新 BLOG - 2008 放眼世界

今夜真難忘，於「港娛國際控股集團」十年大會中，一晚內，見到港娛十年來經典人物，而且有些重係外國遠度回來。不過我真係識唔晒咁多個港娛經典人物，主要係因為我唔係第一代港娛人物，當年(1996)我起Newgroups的時間又唔多。問親啲外國番黎的網友，個個都係話因為機票平先番黎，但下星期又番過去了…..不過好多網友都變咗，例如嵐，唔認得了….(me too，企理一黎話我blog張相都唔係咁：p)，最有趣就係，原來有個有影開Cosplay的，就係斑紋。

估唔到會見到Bird，因為冇聽過話佢會黎，佢呢家又起馬來西亞繼續再戰通訊界。不過咁耐我都重未去過Bird屋企食私房菜，冇法，大家都係IT大忙人，佢有佢忙(飛黎飛去)，我有我忙(讀書工作同埋訓)。Bird真係好睇得起我，佢96年已經介紹我去佢公司(當年香港三大做Web公司之一)做暑期工，果晚都重有提起呢件事，真係鳴謝。

當然要曬下見到mocasting 老細(企理)啦：X ，重即場向他Repot Bugs添：P 。難得見到呢期紅人，咁緊係要同佢傾下生意經，同埋八掛下佢公司的近況。他預告好快mocasting 主頁會大改，期待中 ：P

重見到好多其他老友，Vincent、47、嵐、癲、骨、Jan、Joe、ball、飛天、敵等等唔知重有乜名。大談工作及生活，謝謝關心。

不過我可能老了，飲兩支青島就已經醉下醉下，最後飲左三支就已經倒地：X

PS：黎唔到的某某君同Claim 緊交通傷亡基金的偶偶君真係走寶。

PS2：港娛個個番黎，但笨蛋台就開始走佬潮，個個開始失蹤/發展，繼 fee 離家出走去咗奧利地，跟住又到 ken 仔上個月去完Turkey之後呢個月去咗法國睇暴動，今朝已經話去咗倫敦睇大笨鐘….

 隨心  回應的RSS 回應(6)  暫時未有引用通告   (1)
2005年11月13日

哈哈，香港寬頻打黎，話我因為長期使用香港寬頻的服務，呢家話我列入專上客戶名單，跟住就即刻介紹咗個家居電話優惠比我，話第一年$58第二年$78平均$64。我話，我申請咗轉台o拿播！跟住電話中職員後尾望番電腦，發現已經申請咗過台，咁就去介紹數碼電視優惠，頭半年$28，後半年$88平均$68。跟住我話：我會CUT的了。

個職員呆咗………

個職員問：做乜用得好好地要CUT？
我話：我轉咗去NOWTV了。NOWTV 收我$21蚊冇最低消費冇租解碼器費….

職員：但我地有七十個台播。
我：但我只係睇一個台咋播。
職員：我地68蚊有七十個台，你呢家廿蚊先睇到一個台咋播。
我：但我睇一個台，$68除1咪即係$68蚊睇一個台，所以我會CUT。

再互屌期間，我話佢地客戶服務好差。Download唔到首歌個半月都Solve唔到我，重要收我錢再收埋附加費，最後只係叫我打另一個電話去問。我話我打得到去搵佢地就唔洗個半月個個星期打黎問啦。個職員話可以再跟進番個Case，我話唔洗跟進了，半年前首歌，你呢家會唔會再Download丫，唔好話半年，個半月都冇咗興趣啦，重要囉黎煩。

跟住佢話，我地的客戶服務會不斷提升，會盡快處理我的問題。我問佢咁我呢家專上客戶，係咪有另一個客戶電話號碼，會優先處理客戶的問題？佢答：專上客戶係提供特別優惠比長期客戶。咁我有幾專上？

跟住我話我只係睇動畫同新聞台，佢就話佢地有新聞台，我即時話你地個新聞台同 Cable比，真係天壤之別，邊有得比。佢話我地新聞台每半小時update架，我即刻話：半小時錄影丫嘛！

跟住講到有線，佢話有線貴，我又唔睇波，唔抵睇。我話但人地質素同你個新聞台差好遠播！跟住佢就話多個選擇丫嘛，我地有好多台都有動畫節目架，你呢排有冇睇「銀河少女警察」丫。我話我呢家裝咗NOWTV都睇到拿播。佢跟住話我地資訊台呢家有個醫療節目，我話我唔睇。佢跟住又話有鳳皇衛視資訊台，我話Cable同NOWTV都有。跟住又話有韓劇，我話我唔睇…..

互屌咗三個字之後….

後尾我話：都係果句，$68貴過NOWTV，所以我裝咗NOWTV會CUT。佢又話但有七十個台「多個選擇」。重不停好強調多個選擇…，後尾我頂佢唔順，我讓一步，我話如果你地平過NOW 21蚊我會考慮下。佢話我地呢家暫時只係得呢個優惠，我話：咁我下個月會FAX 番份FORM 黎CUT的了。佢最後話…我地遲下再有優惠再打比你啦。

 隨心  回應的RSS 按此回應  暫時未有引用通告   (0)
2005年11月09日

【本Blog訊】有調查發現，本網站內容的質素一直下降，內容亦經常開「空頭支票」，例如 HiME 26特典及配音Blog等，一直都未在本Blog出現，而動畫Blog內容越黎越搵笨，有見特此，本Blog記者特別訪問了本Blog主持人小新（右圖相中人），讓他解說一下。

記－記者　　新－小新

記：呢排啲Blog真係不定期，尤其HiME同麵包王，成日都遲成個幾星期，最近忙乜？
新：最近主要都係忙Assignment、Test、番學同埋公司野，一星期都有五日要上堂，成身散晒架！所以有時候根本冇時間寫Blog，同埋有時間都想用黎訓覺。

記：最近你啲Blog開空頭支票播，你點解釋？
新：其實都唔係唔想講，HiME26特典我想留番CableTV播咗第26集先講，呢家咁快貼啲圖上黎，叫你唔好Click 黎睇，你咪一樣Click！所以留番遲啲先放出黎。保證有！至於配音，其實我已經番咗幾個月，不過呢兩個星期因為有啲辛苦（個人問題，把聲去唔到咁高音，同埋唔係好識用聲同氣，發埋好多假聲），呢個星期要配武俠片添，我真係嘔血的了。教我果個導師(暫時唔方便講係邊個)，都話我對咀好咗好多的了，不過時候都會講得快咗，尤其配啲韓國同台灣片，佢地啲對白UP得好鬼快。我遲下會寫番一個Blog 講番呢幾個月學咗啲乜，識我的朋友都可能留意到我已經盡量改善自己啲懶音，例如中「國」、不「過」等等，之前我貼過一篇「黃巷之狗」，其實就係其中一個練習教材黎。

記：有調查話你個Blog內容質素下降，尤其係動畫果啲「每集一Blog」，你點回應？
新：我認…其實係..寫法改變咗。之前寫法係好似內容介紹咁，但其實你睇咗的話，都知果啲內容架啦，所以呢家真係想寫番啲 “Comments” (意見) 出黎，所以字數小咗，至於圖片方面，因為唔想 Cap 得太多(處理時間)，另外就係，唔想比圖片變咗主導文字輔助，所以減少咗圖片數目。我最近已經將文章分類再編排過，另外就係，我會有時間寫多啲「專題探討」，增加內容的可讀性。

記：傳聞話你可能會轉下個Blog Layout 播，可否透露下？
新：計劃緊姐，因為呢個Blog都有半年了，我起寫呢個Blog 初初果時，有人話我好快會放棄，但我自己都估唔到，寫寫下就半年了。我覺得原來寫Blog都幾有趣，同以前寫稿好唔同，以前寫稿，好多時都要就住就住，同埋限死咗一定要寫果啲題材，Blog就唔同，寫乜都得。當然，寫稿就係搵錢，寫Blog就係貼錢(時間)，不過，我都相信有恆心的話，我會繼續寫落去的。起碼原來真係有人睇呢個Blog。

記：你話真係有人睇呢個Blog，可否講下有幾多人睇過？
新：實際數字就唔想透露了，獻醜咩，不過可以話你知，都有五個位數字的…

記：好耐冇聽過你關於Cosplay啲野咋播，其實點解你會無端端走去Cosplay？
新：其實，我以前係影開 Cosplay，不過影影下，覺得Cosplay幾好玩，可以扮演自己鍾意的動畫人物，咁我就覺得，自己可以出一份力，為Cosplay界打一支針，咁所以我就起上年８月開始試下去Cosplay，到呢家為止，雖然我只係Cos到三個角色，但我覺得每次都係一個挑戰，我一來唔係專業Cosplayer，每次我都要面對各種唔同的問題，例如服裝、道具、金錢等等(錢原來係最重要-_-)，但起碼每次都可以Cos 到自己喜歡的人物。每次都係一次新的挑戰。

記：咁你下次會Cos邊個？講黎聽下丫？
新：我計劃緊12月ACG 會 Cos Cluster Edge 裏面其中一個角色，呢家仍然係Plan 緊，一來係要儲錢，服裝係一樣最大的支出，搵師父做一套衫，起碼幾百蚊，我估計緊呢次呢套差唔多要做六、七百蚊，所以都幾「甘」架，另外就係假頭髮，我成日都有啲心理關口，就係戴個黃色假髮，同埋唔係好知去邊度買。不過我會Try my best ，希望趕及12月ACG啦。

記：你有冇啲乜野想同大家講下？
新：我想借呢個機會，同有睇我呢個Blog同起度留「迴響」的網友們講多謝，有你地，我先有動力繼續寫個Blog，好似好假咁，咁但係，其實呢度可以係一個溝通的橋樑。正如我以前起報紙雜誌寫稿，就只係有我寫冇你講，呢家科技進步，大家可以借機會溝通下，又可以插下我啲錯處，我的意見只係我的意見，你有你的意見，大家討論下，先有進步。就好似……….(編按：下刪一千字)

記：今日真係好多謝小新同我地做呢個訪問，我知你聽晚重要測驗，你努力啲呀！
新：謝謝，你都知我懶架啦，唔懶的話，點會同你咁得閒做呢個訪問丫，哈哈哈哈！

 隨心  回應的RSS 按此回應  暫時未有引用通告   (0)
2005年11月07日

尋日裝咗 NOW BBTV (o下? #1) ，原本申請時只係買咗一個Animax台 (o下 #2) ，咁諗住呢家即時裝埋 NOW ATV 24 (#3) 。咁當我睇爆晒今日的免費觀看時段，跟住禁 ENTER 訂購，訂購後， ATV 24 台畫面黑晒冇野睇，其他台都睇到，咁諗住佢未即時 Update 到啦，咁今日再開，睇到播，一分鐘後，畫面就 PAUSE 咗了..再轉台再睇，一分鐘又 PAUSE 咗，再轉多次，又係黑晒了…….

跟住打去 NOWBBTV CS ，飛咗去一個Technical Staff，佢叫我 Power Off 再開，唔得，跟住Reset Decoder 再開，都唔得，咁就約咗聽日師父上黎睇。

再跟住個Technical CS 話我只係裝咗兩個台，問我知唔知呢家有買一送一優惠，我話：我唔會再買台，我已經睇緊有線電視同香港寬頻電視，呢個係第三個收費電視。(Technical 都Sales 我?…..)

尋日上黎裝個兩個師父都屌晒鬼，我屋企電話用緊香港寬頻(12月會轉番PCCW)，上網用緊 Cyber Express 3MB (PCCW線)，個師父屌話咁都簽我張單:X，佢地要起屋外搵條線入黎獨立用黎睇NOWTV，因為唔可以用番 Cyber Express 果條電話線，要另外搵條，到12月頭電話線搬番去 PCCW 又屌過:X 不過NOWBBTV 個Decoder 幾好，有兩組 AV OUT + SVIDEO OUT ，好過HKBNTV 我最舊果隻，乜撚都冇，畫面又差。

點解電話會轉番PCCW?.. 因為HKBN 個續約 Plan 收我$108，但 PCCW Sales 我，包 VAS 都唔洗$70(唔係除出黎的平均數)，簽一年約，死未……..所以咪轉番 PCCW 囉。

#1：我相信全港都唔係有好多人會一間屋企裝咗有線電視($278)、香港寬頻電視($88)同NOW寬頻電視($46, 三個都要比錢，唔係送)，如果我裝埋 SuperSUN 就真係齊晒=.=;;; NOW BBTV 呢家呢個「其他電視客戶個買一個台免解碼器費用同冇最低消費」的Promotion 我相信冇得再平，而我只係想睇 Animax (#2)，所以就打去Apply。

#2：點解裝Animax?唔係已經睇緊拿咩? 係…我香港寬頻電視已經睇到，但因為 1. 下年1月到期, 2. 只係得Animax 睇得下(其他台，心照啦) 3. 月費太貴，我相信下年1月到期會加我月費，我HKBNTV 由$8/month 睇到呢家 $88/month，如果$88/month 睇一個我值得睇的台，太貴。所以我諗過當完約就會轉番 CableTV 睇($32/month)。咁但係呢家NOWBBTV $21/month ，又冇其他Charge，如果一年完咗佢要限我最低消費 $67的話，咪 CUT 囉。

#3：點解裝 ATV24？親中台黎架播(#4)。我係一個好鍾意睇新聞台的怪人:X ，我一直都想裝 ATV24 (HKBN NEWS 24 我由佢開台屌到佢呢家，可參看呢個Blog;X) ，我諗過等 HKBNTV 下年一月完咗先買番，但係ATV24一買就12個月約，同 Animax一樣，如果我唔同時間買，咁12個月就會唔同時間完，CUT 的話就會好唔方便，諗過先後，都係決定買番啦，咁起碼同一個月完，價錢唔靚咪 CUT 囉。點之一訂就玩炒咗個台，我覺得，好明顯係 Bugs 黎，個解碼器就認到有Subscribe，所以就冇Show 叫你訂台果條Bar，但System 就認唔到，所以就Block 咗畫面。

#4 亞視「親中」新聞台呢樣，都算係公開的秘密:X ，呢家新聞報道，我睇見每日 TVB 630 已經係「屌」字了。D 資深主播都走晒，尤其男主播，呢家叫得番指手李殝叫見得下人，其他只可以用「唉」字形容。我呢家睇 News 好多時只會睇新聞二台，NOW24 呢家未真正睇過，唔比 Comments (雖然都聽唔少)， 李X庭都番咗有線娛樂台了，HKBN 香港新聞台心照啦， TVB NEWS 24 …er… OK 啦 -.-;;

 隨心  回應的RSS 按此回應  暫時未有引用通告   (0)
2005年11月03日

今日由於要買隻 USB HDD ，起「超市」內，揀咗好多隻，原本諗住買隻 1394 + USB2 ，但諗諗下，不如買隻有 LAN 的試下玩下，有時可以方便出客度用時用LAN 都得，方便過插 1394 (唔係一定有)，而隻野亦都有 USB2 ，所以應該會幾好呱。

呢隻野，幾過癮，SAMBA + FTP 都可以各自set account 同password，但如果用Lan 的話，只可以Support FAT32 ，如果只係用USB的話，用咩都得，同埋係可以 LAN + USB2 一齊插，不過一齊插晒的話，就用唔到 Web Management同 Tools ，但Access 仍然冇問題。

實際 Speed未真正Test過，因為只係得隻20GB 插落去試下用唔用到，啲 HDD 要聽日先真正試到，但如果真係囉黎做File Server 同 FTP Server，真係幾方便下，同埋價錢只係$499 (當然唔包 HDD 啦！)

 隨心  回應的RSS 回應(1)  暫時未有引用通告   (0)
2005年10月30日

10月尾11月就係Sem中尾季，一堆功課同Project都會殺到埋黎的時候，現在正忙於對付Data Engineering 的功課，計Binary Search 計到傻傻地，最後用咗兩日同寫咗隻Program仔去推咗呢條 Formula 出黎-.-;;;

都重要係唔知岩唔岩，可能呢排用得多計數機，我果部用咗十年的3900計數機(中一、二用到呢家)，爛咗粒 = 制…..局住要買過部，因為下下星期就 Quiz了，Exam 都要用，但…我唔識用呢家D 新計數機，所以呢家起Yahoo 拍賣場 Bid 緊部3900番黎

早兩日去睇e生，皮膚有D問題，點之睇完話有菌，呢家比咗一堆藥膏我，唔同藥膏茶唔同部位，同埋有包藥，但包藥好勁，一食就訓著，重勁過安眠藥，尋日上堂前一食，成堂訓著咗-.-;;

由於呢排太忙，未有時間Cap圖整Blog….下星期會有兩三日空閒啲… 讀書就係咁的了…………………

 隨心  回應的RSS 按此回應  暫時未有引用通告   (0)

序：因為寫咗二千幾字，睇就自己Click 入去慢慢睇了…
如有錯漏，歡迎指點。

前言：拍賣網站在香港都算成為部份網民生活的一部份，有人在網站賣家產，有人做生意，亦有人在這裏找心頭好。早幾年經濟不景及失業率上升，令到不少香港人都將以前買下的家產透過網上拍出以取回金錢，亦有一些喜歡試新「玩具」的消費者，當以炒價買入新玩具後，試後覺得不好或感厭倦後透過網站賣出。

有賣家亦自然有買家，他們橫掃不同拍賣網站，以平價購入新玩意，雖然是「二手」物品，但仍然開心不已。當然亦有不少人透過拍賣網站，以成本價購入新產品然後以拍賣的方式賣出產品，以賺取彈性更高的金錢。有拍賣的需求，就自然產生拍賣網站在香港這個彈丸之地推出。現時本地的拍賣網站，由最初的Go2HK 到雅虎、點點紅等，到由外國著名的 eBay 亦殺入本港市場。

網上拍賣不同開門做生意，買家及賣家只能透過電郵及電話初次接觸，以郵寄或親自交收，但始終有害群之馬，賣家收到款不付貨、收到的物品有損壞、買家投得物品後失蹤等等，亦令到良好買家及賣家有不愉快的經歷。而最近亦有不法人士透過拍賣網站出售翻版貨品，以減低在舖面出售的風險。這都是拍賣網站面對的問題。

很多人包括本人都認為「攪」網站是一門非常有學問及艱難的生意，由於香港人的心態及習慣，早幾年要他們在網站服務付款是難上加難，完全是「倒自己米」，但網絡遊戲在香港大行其度，港人亦開始慣習「用者自付」的付款心態，拍賣網站公司為了止血，亦要向用戶收取手續費以維持高昂的營運開始。但當然，不少人亦會認為，香港那麼大，這個網站要付費，就轉移去另一個免費網站繼續「做生意」，這樣亦會令到網站的用戶流失率提高。

早兩年 Go2HK 就開始實行 VIP制度，並向每個成功拍賣出的競投收取佣金，雙方可透過 VIP 認證及他們的競投記錄及過往的評價，得知這個買家/賣家是否一位良好的網民。雖然網站公司透過這些制度，讓網站的評價及信心提高，從而產生一個優良拍賣網站的印像，但始終亦令不少賣家離場，到其他免費網站繼續生意，從而令到雅虎拍賣場這兩三年，用戶人數及產品大增。

Go2HK留意到，一些在其網站活躍的的用戶亦已減少在自己的網站出售產品及進行競投，令有一些用戶經常不付佣金，令到 Go2HK 的收入減少，雖然Go2HK亦利用不用的方法增加用戶的活躍率，如設有交收站、與其他公司合作以拍賣的方式宣傳產品等，但收效仍然不大，始終「收費」是一個最大的阻力，最後，Go2HK於本月，從新改革，取消所有收費，希望從「谷底」再次爬上來，再將客戶的收入，主力放在其他增值服務，如主頁廣告、圖片等等，以及引買家的注意。

我相信，沒有人想到，十月初Go2HK決定取消佣金之時，全港最大的拍賣網站雅虎拍賣場公布在十一月開始收費。在這個決定，除了補貼數年來在系統及營運的支出，背後是解決雅虎拍賣場這個「無皇管」的世界一直以來的問題，改善網站的形像。包括不良賣家、重覆發出多個競投指示、買家低於底價 ”Fast Trade” (快買)、發出淫褻及不雅的競投、發出不存在的競投等等問題，雖然早兩三個月已開始推廣會員制、身份證認及買家保障方案，但看來收效不大。

一向網上付款是一麻煩的問題，並不是每一位用者都有信用卡或提款卡，尤其未成年的網民，就算有信用卡，但仍然有不少網民對網上付款有壞的印象，雅虎早前推出的網用錢預付系統就解決這個問題，與7-11便利店合作在店舖內購買預付金錢，在雅虎中各項收費服務中使用。但由於成本及手續費問題，最小都需要購買60元。賣家無需立即拍賣費用，當賣家的手續費累積到一個指定金額，才需要繳費。看來對於一般賣家來看，看來都算方便。

但雅虎的收費方法是以每層「信用額」方式付款。舉個例子，假如你現時的信用額是10元，即係當你累積未付款的金額到達10元後，你便需要在14日內付款，而這個時候你的雅虎戶口亦會暫時被停用。你必須付清這10元，戶口才可重開。如你從未沒有購買網用錢，就需要先購買最少60元網用錢，然後用10元付款。接著，你的信用額便會提升，例如升到20元等。不過，你餘下的50元網用錢是只有一年的使用限期，如果你的累積費用未到達信用額，又或者沒有再使用雅虎的服務，一年後你這50元就會過期。

其實內裏亦暗中提示你，當你購買了這60元網用錢後，其實就暗示你要繼續用拍賣場的服務，否則你餘下付出的錢就會失效。假如你只是拍賣一些便宜的物品，每次以港幣1元為手續費，即是你要一年內，最少拍賣60件物品，才可以1元手續費使用，否則平均手續費就會因失效的網用錢而提升。

究竟雅虎這個如意算盤是否打得響？暫時都是未知之數，但可以幾肯定的是，香港人是貪小便宜，一個網站要收費，就搬去另一個免費網站繼續活動。正如兩年前Go2HK 收費亦趕殺了一班用戶移去雅虎，現在雅虎收費，又是否會「趕客」呢，暫時亦是未知之數。

拍賣網站收費不算是新鮮事，其他國家的拍賣網站亦已經推行了收費制度一段時間，台灣雅虎拍賣場已在上年四月開始收取手續費用，日本雅虎拍賣場更要每月付會員費用呢！不過香港人有「免費」的心態，由原先網上遊戲購買月費卡，到現在要免費任玩可見得出。部份原因是月費收入不足以補貼支出，如以免費任玩打響名氣吸引人流，再在遊戲內賣廣告收取可觀的廣告費用作收入，另外亦出售一些虛擬物品作收入來源等。雖然雅虎一向都是以免費內容及大量人流作為收取廣告費用，而Go2HK一直都有與公司合作推一些拍賣優惠作為吸引客戶而從中賺取金錢。但始終，做網網是一項高學問的生意，正如科技泡沫爆破之後，成功的網站買小見小，就算全球有名的拍賣網站 eBay 在香港都是雷聲大雨點少，而red-dot點點紅亦是與雅虎人氣差距太遠。

這類客戶對客戶 (C2C) 網站，由於買家賣家都是客戶，如果網站內，出售貨品太小，買家就難找到自己想要的物品，但如果只有賣家，沒有買家，賣家無法在這個拍賣網站賣出貨品，即是這個網站的客戶人流不適合這類商品。這個情況就似一個購物商場，所以對網站經營者，保持網站的人流量，鼓勵賣家多貼拍賣品，增加網站的知名度等，都是經營網站之道，至於如何從這些因素中賺錢，就是商業決定了，當然商業決定亦可能會影響人流、買家賣家，就例如收取手續費就是一個例子了。雅虎收取手續費後，對雅虎影響有幾大，相信要十一月後才自有分曉。

後記：又是一篇有頭無尾離譜同不知所謂的文。

 隨心  回應的RSS 回應(1)  引用通告(1)   (0)
2005年10月25日