新 BLOG - 2008 放眼世界

百變小櫻 FINAL

(尋日太眼訓，所以冇寫到。)

終於起 Animax 煲晒百變小櫻了：～～～如果Animax 播埋 OVA 同Movie 就好了：～～～

小狼同小櫻太可愛了:O~~~~~~

反而覺得呢家播緊的 Tsubasa 裏面的小狼同小櫻老咗。Tsubasa 漫畫我都睇到第十期，又唔知幾時先繼續出。CLAMP 啲漫畫成日都爛尾:X，睇下 X 丫….出到第18期之後…影到冇埋，重有近期有本咩迷幻藥局，又係出到冇咗影，都唔計之前幾十萬年前果啲！

返回正題，TVB播果時我係冇睇過架，呢家真係Animax 上年開始播第一輯到呢家播第二輯睇番咋！呢家暫時冇野起Animax 追了(新播果啲，一係睇過，一係唔好睇…..)，下個月就會追 GITS 2 、頭文字D同翻睇女神候補生！

動畫與漫畫回應的RSS 回應(2) 暫時未有引用通告 (0)
2005年08月30日

舞-HiME (誘姬) 有線第一、二話 (Ver2)

今日娛樂台開始播了，正當期待以久，囉住個沙律開始食住黎「翻睇」時….

一開始，就播剪輯咗的 OP!!!!!!!!!!!!!!! 每集的 OP都係開始播之後先出的，但呢家被抽在一開頭播，重加入了黑底歌詞字幕，好在冇整個中文版 OP ，唔係真係嚇死你=.=;;; 我的栗林OP:~~~

跟住就即刻整個當集Title，原本個Title 起OP之後先出的，呢家放咗起前面，都算吧。

先講下配音先啦，呢兩集都叫聽晒大部份角色，配得最好果個估唔到係巧海，可能佢對白變化得唔多，至於舞衣暫時都幾好，未聽到啲廣告果時叫伽具士果時啲「呼叫」位，其他….OK啦，始終唔係TVB配足十年果啲…(老實講，練金術TVB配得真係好好架:X)

跟住講下字幕同埋廣東對白，字幕大故上都很好， She wrote him a long letter 都有照出，不過發現有一句打錯字，一陣講。至於廣東對白，有幾句講得好鬼地道，例如：「正咸濕佬」、「咪咁老鳳人人都會望你」、「果隻衰貓」、「八掛公，專拍馬屁」…

發現咗一樣野，原來我一直都唔識讀鴇羽舞衣個「鴇」字，因為叫開舞衣或者Mai，原來讀「寶」，字典解呢個字係「開妓院的女人」…..-_- (當然日文名唔可以用中文解法啦 :X, just for fun)

講下 HiME 呢個字點讀，好記得睇日文版，係讀 He (高音，He is a boy 個 He) 咩 (低音)，但娛樂台啲中文配音，讀 He(低音) 咩 (高音，羊咩咩個咩），突然間唔同晒，不過字幕都出番 HiME 跟番大細楷，咁應該點讀呢:X [整咗D WMV 可以聽下…….]

起第一集尾，出咗 ED 歌的時候，突然一剪！噢，ED剪埋…..跟住第二集尾，又播ED歌時，諗住實有啦，點之突然一跳音樂！又出現黑底ED 畫面，ED Credit 係第一集的 Credit，跟住再貪心小小諗住有預告啦，點之預告都冇埋！重衰過兒童台！！！！！

講下第二集，之前睇，當然未知之後講乜，所以有啲位根本唔會太留心，就算留心，之後睇番之後的集數，都唔知之前出過。呢家睇番第二集，石田彰（炎）同二三講話啲HiME 黎晒，跟住發現，係播！啲集好多過場畫面，啲HiME 都起晒度（印像中應該齊晒，~~只係差一個角色未出~~ [諗起，應該係兩個]）。為免透露劇情比啲未睇過的朋友仔，所以盡量忍弱咁出個畫面提小小啦。（其實之下每個畫面都有意思的:X，咁當然男果啲唔係HiME啦，亦當然唔係個個女都一定係 HiME 啦。)

就係呢句了，修女：「這樣一定可以成本」呢句打錯字了，應該係成「功」，廣東話配音冇錯，係字幕錯。

跟住講下校長同二三，日文配音裏面，風花真白同姫野二三都係同一個配音員ゆかな配的，但香港配音，我真係聽唔出係同一個人定係兩個人配，請指點。

睇呢兩集，最懷念的係梶浦由記的BGM，當年真係好好聽架，不過呢期，好多套動畫都有搵梶浦由記做音樂，但唔係套套都好有番佢的風格，叫好啲的，就有最近的Tsubasa翼同第一二三集的武器種族傳說 (Erementar Gerad)，當年佢的 noir 、 .hack//sign 、 MADLAX 同 Aquarian Age (呢套可能唔係太多人聽過，不過又好好睇) ，簡值係經典！佢上年(?)都去咗美國的 Anime Expo 做演出嘉賓，演奏 .hack 的音樂(起美國 .hack 都幾hit的)。

大致係咁，我都會繼續睇落去的，當係重溫下囉（會繼續支持香港配音），呢套的確幾好睇，而且十月開始播第二輯又當然會繼續追啦！

(WMV下載)

動畫與漫畫回應的RSS 按此回應引用通告(2) (0)
2005年08月29日

日式麵包王 - 43 話

上集預告睇到和馬番咗黎，冇晒神秘感了。呢集好似睇緊變臉咁….

上集都話重有90(?)分鐘，呢家咁快得番20分鐘．．突然和馬囉住個黑色麵包番黎。啲麵包越黎越唔似麵包，似玩具咁……如果你屋企樓下間麵包舖賣啲咁樣的麵包，你敢唔敢買黎食丫？

個國皇係咪真係愛上麵包愛到傻呢？自己架坐架都有個廚房起度，咁即係佢平時坐車都會自己整下麵包？-_-

呢集河內已經變咗個癲佬，小丑食完基路山伯爵(Kayser)個包之後，又發癲了….可憐的河內，連佢整的包，都話唔洗試食，唉…傻咗了…

突然間子安咁安靜咁講野….難得……唔通佢啲怪病冇機會發作所以….

一堆面臉、癲佬、恐怖、龍珠、生草、合體、溶解同一Pat 紅色龜樣麵包盡在咁多張圖裏面-_-;;;;;;

終於到呢個黑色暗環麵包(?)都重係麵包????變臉又黎了…..黑柳個樣好似個基基地咁-_-;;蘇菲個樣又變咗傻婆…河內又繼續變傻佬傻佬再傻佬…..

講到個麵包好鬼勁咁，理論還理論，現實還現實。實際個麵包整唔整到出黎食得，都係問題:X (雖然日本真係有幾個日式麵包賣，但整得晒五十幾個都賣得的話……………. er……)基路山(叫慣咗添-_-)輸咗，咁即係得番雪乃背後的美國隊了…

嘩！新ED啊～～～啲麵包片又出番現了…..和馬個瘦身樣好Q~正啊~

預告….河內個樣已經………………………………..再加埋個假髮…………………………….. 癲佬又出番黎……………….
下集係咪有新OP 呢？？？？

係播，日本班友仔去晒邊？冠唔再打電話黎？IDD 太貴？同埋果個幾多倍個賭局又去咗邊？？？

動畫與漫畫回應的RSS 按此回應引用通告(7) (0)
2005年08月27日

都仍然係舞-HiME (誘姬) -_-

自從娛樂台廣告推出後，好多人都起Yahoo Search 「誘姬」，睇下幾時變做熱門搜尋Keyword。唔知做乜呢日都係對住舞-HiME，今日就係睇咗HiME DVD 版的映像特典，大部份都係男性 Service 向（好鬼Service 果隻呢:p) ，但估唔到 Special 20 講巧海裏面，出現咗佢同舞衣細過沖涼的畫面：～太可愛了！

除咗呢個之外，重另外睇咗個CV訪問，有19個CV的訪問，的確係做聲優的，好多都平時唔可以見人 :X

關智一太攪笑，一配完之後整個手指公出黎，Yeah~掂~咁。反而配巧海的高橋裕吾，好鬼高大，同埋最初初播第一集果時，起船上面聽到佢把聲果時，都以為配巧考海係石田彰（有啲似），後尾先知唔係。講起石田彰，個訪問裏面有19個聲優，但係冇咗佢……………

另外還有兩個。岩男潤子真係好耐冇見過佢，因為佢個角色あかね(akane)，只係得幾集命，所以起個訪問度岩男勁好笑話求監製比佢出場，好鬼好笑。妳的願望實現了，舞-乙HiME番生了，預咗個角色比妳配呢，希望都配番十幾廿集啦:X 。我認識岩男潤子係當年渡瀨悠宇的夢幻妖子而認識，呢排Animax播緊的百變小櫻裏面的大道寺知世就是她配了。ゆかな(Yukana)真係未見過真人，今次都係第一次見。

最後．．靚樣的聲優真係唔多(所以先叫「聲」優 :X )

動畫與漫畫回應的RSS 按此回應引用通告(4) (0)
2005年08月25日

惡戲 - 2005 年 8 月 24 日

本日惡戲內容有不良成份，繼續PG家長指引！

極上生徒會 - 第 19 集

(以上對白為設計對白)

動畫與漫畫回應的RSS 按此回應引用通告(1) (0)
2005年08月24日

又係舞-HiME ..

今日囉咗本Newtype 番公司Scan…起地鐵好留心咁煲埋本Newtype 之下，發現舞-乙HiME的配音List….右邊呢個マシロ・ブラン・ド・ヴィントブルーム，個樣熟口熟面，好鬼似Full Metal Panic 的艦長，配音又係ゆかな，成個指定角色咁。（右圖Click有全版Scan)(PS:突然被佐藤聖提起…”呢個咪上集個校長-_-”…我似乎失憶了…)