前言
之前咪講過其中一件玩具就係一件可以起街睇到屋企電視的硬件，其實就係 Sony LocationFree Base Station。呢件野起Sony 訂咗一個月有多先有貨到港，初頭以為呢件野都幾垃圾，應該冇人買，不過原來又唔係，下面會提及….(內容好鬼長…所以有心的話慢慢睇……)
消閒/嗜好
回應的RSS
回應(3)
暫時未有引用通告
(1)
2007年05月13日
呢次深圳一日遊主要補完上之冇去的地方，同埋去玩玩食飯。
萬象城
上次冇去到萬象城，所以今次點都要去番，只要搭地鐵去到大劇院站落車，向 C 出口方向行，經過一大段地底隊道，就會到達，可能你一路行就覺得好鬼似又一城。
好似我地幾個男丁，去又一城有咩做？一個字，「冇」，所以去萬象城，最岩睇的，就係去超市。萬象城入面有間 ole 超市(起B1層最尾)，雖然唔算大，但都幾多野買，如果你未食早餐，入去買野食，你都會有驚喜。如果你想食麵包，就要去試下 BreadTalk嗱 (B1層中間)，真係好味的。
B1層有好多不同的餐廳，肚餓就要去試下，而樓上主要都係舖頭，不過可能價錢重貴過香港買(正貨)，所以如果香港有的話(例如名牌衫/鞋)，番香港買吧。我地亦研究過入面間 ESPRIT Salon，價錢亦同香港差不多，但對呢家人仔升緊，番香港剪可能重抵，所以呢家番大陸買正牌野真係要睇住價錢。
萬象城似又一城除咗個格局似外，同樣就係有一個Roller 場，個Roller 場大過又一城果個，但價錢都唔係平，所以又係睇錢做人了，我唔識踩冰，都唔太清楚，不過呢，起大陸受傷始終冇咁好啦，尤其入院，可能除時變植物人架，所以真係要小心為上。
午餐：墨西哥餐廳塔可鐘 [劣評]
呢間野起萬象城 B1層 ，一由地鐵站行過黎就已經見到，墨西哥風味餐廳，佢地全日都係果個Menu，所以你Lunch或夜晚去食都係咁的價錢。
不過呢，個Menu裏面的食物款色就真係唔多，每款食物的份量亦比較細，價錢我個人覺得係貴，味道方便都算唔錯，但總活黎講，覺得比上次去食「鼎泰豐」差的，食完真係有啲不滿，差啲比我啲團友屌到媽媽聲，完全係劣評。
插曲：食完飯比錢都講價？
我地起塔可鐘食完Lunch吹緊水的時候，見到對面檯兩個大陸佬埋單，個女侍應囉張單話佢知幾銀，但個大陸佬囉小咗錢出黎，然後同個侍應講價話收平啲，跟住個女侍應即刻「變臉」，黑晒口面，再啤住條友，啤咗廿秒，條友最後先再囉埋條尾數出黎埋單，真係大陸佬就係大陸佬，冇錢就咪黎高級餐廳食野啦，真係吹啤。不過大家留意，起大陸餐廳食飯，唔興比 Tips 的，佢找錢比你，記住囉晒走。
生意探路：福民文具玩具批發市場
點解會咁攪笑去睇文具？如果你想搬一堆平文具番屋企/公司/區會用 (膠File、筆、計數機等等)，又唔介意用大陸野，呢度就係好地方。
批發市場唔係太難去，只要搭地鐵去褔民站，經出口轉去福民路一直行就到。裏面都算幾大，樓下主力賣文具，樓上主要做玩具同其他野，先講樓下，裏面真係好鬼多舖頭賣同一樣野，但個場都覺得幾靜，佢地點搵錢架呢？真係幾想知。佢有啲文具係日文牌子，不過有啲係國產牌子，重係咩「國內十大名牌」，敢唔敢用就真係嘿嘿嘿。
二樓都有一啲幾大的舖頭，有間專係賣絲帶，裏面款色多到爆，另外又有啲賣模型，雖然係「假」(翻版)，不過有啲都幾靚，但我唔保證過關捉到會唔會罰錢架 XD
體育活動：球王保齡中心
除咗買野、睇書、行街、食野，不如加設體育活動，之前提過萬象城有 Roller 場，不過又有啲難學，咁所以就介紹下大家去玩保齡。
呢間球王保齡唔係好大，有24條道AMF，覺有啲但價錢都算幾平，貴時段都係15蚊局，加$5 租鞋錢，玩一局都係$20，我地五條友有三條友從未look過鈴，兩個好耐都冇look，傻下傻下咁玩，一局都玩到一粒鐘。我地去果日港紙人仔都收，重係1對1，比港紙重抵過比人仔。
下面張相左邊果個就係我了，我係咪look得好水皮呢，最後估唔到我60分都唔到，輸到喊晒口。
呢間球王保齡都幾遠下，起華強站出閘，向華向北路方面行幾條街，經過茂業百貨，轉入去食街(華強路口巴士站)，見到北海漁村就坐對面馬路(小心車輛)，行入去就會見到。如果你地行完華強賽格六點收工，就可以行去玩番一兩局，肚餓就可以行番出食街開飯局。
高級晚餐：廚房製造
Lunch 果餐比人媽叉到暈，所以為咗補償大家的不滿，所以就去一間高級餐廳廚房製造。呢間野係中西日Fusion，你起門口已經覺得非常之高級，入到去更加高級，跟住你就會好驚個銀包好快清袋。佢地以開放式廚房設計，氣派超高級，Menu都有幾本，每本都有唔同野，一本中餐、日本野、西餐、酒等等…
我地五個人，選擇咗兩個西式 Set Menu，包括前菜、湯、主菜、甜品，Share 食的話，五條友就可以食五個款的主菜，所以都幾豐富，大家估下幾錢 
法式麵包/鮮果沙拉/凱撒抄拉/波菜野菌湯
焗紐西蘭青口/法式焗蝸牛
極佳級牛排骨/檸香黑椒龍利柳/法式烤羊朳/德國豬手/酥炸鵝肝醬/海鮮雜扒 (主菜配飯/意份)
提拉米酥/香橙蛋糕/酥炸黃金朱古力/法式溫蘋果派/冰奶油杏仁凍
大家估下食呢個餐，五條友，連埋茶錢加一，再加埋呢度的派局，合共埋單幾錢？
就係… $640人民幣！除番開每人只係$128人仔，真係超級抵到爆。呢間野可以比港紙，大約對1:1.04，所以比人仔會抵好多。
地址：地鐵國貿站金光華廣場7樓2-3室(坐觀光電梯)
歡迎各位報料正野！
我地會再攪深圳地鐵團，如果你地有啲深圳吃樂玩樂推介，不坊留個舖頭名同地址(大約邊個站落車同邊個方向)比我地，我地睇落又正的話，下次就親自去玩下番黎介紹比大家一齊分享！
旅遊/觀光
回應的RSS
回應(3)
暫時未有引用通告
(0)
2007年04月30日
最近由於經常都係電影節關係，所以洗多咗錢去睇戲之如，重要洗多咗錢去食飯。其中有兩晚係去咗食麵，試咗兩間日本麵舖。
九州康竜拉麵
我 食呢間康竜(龍)拉麵位於銅鑼灣加寧街(即係名店坊果頭)，佢裏面重點就康竜拉麵。佢的叫法係幾得意，你入到去，每位客人都有個menu牌，裏面有10款 拉麵你揀，揀出你喜歡的拉麵後，就可以揀用康竜粗麵、芝麻粗麵或者傳統幼麵(傳統幼麵有硬/適中/軟三款再揀)，之後重可以揀湯的鹹度(濃/適中/淡)、 油量(多/適中/小/不要)以及辣醬份量(多/適中/小/不要)咁比你自由配搭。另外亦可以再自由選擇配料(紫菜/蒿菜/木耳/粟米粒/多笱片/康竜雞 蛋)，不過要另外加錢的。
除咗麵，重有小食、或飯(即係唔食麵)同飲品，不過價錢都算高級架。最後我揀咗個燒汁煮豚肉配康竜粗麵，個麵都算幾好，不過豚肉就只係得三片，叮一聲就食咗，真係超級矜貴，麵同湯底都幾好，但個麵唔算大個，所以食完未必真係會全飽，所以就有自選小食自費再填飽個肚。
地址：銅鑼灣加寧街5-7號地下/尖沙咀漆咸道107-109號地舖
滿意指數：★★★☆☆
北海道拉麵 さんぱち 八八八拉面
呢次我就去到尖咀前 Curry Bee 舖位(地庫)，呢家間舖都係食日本麵，叫八八八拉面。八八拉面起日本都好多分店，睇落好似味千，但八八八起香港暫時只有兩間分店(海外共4間分店)，分別位於銅鑼灣及尖沙咀(咪同康竜拉麵一樣)。
八八拉面就冇好似康竜拉麵咁任你配搭，不過佢面款都算多，另外亦有不同小食，我今次試了佢的店長推介，佢的湯底都幾濃，麵底好大，餸都夠，食完係會飽肚，另外最有趣係佢有片印咗さんぱち的魚肉片呢。
食的時候不妨留意下，佢地隻碗係寫明係尖沙咀分店，Menu亦寫明係尖沙咀分店，你有時間可以去晒兩間分店睇下Menu有冇唔同 XD。食完記住囉Point Card，食一個拉麵就有一個印花，儲夠10個印花，可以換一個拉麵，正爆！
地址：尖沙咀加連威老道2-6號愛寶商業大廈地下/銅鑼灣軒尼詩道499號永光商業大廈地庫B1
滿意指數：★★★★☆
地圖：（放大地圖請按入全文）
消閒/嗜好
回應的RSS
按此回應
暫時未有引用通告
(0)
2007年04月05日
繼續上回的行程，首站就係去「深圳黃金高登」的華強及賽格。
華強電子世界、賽格廣場
非常之易去，只要搭地鐵去到華強站於A出口一出，左手邊就係華強電子世界，裏面「大到冇朋友」頭兩層都係賣電子零件，如果你係想睇電腦野，咁就要上到三樓，或者行去新翼，裏面有 N x Y 咁多檔個體戶及舖頭檔，不過檔檔都係賣果啲野，可能你行多兩三層就已經悶爆。
離開華強，對面就係賽格(小心過馬路)，同樣賽格頭兩層都係賣電子零件，電腦野要上上面，同樣入面賣黎賣去都係果啲野，就好似你去黃金高登賣極都係果啲。咁番大陸睇咩好呢？主要買啲國產野啦，例如國產 Server Case 、國產 WebCam 、國產TV Box 等等、不過通常果啲係香港佬番黎批發咁運落香港，當然你散賣一兩隻都冇問題啦。
上回預告話我買咗樣平到喊的電腦產品，開估了，就係 D-Link DI-504 Router =.=。
香港都有得賣啦，咁有咩咁特別呢？首先香港賣緊果隻款，係右邊圖果隻款，而大陸賣果隻，係黑銀兩色，型爆好多。香港DI-504 大約賣緊 $168，你估下大陸賣幾錢？只係$100人仔！真係抵到爆！囉到番黎用狂試狂Download 都超級Stable冇斷Connection，超值！
不過起大陸買電子產品，要留意大陸插蘇腳係兩腳插，你可以起百佳(大約$8)、實惠(大約$12)買一個轉腳插(通常寫住鬚刨1A轉插)，咁就可以用了，唔一定要去鴨記買個個火牛貴到喊。另外，由於大陸買，隻Router入面的Web設定版面都係簡體字，我唔敢Firm 番個台灣/英文版入去，廢事炒，還掂都係Set一次咁大把，平時又唔係日日望住佢，所以就無謂攪了，炒咗就麻煩。
請留意華強同賽格的開放時間為朝9晚6，唔同香港黃金高登開到夜晚8-9點，所以太夜去就會落閘放狗。
少年宮書城
下一站就係書城，少年宮書城係新開的，樓高兩層，書店起地面呢層，另外重有好多間不同的舖頭及食店，睇到悶就可以去食下野(不過要比錢離開書店先 XD)，另外重有一間細細的24小時書店，不過我諗你唔會真係留起度睇架啦(呢啲留番起台灣誠品先做)。
少年宮書城又係好易去，首先就係搭地鐵去到會展中心站，轉四號線去少年宮站。呢家四號線仍然係單線雙程行車，所以兩個方向的車都係起同一個月台上/落車。去到少年宮站，起D出口一出轉右，就會見到書城中心城的超長大樓。
書城中心城共分為兩翼，左邊(南翼)係賣美術設計的書，另外有間進口書店(番香港買吧)、24小時書店及二手書店(都係番香港買吧)、右邊(北翼)就係賣音樂、戲劇以及書城！書城共有兩層(地面及地庫)，地面主要賣一般類型的書籍、地庫賣電腦書、兒童圖書、醫學等等技術書籍。
老實地講，如果你諗住買普通大陸書，不如番香港買，因為香港的大陸書店(例如綠野仙蹤)都會有特價，平過書城賣正價，就算你入會，平時都只係有95/98折，每個月15號先有88折(未計每兩年$25入會費)。
所以一係黎睇下書(唔介意買一兩本)，一係就買啲香港搵唔到的書，又或者黎睇/買電腦書(尚書房賣電腦書較貴，以及書城較多選擇)。
另外買 Art & Design 書都不錯，因為香港書店不多這類書籍，而且近年大陸印刷美術書都已經有良心，印刷效果已經算係滿意，不再是甩版。
最後我起書城掃咗三本 O'Reilly 的英文影印版原版書(不是中文翻譯)，由最平的58蚊到最貴的100蚊，三本加埋都係二百幾蚊，肯定抵過你買原裝書版本(每本$300)。另外亦買咗一本色書及一本講商品攝影的書，呢本商品攝影的書係韓國書大陸翻譯，裏面介紹多種不同的產品的攝影方法，例如衫、筆、Poster、玩具、鞋、皮包、書、眼鏡、香水、生果、點心、蛋糕等等，重有教你Photoshop修正同基本攝影知識，只係賣 $59.8，真係抵睇到爆。
下午茶：滿記甜品
上次都提過，如果你驚起大陸食野食壞人，咁你一係去番啲大型商場裏面一啲出名的店舖食野，或者一啲港資北上的餐廳。今次我地的下午茶就係滿記甜品。呢間野係完全無意中行行下賽格發現的。價錢同香港好似一樣，不過起碼有信心啲(好過街邊檔)。
另外提大家，你最好買定一支飲品袋起身，因為有時候唔係咁易比你見到七仔便利店，尤其你又唔敢起街邊買大陸品牌飲品的時候，你袋定一支隨時囉黎飲都得。大七仔都唔係起街隨處見到架。
晚市出擊：小肥羊
預告講話帶大家去一間勁易去的小肥羊，呢間就係小肥羊國貿店。笑話又黎了，旺角警處唔起旺角站起太子站；長沙灣廣場唔起長沙灣站起荔枝角站，小肥羊國貿店並唔係起國貿站！小肥羊係起老街站的，所以千其咪落錯車。
起地鐵老街站 C出口，行一大段路…離開地鐵站進入地庫的商場，轉右就可以步出地面。其實對面就已經係小肥羊，不過比巴士站啲廣告遮住咗，所以會勁留意唔到。轉左行上平台，再轉入天橋，天橋右邊就係小肥羊的門口，唔洗五分鐘就到。如果你係想早啲食，6點鐘就好去囉位，否則會勁多人要等好耐。如果唔係就8點去囉位，一般黎講9點前都可以入坐。
入到去就快快落單，如果你係諗住搭地鐵，記住留意尾班車係幾點，你預大約11點番去坐地鐵番羅湖，咁就可以早啲番香港休息。
睇下我地呢單小肥羊幾豐富，三個人食，落樓只係位位$70，真係抵過香港食架。重買咗一堆書同超平 Router，呢次真係滿載而歸。
下期的深圳一天團正在企劃中，會再去其他更正的地方，下次去完再為大家介紹。
旅遊/觀光
回應的RSS
回應(3)
暫時未有引用通告
(0)
2007年03月27日
網上行以前已經有Net album 服務，不過今次重新包裝，加強功能，變成一個snaap! ™ 品牌，以簡單的界面，一站式服務，多媒界的睇相方式，主攻家庭市場。snaap! 有幾勁？即刻黎做個測試先。(以下內容唔係hard sell 佢架，我真係試完係咁照寫出黎)
日記, 消閒/嗜好
回應的RSS
按此回應
暫時未有引用通告
(0)
2007年03月24日
前言：我起碼有六、七年冇番過深圳，我上一次番大陸的時候，最記得就係一出羅湖，就係一個大窿(起地鐵)，但由起完地鐵之後都已經兩年，但都未去過，呢次深圳一日遊係由我發起，我帶隊，我設計路線，但其實最主要目的係為咗打邊爐。原本最初只係話想打邊爐，咁就諗住去小肥羊，但後來話不如番大陸食，起碼平好多，咁所以就有呢個大陸一日遊。Plan呢個行程差唔多用咗一個星期，因為一來我真係有好多年冇去過，同埋都有好多野變咗，所以要睇下有咩玩、有咩食，不斷咁上網睇、搵書、問人等等囉資料，同埋又要睇下小肥羊點去呢，嘿嘿！
過關、換錢
以前番大陸可以洗港紙，呢家人民幣升值晒，攪到洗港紙都有難度，可能你又驚洗人仔都有假(不過呢家$1000港紙都有大量假抄)，所以你可以起羅湖過關前起羅湖站(出閘過關前月台)換定足夠人仔，由於呢家深圳物價指數都好高下，所以換多小小有So，番大陸換人仔重難過乜。
呢家過關大家應該都有智能ID Card，所以過香港海關應該超快，大陸呢家都有指紋過關，你可以先起中旅社做定手續先，或者起羅湖大陸過關度即時攪手續都得。大家一過咗羅湖橋之後，馬上落下一層過關，因為一過完關，就已經係地底隊道(圖)，再落一層就係深圳地鐵，超方便。
深圳地鐵
好似我呢啲怕坐巴士，都唔知自己去到邊又唔識落車的話，地鐵係最好的交通工具，深圳地鐵平到笑，坐一個站都只係兩蚊，坐長啲都係三蚊或者四蚊，重有廣東話廣播同埋閃燈路線路，唔怕唔識落車。
不過最麻煩係買飛，如果你岩岩換完人仔囉住一堆一百蚊紙的話，對唔住，你先要打散做幾蚊幾蚊的散紙先可以去買”Coin”搭車。另外就係售”Coin”機只係得幾部，所以買飛都要排長隊，尤其起羅湖同老街站(東門)，都幾煩。
如果你肯”投資”，你可以去買張”深圳通”卡(即香港的八達通卡)，一來唔洗排隊，二來搭車都有啲Discount，另外話張深圳通重可以搭巴士，但出張卡要比四十蚊按金，退卡要去指定地方退，另外早排又話有新聞講遲啲八達通都可以起深圳當深圳通咁用，所以買唔買你自己決定了。
深圳地鐵車箱比香港地鐵九鐵窄，同輕鐵差唔多，所以人多都會好迫，現時深圳地鐵只係有一號同四號線通車，一般大家都只會坐一號線，除非你想去新開的書城(少年宮站)，先會坐四號線，另外四號線呢家只係單線雙程行車，所以等車就要等下。
如果你未搭過，而又冇諗住買深圳通，咁要講下點買”Coin”，如果你係一班人，只需要派一個人去買Coin，可以一次過買多過一個Coin，一次入張$10銀紙，咁就方便好多，當你買完飛後，起抄錢時會同時間跌埋個綠色的Coin，果個Coin 就係用黎入閘用。
呢個Coin用高科技RFID製造，入閘時將個Coin拍起個入閘機個接收器度(好似八達通咁)，就可以入閘，而出閘時就將個Coin入落個出閘機個”窿”度，就可以出閘了。記住千其唔好跌咗個Coin，唔見咗要罰$15蚊架。
最後要提的就係深圳地鐵夜晚11點每邊開最後一班車，所以去食夜飯時記住起地鐵站Check下最後一班車番羅湖係幾點，否則就要坐的士番羅湖，再夜就真係要去搵皇崗24通關。
女人商場
老實講，行呢啲購物商場就真係唔岩我地幾個「麻甩老」，不過當然如果你拖男帶女上去，就要知下有咩商場同其他野行行。
國貿站：金光華廣場 (地鐵 A 出口已經是金光華地庫B2層) <--懶係高級商場咁
老街站：東門 (地鐵A出口直達) <--岩晒候生仔
大劇院站：萬象城 (地鐵C3出口) <--首推，多野食及玩(不過今次時間所限去唔成，下次去番)
科學館站：中信城市廣場[吉之島](地鐵D出口到達地面向前行一個街口）<--麻麻
購物商場站：CoCo Park (吉之島於07年4月開幕) ，但仍然比較爛，同埋太多香港舖頭，不值得去。
點解要知啲女人商場位罝呢，因為你搵野食，去女人商場一定有，起碼衛生啲，不過就唔好太大驚喜，因為可能去到發現有啲舖頭香港都有，例如味千拉麵、海皇粥店等，番大陸食真係有啲低能，更加你覺得已經番咗香港咁。
我的午餐：鼎泰豐
點解揀鼎泰豐？因為我起台灣八日都冇食過，所以番大陸咪借機試下，都好過食Pizza Hut或者味千拉麵呱。由於呢間鼎泰豐係囉專利開，價錢係貴的，不過用料都幾好，我地三個人食埋都要除番開每人六十幾蚊，都算貴架，推介係小龍包，有機會可以試下架。
地址：國貿站金光華廣場 B2 層，即地鐵一出果層，一出行到最尾轉右
金肉其外，敗絮其中
睇落深圳新開啲商場真係好高級，個格局又靚爆咁，但可能，當你一走去個廁所，就發現係另一個景況……..
下回預告：
旅遊/觀光
回應的RSS
按此回應
暫時未有引用通告
(0)
2007年03月19日
新海城的動畫，總係有著一種魔力，魔力不是由自於故事，而係畫面顏色的運用以及用心的製作。
不少人認識他都是來自首個正式賣錢的作品星之聲(ほしのこえ)以及幾月前在香港正式有代理賣的雲之彼端，約定的地方(雲のむこう、約束の場所)。如果你重有印像的話，星之聲裏面的畫面，經常都係不斷咁Send 電話訊息，Send 一個Message要十萬九千年咁耐(老吹)，而雲之彼端就係坐架飛機去到個高高高塔度。(我都冇乜印像了XD)
呢套秒速 5cm 由 3個故仔組成(櫻花抄、太空人、秒速5cm)，第一集櫻花抄主要講遠野貴樹(男) 及篠原明里 (女) 自小後分開兩地居住，兩人一直以郵件通訊，但後來開始掛念，令貴樹坐火車遠渡與明里相會……
先講下新海誠的強項，就係CG繪圖，新海誠於動畫上所用的色調，是非常之鮮明及特出，不是其他動畫/插畫家所用開的，所以一看之後，完全會有點中毒的感覺，另外就是他製作的動畫從不偷工減料，每個畫面都會做足功課，畫面非常細緻，就算小小點亦會畫得非常之出色，這些都是吸引大家觀看之處，完全係值回票價，可能你更會話DVD解像度都不夠，要高清或更高解像度才滿足。
一般外界都對新海誠的弱項-故事內容-都有不同的評價，例如第一套星之聲，裏面過份地兩個主角自然自語對話，沒有直接的交流，只是看著一些XYZ光年前的訊息，畫面靚，但故事爛，這點我亦認同的，所以他在雲之彼端就改變了這個溝通方法，當然故事長了，內容亦較為有豐富，所以我覺得第二套已經是有進步的表現。
但來到這套，雖然第二、三話仍未看到(未上畫)，但從第一話中，故事似乎又有點翻炒冷飯，由電話文字通訊改為書信交流，雖地點不同，科技不同，但仍想表達兩人之間的溝通，故事有點「老土」，但由於仍未看到第二、三話，故不太多負面評論。
新海誠的動畫，越看越舒服，天門的音樂，我完全係覺得很好，他們一直合作無間，我亦非常滿意，可能我一直都有玩開 falcom 的Game，所以都聽慣了。不幸地，小品動畫，難以帶到香港的觀眾面前，尤其在戲院放影，出正版DVD 亦已經是很好的了(雖然可以訂日本/台灣版)，在台灣這類動畫有時候都會在戲院上映，在香港，就真的要看看電影節這類的活動，有沒有機會像銀髮阿基德，可以帶回香港上映。
小品故事，沒有打打殺殺，沒有大名星，沒有驚喜的情節，沒有特別的賣點，對一般觀眾的接受程度有多高呢，在日本雖然可以看到他的作品受到很高的評價，但不要忘記，這裏是香港。
消閒/嗜好
回應的RSS
按此回應
暫時未有引用通告
(4)
2007年03月02日
