新 BLOG - 2008 放眼世界

又繼續Blog債時候…

始まりのヒト/バーテンダー

近期發覺，原來我有一年冇講過同音樂有關的Blog，所以都要無無聊講兩句，最近真係汁都Load埋，連Bartender 都有睇，裏面的OP/ED細碟Natural High 的「始まりのヒト/バーテンダー」的確幾好聽(唔好Google 錯網站XD)，日本太多歌星，有時真係識唔晒，另一樣就係太出名果啲呢家欠缺驚喜，有時真係聽多啲/認識其他歌手作品，好過來來去去都係濱XX、宇XXX、BXA、MoXXXXg娘呢啲…

如果你問我「Bartender 好唔好睇？」，我就會問番你轉頭「蟲師好唔好睇？」。

以後會寫多啲好聽的歌Blog。

Suica + Passnet = PASMO

之前去東京，身上起碼要袋住Suica卡同Passnet飛，呢家終於可以改寫了，日本仔果邊終於傾掂數，出張叫PASMO卡，除咗可以搭埋私鐵外，巴士都OK，另外Pasmo 亦會同 Suica 共通，即係事彈一張卡就可以攪掂晒，好在我張Suica重起銀包，3月18日起就可以用得了！想知邊啲車搭得，可以去 PASMO網站睇下，如果你主要都係東京圈同近交的話，都包保OK。

繼陳志雲話抽起唔會再播東華Yumiko甩褲片段但又起自家娛樂新聞台無刪剪翻播外，TVB新聞又起2006大事回顧入面，再次播出三號風球派比安垃圾筒KO女人片段，呢家啲傳媒真係冇面比！

金色的琴弦 (金色のコルダ)

最近同音樂有關的節目都人氣急升，首選的當然係交響情人夢，高收視之餘，呢個月11號更會推出動畫版，男女主角有關智一同川澄綾子，極高Cast。另一套帶起的就係由漫畫同遊戲都有推出的戀愛故事/遊戲金色的琴弦 (金色のコルダ)，不過今次就試下玩隻 PC Game 版本，玩法都幾有趣，但玩玩下都有啲悶。

我一向都唔鍾意玩呢類戀愛 SLG 遊戲，而且重係勁水皮果隻！更可以用「奇差」黎形容。隻Game 一邊又要搵樂譜，又要練習，又要周街比演，又要買Item，當然唔少得最重要的「溝仔」！所以玩完最後係輸晒，一條仔都溝唔到 XD。不過真係幾好笑，當個主角理解能力低的時候，演奏真係好難聽，走音之如，個畫面重有一堆 ^*@&^&*@ ，睇見都忍唔住想笑。另外，3月15日重會推出金色的琴弦2 PS2版本，繼續添食落去！不過Website 重未有介紹隻Game會點玩法，到時先算。

Ys Origin

Falcom 真係好賤，伊蘇出極都有，呢次重玩埋前傳，個主角終於唔再係Adol，不過今次個故事就起晒個「白色巨塔」入面，好似玩緊Persona3 咁XD，不斷每層上。呢集個故事講乜就去呢度睇啦， 無謂講，畫面方面由於都係用番之前Ys6個Engine，畫面係OK靚，不過啲敵人同大佬暫時都算易打，就算你唔夠打，出去升番兩三個Level 就肯定夠打，同普通RPG 打法冇咩分別 XD。由於聖誕「休戰」，呢家只係打到第三個大佬「轉轉機械甩手怪」，暫時要升番一兩個Level 先夠打大佬。另外比一個Tips大家，得閒無野做的時候，可以長期戴住個「敵人隱形面具」周圍打下，你會無意中發現一兩三個隱形寶箱的。 

Shopping

聖誕期間收到 U2 寄黎又有 Private Sales，咁咪去望下啦。點之今年真係經濟好咗，有7折至5折的衫係小咗好多，早一兩年係大部份都有7折，呢家係得果三四五件先有，而且自從U2用番 G2000個名黎賣之後，男裝衫係縮咗水，小咗一半有多，越黎越難揀，不過都好彩買咗條褲(折咗$17X)，平過Uniqlo(折咗都要$200起)。我 比較喜歡去Private Sales，一來人小啲，冇好似平時Big Sales咁師奶狂搶貨，另外就係買褲會足碼，我試過Big Sales去買褲，條條都斷碼，最後一條都買唔到，所以Private Sales 有呢樣好，當然折頭就小啲啦，但都好過冇。

另外就係有次去IKEA(我的至愛)，見到呢張新Product檯，咁都要賣$860，IKEA 啲價錢每次都令我有「驚喜」，另外起兒童部見到呢隻「馬」，用黎Cosplay啲Online Game 真係好正，不過我諗唔到有咩角色，一係我自創一個出黎。

KIDNAPPED

上一季動畫真係套套爛到冇朋友，07年頭果啲更屌屌聲，所以開始轉煲劇集，日劇都睇咗交響情人夢、母親14歲同地獄少女，後尾連 Prison Break 成個Season 1 煲晒，呢家煲緊Season 2，岩岩重開始起 AXN 追 KIDNAPPED，呢個月 Prison Break 同 24都會有新季，所以更有排追。

Prison Break 的確幾好睇，我以前都有睇開 CSI，但睇咗四個Season之後，真係悶到頂唔順冇再睇，Survivor 、 Amazing Race 同 The Apprentice都有追過，但又係頂唔順了，原本都有睇過幾集 House Season 1，但後尾又爛咗冇再睇，覺得都係要睇連續劇先有心機追，每集單完故事好在係Miss 咗一集都冇問題，但睇得多，來來去去都係咁頭咁尾，就已經覺得好公式化，就好似 CSI 咁睇極都係咁，開始已經頂唔順，再加上一拆三，整埋 New York 同 Miami，一個遊戲三個玩法，真係頂唔順 X 3 。

不 過係我對外國電視劇的認識真係小中之小，有時都唔知邊套好睇邊套唔好睇，另一樣係香港本地電視台播的外國電視劇真係唔多，有時播極都係果幾套出名，所以 AXN 起香港都幾多觀眾，自從 Sony 起亞洲區開 Animax 之後， AXN 就摺咗動畫呢個Section主力攪好劇集，佢呢家播的電視劇好多都係新播的，好似呢家呢套 KIDNAPPED 就係岩岩 NBC 先播完一季 ，真係快過 TVB/ATV (好似又叉開話題)。

待續…(我已經盡量寫多啲字，廢事又比人話我好似壹仔咁字多過圖)，另外起新一年祝大家斷線/龜速快樂。

 隨心  回應的RSS 按此回應  暫時未有引用通告   (0)
2007年01月04日

由於聖誕檔期趕Job，新年要出街，所以話之地震斷六親都唔得閒理，呢家岩岩清完一個Job終於可以偷得半日清閒，所以就要清下Blog。

24通消老麥廣告

以前全港都有幾間通消老麥，後來摺到得番三間，呢家係咪因為經濟好咗，多咗人出夜街唔番屋企，又見啲24茶餐廳同幾夜都有咖啡店都有得做，都所以大推廿四老麥。

廿四老麥最難應付就係啲街頭露宿者，佢地入晒黎過夜，風涼水冷，而且重有人地食剩的薯條充 飢，簡直唔休食，又唔洗交租，抵到爆！再加上「老麥精神，唔會趕人」，坐足四十八小時都冇人理你，所以老麥真係好正。不過，老麥啲野食真係貴到嚇死人，我 都係早兩日先知熱香餅早餐冇咗個薯餅-_-(好耐冇食)，有次就試咗個通心粉，真係好唔掂，冇聞冇味，重衰過茶餐廳。不過果日先發現，老麥Menu個架， 以前係打開個框黎換Menu架嘛，呢家轉咗係「轉」出黎，好攪野，真係唔望住佢地「轉」都冇為意。 

另一樣更攪笑係老麥廣告個「月亮人」，好似武裝練金入面果個Moon！極為笑爆。

刷紙膠都要賣電視廣告？

鉛子筆賣電視廣告就見唔少，刷紙膠都要賣廣告？呢次重搵埋Purple 姐姐出黎同舊刷紙膠唱歌跳舞，真係有冇錢賺架？睇完都想笑下。

新聞台賣廣告

呢期有線「最前線」廣告賣到街知巷聞，跟住無意中睇亞視佢又整個「企人牆」廣告，真係服咗亞視，不過呢，有線呢個「企在最前線」廣告有幾多個版本呢，唔知我儲唔儲得晒呢？

PS: 「大家姐」上個星期聖誕假期誕下男孩，恭喜。 

比華利山廣告

樓盤廣告以前睇開，都係講一堆無關係的廢話，然後突然間就會影住座樓盤再講埋個名出黎，有時好似啲結婚廣告咁，有時就似旅遊廣告，真係睇時都唔知佢賣乜。不 過今次呢個比華利山真係好攪野，搵成十個風水叔叔出黎企起度Hard Sell呢度有「山富人肥」，當然呢度尺價就嚇死你啦，不過岩岩山頂賣地賣得咁好成績，呢個「比華利山」當然唔洗比面，坐地起價。

不過呢，睇完呢個廣告就發現，啲風水叔叔係咁講住呢度會搵大錢發大財，但如果入到去住之後破產咁點先？告個樓盤廣告失實？另外，個廣告唔見早期人氣急升的蘇民峰，唔通佢果「派」風水命理起果度係陰盤？不如搵蘇叔叔入去睇下比啲意見 XD。

補習社廣告

呢家補習社比以前更難經營，現代廣告真係幾年都重係咁 Style，簡體字再加上懶係”In”，我都開始覺得有啲老土…。

以前讀書時代已經有補習，由中三開始補過現代，跟住轉過去英皇，當時候現代我補過數學(W Lee)，英文(曾經過上Ken&Roger)、Geog(Linda Lau)，英皇補過數學、英文同Econ(唔太記得啲名)。以當年(無謂講幾時，咁咪知我幾歲XD)黎計，以我補過的黎計， Geog 的Linda Lau真係算教得好，W Lee 都好，Ken&Roger 當年太過「名師」過頭，反而覺得「吹水」多過頭，後尾所以去咗英皇…。數學都過咗去英皇，揀咗一個唔出名的Tutor，因為佢由 Form 4 由頭教過晒，我啲數學真係好鬼屎架，所以佢由頭教過晒我真係學過晒打好個底，所以最後會考出黎，數學係最高分D7，Account就囉D8，其他..咪 EEEEFFFF咁囉….總之最高分已經係數學 。

返回正題(又叉開晒:P)，我果時都冇咁多補習學校出黎，呢家多到爆，而且由於出生率下降，中學都已經開始縮班，過多兩三年會考人數會不斷減少，到時更加難 爭。以前風光時代，睇 Video 上堂啲學生都肯制，呢家個個要求高咗，已經話睇 Video 錄播都唔得，所以今時唔同往日，廣告囉卓頭都好緊要。
不過做補習都可以發達架，你睇下Ken就知，連原本起皇仁教開書的Burce都轉去做補習，真係做補習好過做教師，起碼壓力冇起學校咁大。不過當然，果年Tip唔中題目下年就會「大檸樂」。

待續….送你一個廣告 Screen Cap…

 隨心  回應的RSS 回應(1)  暫時未有引用通告   (0)
2007年01月04日

早排無意中發現 Smartone 新加了「24小時中文視像新聞」 ，初頭睇以為是 TVB 的 Live Streaming，但原來只係滾筒式將新聞、娛樂、財經、國際、體育新聞不斷重覆又重覆咁播放，每次滾筒，都係播番同一條新聞，重衰過自己揀黎睇，當然比當年 ATV24 的重讀新聞更衰 -.- (Just for fun) 。

佢裏面滾筒的新聞，又唔係最 Latest 果條News (可能係果段時間的重點新聞)，但每次都係滾番同一條，咁嘅情況下，比我我都係會Click入去每個Section，每條睇算，雖然滾筒播放係可以一次過睇晒多方面的內容，但每次滾筒都重係同一條新聞，即係佢的設計係預計觀眾每次睇Video的時間係 10分鐘內，所以就設計成咁。

用電話睇News，我覺得係會有以下情況：

• 平時搭車悶消磨時間
• 收工時冇野做搭車睇新聞
• 起公司食Lunch/偷懶時搵野睇下
• 聽到人地講有單新聞，就開黎睇下

而睇News 的喜好，我覺得又會有呢D情況：

• 隨意睇下，都係消磨時間搵野睇/聽下
• 只想睇某一類新聞 (例如港聞）
• 只想睇最新發生的新聞事件
• 每一類新聞都想知兩三條

佢呢家咁設計，就適合「每樣都想知啲」嘅觀眾，但時間太短，因為每一個 Cycle大約只係5-7分鐘時間，即係上車冇耐就睇完一圈。如果係想不斷睇的話，用者就要不斷咁禁每條 News 揀黎睇。

不過如果佢咁整的話，我建議佢地不如再分類，每一類都有一個 Streaming，將最新果十條 News 放入 Streaming 滾筒播放，咁可以唔洗每條 News Click黎睇，比較方便，而且亦可以方便消磨時間，方便不同類型的觀眾。又或者改良滾筒，每次滾筒都播不同的內容，這樣我都喜歡。唔做Streaming 嘅話，改為 Playlist都得架(不過呢樣我唔知係咪部部機都可以做到 Support playlist)。

我當然明白點解唔可以直接 Live Stream TVBN (版權問題，尤其體育新聞)， CableTV 呢家就做到 “BAR” 咗個畫面(起畫面右角加上三粒顏色，當軟件Detect到果三個位置係呢三隻顏色，就會即時將畫面”BAR”咗)，所以 Online 版及3都可以做到Live Streaming，但 TVB 暫時未做到。不過其實佢改良到，唔洗下下咁禁每條News睇，我都好滿意。

 隨心  回應的RSS 按此回應  暫時未有引用通告   (0)
2006年12月23日

今年我又攪攪新意思，送一張聖誕卡比大家～

製作後記….

 隨心  回應的RSS 按此回應  暫時未有引用通告   (2)
2006年12月21日

突然間收到報料人士爆出，TXB 新聞之花豬豬(化名)上星期六遞信辭職，詳細消息未明，但有來自非正式傳聞指今次豬豬(化名)係一氣之下補錢即走，所以離開消息係突如其來咁急。

如果豬豬(化名)有興趣的話可以過檔「最前線」新聞台，佢地呢排請兩個記者，不過呢期「最前線」主播陰盛陽衰，得一個男主播(不計體育部門)，但如果豬豬(化名)過去的話，效應可能比起地鐵賣全車廣告谷「超越事實最前線」更好。

 隨心  回應的RSS 按此回應  暫時未有引用通告   (0)
2006年12月18日

一年前的呢幾日，你重記唔記得發生咗啲咩大事，就係 WTO 了…..你重記得一班南韓的示威者起香港倒亂放火嘛…….？

估唔到一年後，香港人可以為咗天星碼頭呢一個「集體回憶」的事物，可以做出呢啲行為，情況就越黎越似 WTO 的情況…示威一次比一次惡化咁，睇下幾時香港人惡到霸晒成條街要差佬放催淚彈同出動防暴警察拉人。

人就係好得意，佢一直起度的時候，你就當佢冇到，但當果樣野唔存在後，大家先會開始諗起佢的重要性。呢個世界所有野都會有新，放得耐就自然舊，舊咗你又想留起佢，又唔想掉咗佢，跟住就越儲越多，儲到成間屋都係「垃圾」，最後就好似新聞賣出黎果啲屋企雜物推到去天花板再發出臭味的怪住客。可能你呢家屋企就係咁，你自己都儲埋儲埋一堆野唔願掉。

「舊啲唔去，新嘅唔黎」，如果你覺得每一樣嘅都要集體回憶的話，咁即係香港乜鬼舊樓舊建築都唔拆得，呢家就話天星碼頭，下次就話灣仔舊樓，跟住再話尖咀鐘樓等等，咁不如香港變番六七十年代嘅漁港咁，唔洗去變的了，因為成個香港裏面一草一物，都係「集體回憶」。

不過香港人又有另一個特點，就係貪新忘舊，就算你呢家保留咗，好快你已經會遺忘佢，因為香港每一日都有新鮮事物。就好似新聞裏面的頭條，一年半載大家又會唔記得，舉個例，可能下年你已經唔記得有歌星起現場節目甩褲咁。所以我認為，利用「集體回憶」作為小部份人的私利是不正確的，而且呢家呢班友仔攪到自己好似一個爛仔咁，有損市容。

呢家鐘樓都拆咗，孫公都話「講黎都太遲」，不過呢件事又反映咗五年黎政府的處事方法仍然係好守舊，就好似當年老董咁，岩聽嘅佢就聽，唔岩聽嘅就當聽唔到，視而不見，聽而不聞。其實政府係咪想每次都要睇見有幾十萬人上街，先識得聰明啲，又話聽到市民的訴求等等。但如果追索番去呢幾年，政府自稱已經做足諮詢，但聽咗就算數咁，呢啲做法根本唔健康，不過呢家唐生就聰明咗了，GST太多人反對都自己主動摺埋，其他官員真係要醒小小，EQ咁低，民望自然低。雖然呢家政府後知後覺地話會起另一個地方保留鐘樓，都已算係咁的了，「保留鐘樓」同「原址保留鐘樓」，原址係咪真係咁重要呢？

但大家已經忘記了，保留是一個問題，保留後亦是一個問題。誰管理鐘樓？鐘樓只係一件古董還是仍然會運作及響？如果響的話，原址響的話，是否會和新鐘樓一齊響(撞聲)，誰負責保養問題？等等….所以諗野要全面，唔係好似只係諗頭唔諗尾，係咪都走出黎叫咗先，但又唔諗往後的事，覺得呢樣「虎頭蛇尾」就係香港人做野嘅特徵。

 隨心  回應的RSS 按此回應  引用通告(4)   (1)
2006年12月16日

為了讓喜歡動畫的網民可「集體回憶」2006 播放之動畫及歌曲，本 Blog 無無聊聊下攪一個「2006 十大我最喜愛動畫歌曲選舉」。

 動畫與漫畫, 隨心  回應的RSS 回應(1)  暫時未有引用通告   (0)
2006年12月14日