NANA 世上的另一個我 電影版
睇完 NANA 番黎，覺得好好睇。主線都幾跟番漫畫的情節，咁當然細節上唔係完全同漫畫一樣啦。由於電影上的故事編排，起碼唔會令到你睇漫畫第一冊咁睇到頭暈唔知UP乜(好似冇乜講到-_-)，主線都係放番番起奈奈同娜娜一齊的時間，而娜娜以前的故事主要以插入的方式播番出黎，所以就算冇睇過漫畫，都唔會唔明佢地的關系。
人設方面，個人覺得，最唔似的係奈奈-_-;;，中島美嘉演娜娜好入戲，連個樣好似番漫畫咁，好似個餅印咁。其他 BLACK STONES 同 TRAPNEST 演員的化裝同服飾都都演得好似，淳子都似… 總之係奈奈唔似:X (可能因為漫畫裏面奈奈成日都被畫成”攪笑化”)
場景方面，707房裏面非常跟足漫畫，包括房間、檯、床等等都好足，但一睇就知707房望出去的風景係電腦 key 上去……
睇完之後，覺得起電影版裏面，漏了漫畫裏面一個攪笑元素，就係「幸子」。漫畫裏面，幸子未出場之前，講奈奈經常亂諗野，話會有個叫幸子的女仔出黎搶章司，咁佢就周不時同章司講電話時講「係咪同幸子去街呀」、「同幸子一齊呀」等有幸子呢個名的說話(當時幸子都未出)，咁章司聽完就會問「幸子係邊個？」。咁當你睇漫畫睇到，幸子出場後，比奈奈見到幸子果時，就會笑爆，「幸子？」….電影裏面，冇講過奈奈知道個女仔叫幸子的。
另一樣冇提過，就係大魔王。話說奈奈成日話自己係大魔王附身，永遠得唔到幸福，後來認識左章司，就開始話自己遠離大魔王。後尾佢同章司散咗之後，都好似有提過大魔王的(不太Sure)，可能因為電影版，一開始果度已經係第二冊(坐火車去東京)，所以都Skip 晒了。
你可能會問，漫畫出到十三冊，咁電影講到邊度？呢樣..留番你睇完就會知，咁快講咗就唔好睇架啦 ：P 另外，裏面兩首 Theme Song GLAMOROUS SKY 同 ENDLESS STORY 都非常好聽！推介！Soundtrack DVD 重送埋電影裏面兩場 Live DVD！
總括，都係果句，好睇啦！快睇！11月3日上畫。…另外 NANA 電影網站話，決定製作續集電影版….
PS1: 張飛個編號… 1444777 .. -_-;;
PS2: 機動戰士 Z 高達 星之繼承者 11月10日上畫…….
電影
回應的RSS
暫時未有引用通告
2005年10月12日
Numb3rs (數字搜查線)
我都係今日先知呢套CBS電視劇 Numb3rs (港譯數字搜查線)，會起呢個月會起香港播，全完未聽過，但一睇介紹就覺得好有趣，亦都好想追黎睇。
一向我都有追開同 FBI / CIA 呢類的片(例 xfiles、 CSI、24、The Agency等…) ，今次呢套 Numb3rs 講一個 FBI 的探員同佢數學天才的細佬利用數學破解奇案。美國呢套戲重有 Teacher Kit 可以比老師教學用，睇完套劇應用番裏面的數學理論，完全係活動教學，香港都可以試下架。（睇完大奧教大家點樣爭權奪利:X)
xfiles 睇咗好多年睇到悶，尤其Mulder走咗之後就覺得唔好睇了。 CSI 頭幾集都好好睇，但後尾發展到又NY又Miani又開始冇追了。24幾好睇，集集都好緊張，睇小一集都唔掂，期待下年新一輯。The Agency，播咗一輯唔知點解香港又冇播落去，咁就Miss 咗了，上幾個月 Hallmark Channel 都播過下，但我跟唔到個 Schedule 睇，又唔知佢係咪第一輯定新一輯，miss 晒了。呢幾個月一套US電視劇都冇追，Lost 都冇睇….呢套希望又可以每星期追下。(雖然已經有成套 Season 1 Download…)
10月10日起逢星期一 10點鐘起AXN (有線22台)首播… (PS:希望記得睇-_-;;)
電視
回應的RSS
暫時未有引用通告
2005年10月05日
上等人睇的煙花
一年兩次的煙花又來了，岩岩睇完蘇絲王就禁過去。
呢家好憎睇TVB/ATV播的煙花，唔係影得唔好，而係啲主持豬多野講，重記得有一年亞視女主持同個男主持爭對白，聽到好惡頂。
所以呢兩三年就轉睇有線了。只係播音樂，唔會豬多野講，都算係「上等人」睇的煙花。 :p
電視
回應的RSS
暫時未有引用通告
2005年10月02日
電視 Blog (PHD + 女神候補生 + 星空的邂逅)
由於堆咗一堆 Blog 都想寫，大家都係同電視有關，所以就叫電視 Blog.. 先黎係：
叮皇之爆炸猛男 PHD
睇完之後，覺得不敵的原因有二：
- 排練時間不足，翻叮與叮皇相差好似得兩個星期，兩星期排兩隻舞有啲難度呱，所以唱起黎都夾唔到時間。
- 對手以實力取勝，太強了。
一叮基本上都已經出咗名的了，佢地可以攪下起旺角街頭玩下唱歌，都應該會幾受歡迎架！
PS:估唔到有一隊唱我極為反感的 Kaleidostar 中文版 OP ！日文版好好聽架！中文改到又難聽，作詞又作到要好努力咁作啲中文字落去咁，所以用「反感」黎形容！
總括黎講，第二輯一叮冇第一輯咁好睇，一來已經睇得太多，有啲悶，第二係啲參賽者已經主力係實力派／表演派，而唔係攪笑派，所以冇咁好笑。我連叮皇果集都係睇錄影（8PM-9PM睇緊活得很滋味睇蘇絲王，9PM-9:30PM睇女神候補生 :X ）。
女神候補生
今次係我第三次睇女神候補生，第一次係睇 VCD ，第二次係睇 ATV ，第三次當然係 Animax 大人啦！ 翻睇睇三次，都仍然係咁好睇，因為「爛尾」！！！！
今次睇回想起三樣野，一：幾時先肯爛完呢…. 二：好記得 ATV 每集 ED 都剪咗呢幕(右圖)，因為ATV 當年起兒童時段播，唔播得食煙，所以一去到 ED 呢個位之前，就會玩定格。三：諗起小泉恒平。小泉恒平係乜水？佢咪係唱 ED 果個人囉。好有趣的。你聽落佢把聲係女仔聲咁，但原來係男人黎，但佢又唱得好好聽播！呢兩、三年佢都冇再出碟。但呢個月有個Live Concert… 真係掛住讀書所以停產？呢兩日我又將佢唱果兩首ED 放番入 iTune Playlist 度，出街又可以聽下。
Onegai Teacher 星空的邂逅
Animax 呢排真係Keep住每月都有新動畫播，呢套又係好野（雖然睇ed)。
睇到個廣告，一聽見保志總一郎o拿o拿地果把聲，太正了:~~~ 呢家佢配 SEED Destiny 真係越黎越冇乜機會出場咁(冇法啦，有呀懶係勁的真哥哥頂住晒)
不過以 Animax 的「尺度」，我都唔記得有冇邊一幕要同佢做手術了。不過我相信，幽遊白書應該會剪得好恐怖下， Animax 打得勁都要剪 (睇下月姬同GITS都知) ，咁幽遊白書成套龍珠咁，日打夜打，咁咪日剪夜剪，一百集剪到得番30集?哈哈！
電視, 動畫與漫畫
回應的RSS
暫時未有引用通告
2005年09月27日
機動戰士Z高達 - 星之繼承者 11 月起香港上映
今日坐地鐵煲埋半本今期 Aniwave ，起啲好神秘的欄位，提及 11 月高達三部曲之星之繼承者會起香港上正場。錯過咗會展 LCD「死點」場的話，呢次有機會了 :p
電影, 動畫與漫畫
回應的RSS
暫時未有引用通告
2005年09月20日
Nana
今朝收到BC Newsletter ，發現香港亞洲電影節…閉幕電影有 Nana，諗住約埋啲Friends 去睇，點之攪下攪下，頭先睇，一場爆咗，另一場得番頭兩行…….同兩邊邊單丁一個位。
約乜鬼，把鬼火之下，買了2院D行邊邊單丁位自己睇算！麻Q煩。另外原本又諗住不如睇 GITS Innocent，不過我年頭Download 咗到呢家都未睇，咁就無謂了。Nana 都成$70，真係正版消費！
其實我只係想睇中島美嘉……嘿………..
電影
回應的RSS
暫時未有引用通告
2005年09月17日
(0) 
