新 BLOG - 2008 放眼世界

 隨心  回應的RSS 按此回應  暫時未有引用通告   (0)
2007年08月21日

前前言：由於太忙了，所以爛咗幾個星期，相信寫完呢個之後會再爛多一星期…..見諒。

呢集台灣很滋味(縮水版)，先講下有「台灣黃金/高登」之稱嘅光華商場的新大樓即將落成啟用，帶大家睇下新大樓係點，另外帶你去台北有名的18禁咸Game咸碟之地「新光華」走一轉。當然順路帶你去埋台北上年新落成的誠品信義店，除咗買書外，點都要買個手信。另外重會帶你睇下台北史力加同變形金剛，最後當然唔少得食番一餐。即刻送上…遲來的….台灣很滋味！

 旅遊/觀光  回應的RSS 按此回應  暫時未有引用通告   (0)
2007年08月16日

3月時日本剛播秒速5cm Yahoo JP 放了第一話出來，當時看了亦寫了一個小評，但由於未看二、三話，所以未有整體短評。剛剛電影節Summer Pop 終於帶來了新海誠的動畫，亦令我在年頭寫的電影節blog 內容成真。雖然 DVD 已在日本推出，但已經忍手不看，等在電影節在戲院內看。總算看了，當然有讚亦有丙！(有關第一集故事簡介請看早前的blog)

畫功一流，場景細緻

首先講畫功，看齊三集後，今次5cm的畫功比上兩套更靚，尤其在畫背景方面如天空、雲海、草原，都非常細緻，在處理陽光方面，亦非常之出色，呢樣真係比起外國的大制作動畫完全不同級數。

故事時間 (Timeline)

至於時間的交代，如果有留心睇的話，起畫面上面係有交代每一集的年份，例如第一集係 1995年，當時手提電話仍未大普及，所以男女主角仍然以郵件通訊。但到第二集，他們已經有手提電話，代替書信，第三集他們已經長大亦已經出社會工作，時間係2008年，在第三集中段男主角貴樹在便利店囉咗本雜誌睇，裏面提及衛星上太空是 1999年，即是第二集是在1999年發生。即是故事其實已經係過咗13年。

故事：偷雞劇情

故事方便，我覺得新海誠呢次係有啲「偷雞」。新海誠起畫工上係出色，但在故事上處理的手法經常都有一啲問題。今次他將故事一切三，在第三集最尾播歌，一鑊過將呢13年發生的事起首歌內一次過快速咁播晒出黎，佢就可以諗小好多劇情，但又可以交代整個故事，等你超快吸收，吸收唔切就唔該買隻DVD煲番。

雖然佢有一部份冇詳細咁交代，但總括上都估到男主角貴樹同女主角明理因為分隔二地，而大家各自都在自己的學校識了異性，開始中斷聯絡，大家各自有各自的生活，雖然貴樹仍然掛住明理，但只係打短訊但唔敢Send出去。而最後，明里與高中的男朋友結婚，而貴樹雖然曾經與一個叫水野的女子交往三年，但最後水野亦發現貴樹心裏面仍然係有另一個女子而分手。

另外你有睇過星之聲的話，都知新海誠好鍾意以「訊息」去表達自己的思意，去取代語言的溝通，經常都係「自然自語」，缺乏互動性，劇情、內容等由觀眾自己起畫面及對白中前後分析及吸收，第一、三集就是這樣。你可以話係新海誠的風格，不過太過過份就令到觀眾覺得故事很悶。

第一集有一半都是坐電車，要表達的內容不多，第三集直頭「打矛波」一首歌講晒13年的事，最有心機及劇情編排，都算是第二集，用了一集去講澄田花苗一步一步鍾意了貴樹，但經常猶移不決，到最後正想表白時，終於都向現實低頭，感覺到貴樹心裏面有另一個，而繼續維持同學的關係。

雖然最後故事仍係表達到想帶出什麼訊息，但仍然係「一舊舊」地表達出黎。我覺得新海誠起編寫一啲較長的劇本的時候，總係無法連貫到，所以話今次將個故事拆開三集係偷雞。

另一樣滿意的係主提曲「One more time, One more chance」的歌詞非常好及貼題，雖然被放在一個偷雞的地方處。呢首歌係山崎まさよし起1997年播放的電影「月とキャベツ」裏面的主提曲，10年後比新海誠再用，再由山崎まさよし番唱5cm Edition版本，仍然係好正。所以睇畫面追劇情之如，都要留意下歌詞。睇唔切？DVD吧！

戲院中文字幕爛 

五十五蚊係值回票價的，不過今次電影節播放的版本係亞洲影業代理咗的字幕版，即係話好大可能起香港係會上正場(可能只在電影中心/APM上映)，亦會好快出正版DVD，如果正版DVD 係好似日本DVD 特典版有齊咁多個訪問、MV及Storyboard，是非常之值得買，但唔該佢地要譯過個中文字幕先，因為呢家播放果個版本啲中文字幕錯得好過份，有啲譯到錯Q晒…..

後記…

畫面其實交代了不少劇情，例如介子戴在無名指(結婚)，貴樹心中的幻想(一直都想著同明理一齊)、貴樹的工作(Programmer)，另一幕特別想講講下，就係以下的畫面：

係貴樹收到佢前女朋友水野的 Email ，上面有張倒轉咗的Form，其實係一張雇用保險的離職證明書，證明佢離職，可以去Claim 雇用保險(類似失業救濟金)。想知多啲可以睇下呢個 Webpage 有介紹日本的社會保障制度。

 電影, 娛樂/影視  回應的RSS 回應(3)  暫時未有引用通告   (3)
2007年08月09日

真係吹到啤一聲………估唔到中文作文會囉 UNCL….. -__-

我篇檸檬茶真係作得好差咩！！！！

其他科都同我估的差唔多…

 隨心  回應的RSS 回應(1)  暫時未有引用通告   (0)
2007年08月08日

今日奧委會 (IOC) 公布將 2012 倫敦奧運、2010溫哥華冬季奧運的所有媒體播放權，再連埋2008北京奧運的新媒體(互聯網及流動平台)播放權一齊賣比 CableTV 。令到 TVB 同 ATV 話聯合投訢奧委會話冇奧運精神。呢個真係一個笑話。

首先，我個人覺得讓成呢件事的最大兇手係 PCCW 。如果唔係PCCW 天價買英超番黎， CableTV 就唔會有錢去買 08奧運同10/12奧運。但呢家 PCCW 天價買英超，英超Plan又超貴，只係睇波都要218，HD 又要再另外加錢。再加埋呢家2010世界杯有線獨家的事，又另無線亞視出聲嘈，其實最後觀眾先係大輸家。

根據 IOC 的 Press Release，無線亞視係買咗 08北京奧運的電視轉播權，即係有線本身係冇轉播權，但佢呢家買新媒體轉播權，真係有用？呢招就似來自PCCW 英超手機播，不過覺得有線呢招新媒體比 PCCW 自家播更賤。

首先講時差，由於今次奧運起北京舉行，不少比賽都會在白天舉行，不少人都要番工，在家中睇無線亞視直播的人不多，而且無線亞視亦唔會起晚間黃金時間轉播，只會在深夜重播， 利用手機及 Internet 直播及轉播正正就方便了一班上班一族番工搭車偷懶時睇，而且有線自己冇手機台，佢會將轉播賣比電訊商，例如呢家有線將新聞娛樂內容賣比 3 同 one2free，咁的話，佢一樣可以賺到錢，觀眾平台比起 PCCW Mobile 一個台更多。

Internet 一樣，PCCW喜歡獨家平台播，就算連 now.com.hk 、MOOV 都不歡迎非 PCCW 客戶，初頭icable 都是走這樣的方向，但這樣封閉式的客戶層面，對公司的發展亦沒有好處，現在市場開放，競爭亦加大，icable最近都改變方向，將網上內容開放，及加強上網直播的體育節目，配合網上重溫，互補電視平台的不足，亦可作為一個收入的來源。

至於奧運精神，真係一個藉口，一個商業利益為重的藉口。正如世界杯、2010世界杯無法在免費台播，咁係咪又冇觀眾分享權？定係冇咗個高收視廣告時段？又例如最近的 LIVE EARTH，以前都會在明珠台直播，但今年搬到收費頻道播放，免費台只有精華片段，但不停賣廣告只在收費電視播，咁係「利」字行先定係「咩」字行先？

新媒體的推起，都係傳統電視的挑戰，所以廣告商都說target為年青人的產品，現在很難再在電視賣廣告，因為不少年青人已經不看電視，尤其免費電視頻道，包括我。

 隨心  回應的RSS 回應(1)  暫時未有引用通告   (0)
2007年08月07日

最近兩日電視新聞不斷提及會考計分制，我先諗起我都係會考生。今年會考計分由 1-5 及 5*，5*為最高，1為最低，低過一分就會不予評級(Uncl)。等我估下自己有幾多分：

中國語文：
卷一(閱讀理解)：都OK的，不算太難，估應該都有 3
卷二(作文)：雖然我寫Lemon Tea，但都寫得有啲吹爛水，我諗囉 3。
卷三(聆聽)：講得太快了，真係聽唔切，所以應該麻麻地，但都應該有 3呱。
卷四(說話能力)：真係冇咩Point，四個字真係講到O咀，所以我諗得 2。
卷五(綜合)：呢啲Data File 的 Task，我年年都做得好差，所以我諗都係得 2。

所以拉埋我諗都係得 3分。

英國語文：
卷一A(Reading)：比以前淺好多，又冇乜問Grammer，所以我諗可能會有 4分。
卷一B(Writing)：三個題目都有啲唔Like，所以冇乜Mood作，我諗得2。
卷二(Listening&Task)：個Listening 好淺，但後尾Task唔係太夠時間做，所以有啲蚊水，我諗得3。
卷三(Speaking)：炒咗！可能得 1 分。

拉埋可能只係得 2分。

點解英文Speaking 炒咗，因為個題目太蝦人。個題目係講如果有流感或者SARS，學校停學，校長叫你諗下點令學生繼續可以溫習同上堂，同埋點幫其他有需要的同學。呢個6分鐘的Group Discussion都還可，但一到1分鐘的個別回答，就出事了。考官問我：點解有流感 SARS 時要帶口罩？原本我想講話因為可以防止口水噴出黎傳播病菌，但突然間諗唔到「口水」的英文…跟住連緊張到「病毒」(Virus)的英文都唔記得！！！我係咪抵打…….

(8月8號……..)

 隨心  回應的RSS 回應(1)  暫時未有引用通告   (0)
2007年08月03日

早排去咗珀麗灣 Club House …同幾個小朋友嘅生日會同佢地影下相，初頭真係連珀麗灣都未聽過，後來先知原來起馬灣…

起荃灣西碼頭有船入去珀麗灣，船程約15分鐘，入到去發覺真係好渡假Feel….佢有24hrs 巴士出番葵芳同青衣，亦有船去荃灣西、中環(24hrs)，另外重有一架巴士去機場。

有三個Club House，有海景，又有渡假的感覺，走時重即刻囉個PDA上網查下租呢度幾錢…

原來真係好鬼平，租一個約七百尺的單位只係$8500租，真係好吸引，如果我中咗100萬…可以諗下。一來公司起葵芳，一程車$6 只係約15-20分鐘就出到去，交通亦算係咁，不過如果番工番得遠的話，其實就會幾唔就腳同埋車費會幾貴，去街都係一樣，車費就自然Double，不過其實同搬入屯門元朗住差唔多，但分別係屯門元朗有齊商場及設備，馬灣就乜都冇。

但我覺得$8500租可以住到海邊樓，雖然唔係市區，但話晒都係私家樓同埋環境又靚，真係好心動架……

唔知我幾時有幾百萬呢….

 隨心, 攝影  回應的RSS 回應(1)  暫時未有引用通告   (0)
2007年08月03日