新 BLOG - 2008 放眼世界

雙喜臨門…

我呢家讀緊果個Course 最尾呢科考試，終於死死氣氣咁囉咗個 D 畢業了，真係激Q死，衰然我呢個Sem真係好懶，係我啲舊同學話呢科易讀我先揀咋，點之考咗個 D 出黎，拉低晒我啲GPA (讀咁多科都未囉過D)！算，都叫做畢咗業….. =.=

另外…起格黎個自我介紹咪話今年希望可以入IVE，上年報過IVE但唔收，今年當然再接再厲，走去報咗觀塘IVE Digital Media，難得地今年有得 Interview，當然點都去In下啦，不過時間好趕加上我又忙，都冇乜時間準備，我只係去快圖美 Print 咗啲上上上星期起長洲影的飄色相同埋一啲做緊的 Video Editing Screen Capture，再帶部Mac Book 播條我剪我砌的 DVD去In，都係博下大霧睇下收唔收啦，哈哈哈估唔到，上星期出咗Result 收咗我！咁即係我今年又唔洗失學了～可以入去IVE讀多兩年半。

In果時條友問我咩都識，咁入黎讀乜？我好老實咁話真係入黎學3D Animation，呢個係事實，我啲 3D 真係Zero Knowledgue，另外當然係想玩下 Video Studio 啦，有成套Video A/V Panel呀，電視台的Camera 呀等等，呢啲我都想玩，希望功課唔好太忙啦，我就快忙到喊架啦！

不過我媽就唔係好滿意我入 IVE 讀….早兩日我同佢講，佢就話叫我搵間正正經經的學校再讀高啲…..但我真係唔想再用多四年時間走去讀個冇乜用的 PhD，讀多個Business Master冇咁嬲，我最初最初都係諗住讀完一個Computer Master 然後跳過去讀Business Master，不過當然要考慮學費問題啦，你估我媽真係99999金手指無限金錢咩。不過呢家讀個IVE 都唔平，我果個讀晒計過都要約六萬，但科目數目多好多，李麗珊話養個小朋友要四百萬真係唔係超低能架！

隨心回應的RSS 回應(3) 暫時未有引用通告 (0)

有線電視第一台、HKBN BBTV 及NOW新聞台…

呢期忙到嘔電，我都唔係好明點解會咁，真係一個解唔開嘅「謎」！三個星期冇寫blog 真係冇計…呢家都係偷懶中…

收費電視界又有變動…Cable冇咗英超就學便利咁改名，將A台變第1台，但節目內容真係唔覺有咩特別加強，只係比以往更加「共用」資源及將節目再Repackage 過又再播過，呢家只係話得三個主打節目……驚喜度係「零」….真係主打比啲冇睇開有線的免費人黎睇下，再賣廣告時段….唔掂唔掂…唉…..而且呢家英超又冇，世界杯又要兩年後，呢家Cut等世杯前半年再上會好過吧

HKBN BBTV 呢個新廣告真係掛羊頭賣狗肉，睇完都想笑，「香港電影台」播果啲電影…聽都未聽過，體育台冇架啦，新聞台冇晒直播架啦，呢家至巴閉咪有果「六大精彩頻道」囉，不過講起HKBN，早兩個月話推的 BBBOX都冇埋影，係咪重有技術問題呢..同埋我已經交晒 BBTV Cut Form，呢個月尾Cut，之前已經打咗黎Null繼續用，但個價錢仍然都係$88包六大台，一蚊都唔肯減，暫時睇黎$88已經係底線，再加上呢家又大賣廣告，谷新客入會，睇下月尾重打唔打黎Null續會，以HKBN的風格，通常Last day 就會打黎，佢唔打的話，即係真係趕我呢啲惡客走，嘿！

上年大傳話唔同ATV24續約，今年終於成事了，以呢家NOW新聞部開始運作好咗好多，都係時候加強人手做埋24新聞，而ATV24會繼續起數碼頻道做落去，咁即係數下數下將會有第5條 24小時的新聞頻道 (TVB/ATV/Cable/HKBN/NOW)。NOW做新聞頻道始終有優勢，由於佢已經有基本客源(來自ATV24)，當ATV24起NOW完時，啲客都應該都會自動轉會去NOW24，而且成本會比之前同ATV24細咗，NOW 更可以用套餐式連埋財經台賣(例如$15/台，$25包晒新聞/財經/直播台)，對佢收入更有利。

隨心回應的RSS 按此回應暫時未有引用通告 (0)

Sony LocationFree Base Station (LF-PK1) 測試報告

前言

之前咪講過其中一件玩具就係一件可以起街睇到屋企電視的硬件，其實就係 Sony LocationFree Base Station。呢件野起Sony 訂咗一個月有多先有貨到港，初頭以為呢件野都幾垃圾，應該冇人買，不過原來又唔係，下面會提及….(內容好鬼長…所以有心的話慢慢睇……)

(閱讀全文)

消閒/嗜好回應的RSS 回應(3) 暫時未有引用通告 (1)
2007年05月13日

又忙到嘔電..-_-

冇寫一星期，即係我又係忙到嘔電的時候…我都唔明點解成日都忙到嘔電….

會考中文之老貓燒鬚

大大話話今年已經係第四次考會考，不過只係報咗中文同英文，因為今年轉晒制，所以咪去玩下囉，無壓力考試，但由於要八點幾仆出去試場，攪到我兩星期四日都冇得訓，謝皮咗十年。

先講下中文科，大家應該都知道今年中文考試好出名，就黎自「檸檬茶」呢三個字，不過之前睇見Mock卷佢地出「手提電話」都知佢地總會有一條「物件」老作題。

我當時望到份卷，第一條我根本都唔知係乜鬼，十幾年冇番學點鬼知敬師日裏面有乜，第三條呢啲要寫「見解」一下子好難諗咁多Point，第二條真係任你「天花龍鳳」，所以決定寫第二條。然後諗應該點寫法，寫一個故仔同檸檬茶有關(電視廣告)？講下檸檬茶的事？諗咗一陣，我決定寫一篇好似報紙的文采版的形式，舒發我對檸檬茶的感覺。裏面講我好鍾意飲檸檬茶，我同檸檬茶有住不解之緣等等，不斷老吹老作。

吹吹下寫到點沖一杯靚的檸檬茶，突然間諗，我真係唔知檸檬茶係點沖，雖然我去茶餐廳真係只會飲檸茶，但飲咗咁多年我都唔知係乜茶，就連一入茶餐廳呀姐囉兩杯茶比你飲果啲茶係乜茶我都唔知，最後我就開始大發神威，寫話沖檸檬茶要用淡味的茶葉，例如鐵觀音、香片，要用夠酸的檸檬，切片要切厚身，可保留更多檸檬汁。

考完番到屋企，起Chatroom同人講起會考，佢地問我作乜，我就講番出黎，跟住就比佢地話：檸檬茶係紅茶黎架！即刻比人笑到面黃，呢次真係老貓燒鬚。

中文Listening今年係首年考，我個人覺得都幾難，難在係裏面啲「配音員」對話真係幾快下，根本聽到抄唔切啲Point，聽佢講乜唔係問題，但又要同時間邊抄邊Make Notes，真係有啲難度，因為都幾多Point要寫。另外點解話佢地係「配音員」？因為佢地的確係「配音員」XD，講得快的同時，每隻字都好清楚(唔係點做好呢份工XD)，另外就係非常粵語正音，好清楚咁講「時奸」(時間)，而唔係講「時澗」。

相對番英文，今年英文份卷比顯係淺咗，淺過以前的Syllabus B，Reading卷覺得唔係太深，作文都還可以，Listening直頭係淺到離譜，讀得超慢之如，間唔中都串埋啲字比你，真係送分果隻，就算有啲D唔識串，份卷前後都有得抄番 (例如有條Listening要你串festival，我都一時諗唔起Fest????，後幾頁Data File已經有得抄)，不過Task 4-6 就覺得要寫好多野，雖然要聽的野又唔係真係多同埋難，但一個鐘頭十五分鐘要做三個Task 而且有兩個Task 係要作文，真係有啲做唔切。

不過三份卷夾埋都冇晒以前果啲勁黑人憎的改句子、搵錯Grammar、全篇文Fill in the blank 呢啲難到嘔的問題，真係覺得越考越淺。呢家期待中英文Speaking 到時會點，我5月29考中文Speaking，6月20考英文Speaking，嘿嘿…

Fate Stay/Night in Animax

早前咪提過起電影節有Fate Stay/Night的剪輯版播放，裏面啲中文字幕譯到嚇死人，例如Archer 譯做「雅齊」、Saber譯做「榭依笆」等等，Animax終於播放，好在啲字幕全部出番原名，中文配音亦都係照讀番原名，如果真係黎雅齊榭依笆就真係媽媽聲。

有冇留意，呢期Animax好多新片已經配上廣東話，睇黎都係想主攻一啲唔係睇開動畫的普通觀眾，其實有好多觀眾都係唔鍾意聽一啲自己唔識聽的語言(英/日/韓)，所以配音節目其實一向都有市場，而最近我身邊好多唔睇開動畫的人都有走去睇Animax，有啲走去睇番龍珠同幽遊白書呢類上咗年紀的節目，暫時Animax 的Target 觀眾仍然打得幾好，

咁岩睇到，唔知有冇人講過

有晚無聊睇宣傳易，睇到呢個賣女傭Website，見到呢兩個3D 女公仔，右邊果個，覺得熟口熟面，諗起就係睇咗50集睇到媽媽聲的Eureka 7裏面的女主角Eureka，套衫真係好鬼似，尤其又係有一粒粒，個頭都似，不過個3D就比較「硬膠」化咗，反而左邊果個女公仔唔知係咪又係抄番黎，Eureka 7入面就唔見有呢個角色，不過右邊果個有90%以上似 Eureka，唔知你又覺唔覺呢。

洗錢月，玩具不斷黎

上個月真係洗錢月，每個星期都有一件玩具(但又唔見我中六合彩~_~)，首件玩具係Oregon TP391 對講機，呢件野係經HSBC 信用卡用8000分+$340換番黎，如果以番 250分=1蚊的計算方法，即係$340+$32=$372，原價呢部野話要$780，我都Search過下都係差唔多呢個價錢，所以覺得好抵(唔知有冇比佢呃呢:P)。

呢部野的確好細部，只係一張八達通咁大，叉電佢用番自己專用電，佢跟咗兩隻火牛仔用黎叉電，我一直都想買部Walkie用黎開工(Event)、旅行、行山用，之前都諗過平平地買部二三百蚊「母他老拿」，不過呢家換咗呢部番黎，總算都係咁…

另外重有三件玩具….暫時賣個關子先:P (唔係之後冇野好寫XD)，比啲Tips…比大家估下：

1. 一部電話+電子手賬+內置鍵盤+上網功能+支援HSDPA多功能集於一身…<--呢家日日出街都開住HSDPA黎上網Chatroom同Check Email (Check Email先最緊要)，非常開心
2. 一部可以令你起街上到網的地方就可以睇到屋企電視的「硬件」(當然唔係Windows Media Encoder) <--呢個暫時都幾OK，不過用到幾野火..遲下會有試用報告:P
3. 一個全球定位系統(GPS)的「記錄器」 <--呢個野，囉咗番黎之後未正式用過，因為成日都起室內收唔到GPS :P，認真玩過後再講下有咩好玩。

寫住咁多先，因為已經6:38AM了，係時候去訓下-_-

隨心回應的RSS 回應(2) 暫時未有引用通告 (0)
2007年05月07日

深圳一日遊(三)

呢次深圳一日遊主要補完上之冇去的地方，同埋去玩玩食飯。

萬象城

上次冇去到萬象城，所以今次點都要去番，只要搭地鐵去到大劇院站落車，向 C 出口方向行，經過一大段地底隊道，就會到達，可能你一路行就覺得好鬼似又一城。

好似我地幾個男丁，去又一城有咩做？一個字，「冇」，所以去萬象城，最岩睇的，就係去超市。萬象城入面有間 ole 超市(起B1層最尾)，雖然唔算大，但都幾多野買，如果你未食早餐，入去買野食，你都會有驚喜。如果你想食麵包，就要去試下 BreadTalk嗱 (B1層中間)，真係好味的。

B1層有好多不同的餐廳，肚餓就要去試下，而樓上主要都係舖頭，不過可能價錢重貴過香港買(正貨)，所以如果香港有的話(例如名牌衫/鞋)，番香港買吧。我地亦研究過入面間 ESPRIT Salon，價錢亦同香港差不多，但對呢家人仔升緊，番香港剪可能重抵，所以呢家番大陸買正牌野真係要睇住價錢。

萬象城似又一城除咗個格局似外，同樣就係有一個Roller 場，個Roller 場大過又一城果個，但價錢都唔係平，所以又係睇錢做人了，我唔識踩冰，都唔太清楚，不過呢，起大陸受傷始終冇咁好啦，尤其入院，可能除時變植物人架，所以真係要小心為上。

午餐：墨西哥餐廳塔可鐘 [劣評]

呢間野起萬象城 B1層，一由地鐵站行過黎就已經見到，墨西哥風味餐廳，佢地全日都係果個Menu，所以你Lunch或夜晚去食都係咁的價錢。

不過呢，個Menu裏面的食物款色就真係唔多，每款食物的份量亦比較細，價錢我個人覺得係貴，味道方便都算唔錯，但總活黎講，覺得比上次去食「鼎泰豐」差的，食完真係有啲不滿，差啲比我啲團友屌到媽媽聲，完全係劣評。

插曲：食完飯比錢都講價？

我地起塔可鐘食完Lunch吹緊水的時候，見到對面檯兩個大陸佬埋單，個女侍應囉張單話佢知幾銀，但個大陸佬囉小咗錢出黎，然後同個侍應講價話收平啲，跟住個女侍應即刻「變臉」，黑晒口面，再啤住條友，啤咗廿秒，條友最後先再囉埋條尾數出黎埋單，真係大陸佬就係大陸佬，冇錢就咪黎高級餐廳食野啦，真係吹啤。不過大家留意，起大陸餐廳食飯，唔興比 Tips 的，佢找錢比你，記住囉晒走。

生意探路：福民文具玩具批發市場

點解會咁攪笑去睇文具？如果你想搬一堆平文具番屋企/公司/區會用 (膠File、筆、計數機等等)，又唔介意用大陸野，呢度就係好地方。

批發市場唔係太難去，只要搭地鐵去褔民站，經出口轉去福民路一直行就到。裏面都算幾大，樓下主力賣文具，樓上主要做玩具同其他野，先講樓下，裏面真係好鬼多舖頭賣同一樣野，但個場都覺得幾靜，佢地點搵錢架呢？真係幾想知。佢有啲文具係日文牌子，不過有啲係國產牌子，重係咩「國內十大名牌」，敢唔敢用就真係嘿嘿嘿。

二樓都有一啲幾大的舖頭，有間專係賣絲帶，裏面款色多到爆，另外又有啲賣模型，雖然係「假」(翻版)，不過有啲都幾靚，但我唔保證過關捉到會唔會罰錢架 XD

體育活動：球王保齡中心

除咗買野、睇書、行街、食野，不如加設體育活動，之前提過萬象城有 Roller 場，不過又有啲難學，咁所以就介紹下大家去玩保齡。

呢間球王保齡唔係好大，有24條道AMF，覺有啲但價錢都算幾平，貴時段都係15蚊局，加$5 租鞋錢，玩一局都係$20，我地五條友有三條友從未look過鈴，兩個好耐都冇look，傻下傻下咁玩，一局都玩到一粒鐘。我地去果日港紙人仔都收，重係1對1，比港紙重抵過比人仔。

下面張相左邊果個就係我了，我係咪look得好水皮呢，最後估唔到我60分都唔到，輸到喊晒口。

呢間球王保齡都幾遠下，起華強站出閘，向華向北路方面行幾條街，經過茂業百貨，轉入去食街(華強路口巴士站)，見到北海漁村就坐對面馬路(小心車輛)，行入去就會見到。如果你地行完華強賽格六點收工，就可以行去玩番一兩局，肚餓就可以行番出食街開飯局。

高級晚餐：廚房製造

Lunch 果餐比人媽叉到暈，所以為咗補償大家的不滿，所以就去一間高級餐廳廚房製造。呢間野係中西日Fusion，你起門口已經覺得非常之高級，入到去更加高級，跟住你就會好驚個銀包好快清袋。佢地以開放式廚房設計，氣派超高級，Menu都有幾本，每本都有唔同野，一本中餐、日本野、西餐、酒等等…

我地五個人，選擇咗兩個西式 Set Menu，包括前菜、湯、主菜、甜品，Share 食的話，五條友就可以食五個款的主菜，所以都幾豐富，大家估下幾錢

法式麵包/鮮果沙拉/凱撒抄拉/波菜野菌湯

焗紐西蘭青口/法式焗蝸牛

極佳級牛排骨/檸香黑椒龍利柳/法式烤羊朳/德國豬手/酥炸鵝肝醬/海鮮雜扒 (主菜配飯/意份)

提拉米酥/香橙蛋糕/酥炸黃金朱古力/法式溫蘋果派/冰奶油杏仁凍

大家估下食呢個餐，五條友，連埋茶錢加一，再加埋呢度的派局，合共埋單幾錢？

就係… $640人民幣！除番開每人只係$128人仔，真係超級抵到爆。呢間野可以比港紙，大約對1:1.04，所以比人仔會抵好多。

地址：地鐵國貿站金光華廣場7樓2-3室(坐觀光電梯)

歡迎各位報料正野！

我地會再攪深圳地鐵團，如果你地有啲深圳吃樂玩樂推介，不坊留個舖頭名同地址(大約邊個站落車同邊個方向)比我地，我地睇落又正的話，下次就親自去玩下番黎介紹比大家一齊分享！

旅遊/觀光回應的RSS 回應(3) 暫時未有引用通告 (0)
2007年04月30日

回應…

平時我都唔會咁開個Topic講comment reply，不過為咗證明係我寫…所以開個 Topic 講。岩岩忙完番黎，望下個blog，就發現 Willy 的回應。

我睇極都唔明講乜，尤其「傳媒人」，我諗咗好耐，跟住就試下望番 log 睇下啦，就發現咗黎自佢個blog 某一個 Topic ，終於真相大白。原來有人扮我起 Willy個blog post 咗呢段野，重留埋個網址，呢家明白發生乜事了。

「本人僅止聲明，呢個comments 唔係我寫的。」

老實講，我唔會起人地d blog 踩場留自己個網址的，不過真係多謝 Willy 你睇我的blog，小弟的blog 都只係將平時生活無聊野寫出黎。我之前亦有睇過你個blog，blog就係一樣有趣的野，有時候唔覺意就會 click 到入黎….

不過講起「傳媒人」，我以前(96年)，曾經起香港某份「食得」的報章有個專欄，主要都係寫Internet News (其實係呃稿費)，後來有一啲原因離開咗，之後亦曾經在某雜誌、某網站都寫過稿繼續呃稿費，當年寫Internet的野，都算係吃香(試想下你起邊年上網？)，所以稿費真係好吸引 (曾經試過寫四份稿[一星期一份]，可以達五位數字)，不過後來科網爆破，稿費急跌…跌…跌到原本以「蚊」做單位跌到去「仙」做單位，另外計算方法亦由以前「字」做單位到呢家「頁」做單位，就算你多字小字，多圖小圖，都已經係不值錢了，最後我亦離開寫稿佬生活….

所以如果有留心，有時候我寫果啲野，其實都有一啲雜誌文筆的影子(除咗廣東話啦)，我真係寫稿都會盡量寫番書面語唔寫咁多白話。

如果你有睇開「老母」廣場，裏面將 D blog 變為一個專欄，吹下水，發下up風，重慘過睇報章文采版，可能睇到你屌屌聲，但其實我以前都係呢類人。

跟住講下 M 的Comments：

講下火原先，首先我之前係唔識有呢套「金色的琴弦」，係自從睇咗動畫之後，先知有呢套野，跟住就覺得火原好可愛，所以game 就想溝佢了 (信不信由你 XD) ，但土埔我都覺得幾型架 XD。

跟住講下啲字，blog 啲圖張張我都係搵Photoshop 整過晒再加Credit架，所以寫一個blog 我都用好多時間去處理啲圖，尤其多圖或者係專題介紹，近期我做埋地圖，都係我親手畫的(不過有啲當然係跟住個稿重新畫啦:P)

我覺得金琴2都唔係太難玩，不過要玩爆咁多個結局同 100% CG 就要花啲心機(對我黎講係冇可能 )，但我已經達到目的，就係成功溝到火原同土埔(兩個都爆燈)。

我覺得買琴譜要睇住時候黎買，一來要睇住自己個Level，自己Level練番果個Level 的琴譜會升得最快，練低過自己Level的琴譜，升的數值會不斷減少，另外亦要留意你啲「好朋友」練琴譜，有時候你啲「好朋友」已經練晒你手上啲琴譜就會得閒冇野做，浪費晒啲時間，所以要成日monitor 住佢地。尤其到最尾，我玩到的情況係我想佢地出場的朋友，唔夠Level 去練啲歌，攪到要去買番啲舊樂譜同埋不斷用道具再私下練習，幫佢谷番夠Level出場。

由於金琴2啲時間有限，所以呢要去多啲莉莉度買道具，盡量谷快啲，唔好浪費每一個練習，同埋我suggest 集體練習最好係起每日放學第一次練習機會去練，因為有時候佢地咪會鬧交，如果第一次練習就鬧交，第二同第三次練習就可以即刻搵佢地私下練，咁就可以即日和解，越快和解就唔會因為第二日的事hold住你。