：半小時錄影丫嘛！
跟住講到有線，佢話有線貴，我又唔睇波，唔抵睇。我話但人地質素同你個新聞台差好遠播！跟住佢就話多個選擇丫嘛，我地有好多台都有動畫節目架，你呢排有冇睇「銀河少女警察」丫。我話我呢家裝咗NOWTV都睇到拿播。佢跟住話我地資訊台呢家有個醫療節目，我話我唔睇。佢跟住又話有鳳皇衛視資訊台，我話Cable同NOWTV都有。跟住又話有韓劇，我話我唔睇…..
互屌咗三個字之後….
後尾我話：都係果句，$68貴過NOWTV，所以我裝咗NOWTV會CUT。佢又話但有七十個台「多個選擇」。重不停好強調多個選擇…，後尾我頂佢唔順，我讓一步，我話如果你地平過NOW 21蚊我會考慮下。佢話我地呢家暫時只係得呢個優惠，我話：咁我下個月會FAX 番份FORM 黎CUT的了。佢最後話…我地遲下再有優惠再打比你啦。
隨心
回應的RSS
暫時未有引用通告
2005年11月09日
本Blog質素下降之迷 - 直擊小新專訪
【本Blog訊】有調查發現，本網站內容的質素一直下降，內容亦經常開「空頭支票」，例如 HiME 26特典及配音Blog等，一直都未在本Blog出現，而動畫Blog內容越黎越搵笨，有見特此，本Blog記者特別訪問了本Blog主持人小新（右圖相中人），讓他解說一下。
記－記者 新－小新
記：呢排啲Blog真係不定期，尤其HiME同麵包王，成日都遲成個幾星期，最近忙乜？
新：最近主要都係忙Assignment、Test、番學同埋公司野，一星期都有五日要上堂，成身散晒架！所以有時候根本冇時間寫Blog，同埋有時間都想用黎訓覺。
記：最近你啲Blog開空頭支票播，你點解釋？
新：其實都唔係唔想講，HiME26特典我想留番CableTV播咗第26集先講，呢家咁快貼啲圖上黎，叫你唔好Click 黎睇，你咪一樣Click！所以留番遲啲先放出黎。保證有！至於配音，其實我已經番咗幾個月，不過呢兩個星期因為有啲辛苦（個人問題，把聲去唔到咁高音，同埋唔係好識用聲同氣，發埋好多假聲），呢個星期要配武俠片添，我真係嘔血的了。教我果個導師(暫時唔方便講係邊個)，都話我對咀好咗好多的了，不過時候都會講得快咗，尤其配啲韓國同台灣片，佢地啲對白UP得好鬼快。我遲下會寫番一個Blog 講番呢幾個月學咗啲乜，識我的朋友都可能留意到我已經盡量改善自己啲懶音，例如中「國」、不「過」等等，之前我貼過一篇「黃巷之狗」，其實就係其中一個練習教材黎。
記：有調查話你個Blog內容質素下降，尤其係動畫果啲「每集一Blog」，你點回應？
新：我認…其實係..寫法改變咗。之前寫法係好似內容介紹咁，但其實你睇咗的話，都知果啲內容架啦，所以呢家真係想寫番啲 “Comments” (意見) 出黎，所以字數小咗，至於圖片方面，因為唔想 Cap 得太多(處理時間)，另外就係，唔想比圖片變咗主導文字輔助，所以減少咗圖片數目。我最近已經將文章分類再編排過，另外就係，我會有時間寫多啲「專題探討」，增加內容的可讀性。
記：傳聞話你可能會轉下個Blog Layout 播，可否透露下？
新：計劃緊姐，因為呢個Blog都有半年了，我起寫呢個Blog 初初果時，有人話我好快會放棄，但我自己都估唔到，寫寫下就半年了。我覺得原來寫Blog都幾有趣，同以前寫稿好唔同，以前寫稿，好多時都要就住就住，同埋限死咗一定要寫果啲題材，Blog就唔同，寫乜都得。當然，寫稿就係搵錢，寫Blog就係貼錢(時間)，不過，我都相信有恆心的話，我會繼續寫落去的。起碼原來真係有人睇呢個Blog。
記：你話真係有人睇呢個Blog，可否講下有幾多人睇過？
新：實際數字就唔想透露了，獻醜咩，不過可以話你知，都有五個位數字的…
記：好耐冇聽過你關於Cosplay啲野咋播，其實點解你會無端端走去Cosplay？
新：其實，我以前係影開 Cosplay，不過影影下，覺得Cosplay幾好玩，可以扮演自己鍾意的動畫人物，咁我就覺得，自己可以出一份力，為Cosplay界打一支針，咁所以我就起上年８月開始試下去Cosplay，到呢家為止，雖然我只係Cos到三個角色，但我覺得每次都係一個挑戰，我一來唔係專業Cosplayer，每次我都要面對各種唔同的問題，例如服裝、道具、金錢等等(錢原來係最重要-_-)，但起碼每次都可以Cos 到自己喜歡的人物。每次都係一次新的挑戰。
記：咁你下次會Cos邊個？講黎聽下丫？
新：我計劃緊12月ACG 會 Cos Cluster Edge 裏面其中一個角色，呢家仍然係Plan 緊，一來係要儲錢，服裝係一樣最大的支出，搵師父做一套衫，起碼幾百蚊，我估計緊呢次呢套差唔多要做六、七百蚊，所以都幾「甘」架，另外就係假頭髮，我成日都有啲心理關口，就係戴個黃色假髮，同埋唔係好知去邊度買。不過我會Try my best ，希望趕及12月ACG啦。
記：你有冇啲乜野想同大家講下？
新：我想借呢個機會，同有睇我呢個Blog同起度留「迴響」的網友們講多謝，有你地，我先有動力繼續寫個Blog，好似好假咁，咁但係，其實呢度可以係一個溝通的橋樑。正如我以前起報紙雜誌寫稿，就只係有我寫冇你講，呢家科技進步，大家可以借機會溝通下，又可以插下我啲錯處，我的意見只係我的意見，你有你的意見，大家討論下，先有進步。就好似……….(編按：下刪一千字)
記：今日真係好多謝小新同我地做呢個訪問，我知你聽晚重要測驗，你努力啲呀！
新：謝謝，你都知我懶架啦，唔懶的話，點會同你咁得閒做呢個訪問丫，哈哈哈哈！
隨心
回應的RSS
暫時未有引用通告
2005年11月07日
舞-乙HiME - 第5集
難得咁快就寫定，廢事拖啦，因為…有舞衣嘛！！！！！！
我有冇眼花？？？？呢個係咪舞衣黎？？？？？咁如咁講，話舞衣好出名，連backstage 都有咁大張Poster，即係舞衣可能已經畢業做咗某個國家的乙HiME？
講到好似愛莉卡同和也有好感咁，喂，你唔記得玫我姐姐話，唔可以同男人戀愛結婚同做乜乜架！同埋，人地個心起茜度嘛！咪做第三者啦！
睇到愛莉卡同翁兩個鬥氣，就好似睇緊「玻璃面具」咁……真白鬥氣又係好好笑，繼續為清水愛做隻貓而默哀……
咁快有奸角….右邊果個”高層”…覺得係綠色頭髮果位雛菊巴，聽把聲又唔係真係太似田中理惠(把聲禁得太低)，聽住先 :p
期待大家預測中的晶、舞衣、命(真人版)、循、巧海等等在乙HiME番生….
動畫與漫畫
回應的RSS
暫時未有引用通告
通靈王 in Animax
呢兩個月 Animax 冇咩岩我睇…一係睇咗，一係唔岩睇，一係個節目好惡頂。不過岩岩收到風話下個月 Animax 會播「通靈王」(未睇過:X) ，令我又好有興趣追番黎睇…原本都想睇機動神腦，不過睇睇下又一套Gundam 翻版，冇睇了=.=
另，題外話：有線新聞二台將會名為「有線新聞台」，新聞一台改名為「有線財經資訊台」，電影一二三台會重組為電影一(41台)、二(42台)及「有線荷里活影院」(40台)。由06年1月3日生效….
講起電視，其實好想香港會有條播日本MV的頻道……如果有就好了:p
動畫與漫畫
回應的RSS
暫時未有引用通告
2005年11月05日
(1) 
