唔識日文的自殺日本遊 DAY 7-9 之東京旅遊大貼子 (3月30-4月1日)
由於DAY7-9節目大兜亂，所以一野講晒算Q數。
千葉
由於JP Rail Pass 今日到期，所以要用盡張Pass，就臨時改行程去千葉。千葉起東京的右邊，大約都係坐一個鐘車程就到。去千葉做乜？咪又係影景囉。今次就到 Fate/Stay Night了。不過，為咗搵間基督教大學，行咗一、兩個鐘都搵唔到，原來係行錯方向，最後問咗一個年青學生哥，佢帶咗我地去先搵到。
お台場
不少港人及遊客都會必去お台場一遊，お台場有兩三個購物商場，富士電視台亦位於お台場，另外更可以看到彩虹橋，所以你去到お台場，會很容易見到香港遊客。去お台場，最方便就是搭JR去到新橋站，再轉搭ゆりかもめ(Yurikamome)空中鐵路，於台場站落車。另外，記住去一去H&C 主題餐廳，起Decks Tokyo Beach Island Mall (台場香港果個商場)。
神田明神下
如果你係IT人(好似我呢啲IT白痴)，你有機會坐中央線，有時間的話，記住起「御茶ノ水站」落車，向秋葉原方向行約五分分鐘，就可以到神田神社，買一個IT情報守護附或者IT情報守護卡片盒，補你IT平安。買完就可以行多三分鐘，就可以去番秋葉原繼續掃貨。
Animate
成個東京，我地去得最多就係池袋，因為都幾多動畫野掃，其次就係秋葉原。不過如果你係動畫迷想去掃精品(唔計漫畫)，起Animate (我地叫賊船)掃的話，就要留意間間Animate賣的貨品都唔齊，所以有時你起A舖見到，番去B舖未必會搵到。我就試過起長崎 Animate 見到個鎖匙扣，起東京三間Animate 都見唔到，好在我起長崎 Animate 買咗 
。
三鷹
我地唯一一個去唔成的地方，由於冇起香港買定飛去宮崎駿館，去到買的話，全部都係預售飛，最快都要個半星期後嘅飛，所以唔洗去。起香港買飛的話，就可以任何日子入場，所以如果你想去的話，記住起香港買定飛。
購物‧食野小貼子
由於日本購物需要打稅(5%)，而且日本的消費指數都比香港高，所以起日本買野，未必平，但款式多。先講掃貨，如果你係去日本為咗買某一類貨品，你最好先起香港做足功課，望一望香港賣幾錢(例如買盒裝公仔，香港可能有代理)，有時去到日本買，隨時貴過起香港買。另外留意標價，一般都會標價為「稅入」，即代表已經包稅，有些就會寫兩個價錢，較貴的一個價錢就係連稅價。但留意如果你買漫畫／書籍，通常都不會寫連稅，因為這些可以放幾年的貨品，可能稅率己改變（可能幾年後加到10%稅呢)。
起日本去得最多掃貨就係100yen店(即香港十蚊店)，好多野賣，而且好抵買，我就買埋買埋好多垃圾野:P (不過留意，100yen係未連稅，另外有啲貨品唔係100yen，會係150或200yen等等，不過會在貨品寫明)
如果你係窮人，想留番啲錢買野，食野就唔好食咁貴，去嘅過千Yen一餐的舖頭(除非你想豪一餐)。一般最平由便利店$400yen到較豐富的$900yen不等。我通常去類似快餐店的舖頭，都係$800yen度，另外，千其咪起日本食啲香港有得食嘅舖頭，例如老麥、星巴(咖啡)、家鄉雞、吉野家等等，因為價錢貴過香港食而且香港都有得食，咁洗乜起日本食呢。
另一樣非常重要的事係，由於日本啲商場舖頭真係唔休做，一般舖頭都係開11-12AM收8AM，一到8點就鬥快落閘，尤其大型購物商場，不過亦開始有啲舖頭開始夜收(約9-9:30PM)，所以一定要安排食飯時間。例如在朝早12點前去景點(例如神社、風景點)，及食午餐，及買定乾糧及水，跟住一野連掃十萬個商場舖頭，肚餓就食乾糧，一路行就望定夜晚食乜(記住望下幾點收舖)，到8PM先開始去食晩餐，咁就唔會蝕水。不過如果唔好彩，啲舖收晒冇野食，咁你可以去松屋或吉野家(很多都開24小時)，再唔係咪去便利店買飯盒番酒店食。
東京火車地鐵案內
火車同地鐵係東京主要的交通工具，所以去東京，一定要識搭車。以下係我的小貼子。
由於東京火車站及地鐵站互通，但入閘及收費又有不同，買飛又有唔同，所以一般遊客都唔識點買飛同搭車，買錯飛就無謂了。由於日本交通費用都幾貴，搭一個站都要百幾二百yen(約10蚊起)，所以大家唔好掛住買野，要留番錢搭車。
引用香港的概念(未兩鐵入拼前)，你可以當JR係香港九鐵，非JR的鐵路/地鐵其他就係香港嘅地鐵。但由於日本的地鐵係有多間公司營運，所以都幾煩。但呢家就好好多了。
為咗唔洗煩，浪費買車飛及廢事買錯飛(講緊我？)我建議大家買IC卡/儲值飛用。東京JR現在已經全部使用IC卡(Suica卡，類似香港的八達通)，第一次你要先用$2000yen 買一張Suica卡(包括$1500yen車費及$500yen可退回按金)，總之搭JR 入就Doo一下，出又Doo一下就攪掂。至於非JR(地鐵或其他私鐵)，就要買儲值飛(Passnet 飛，有個紅色人仔的公仔)，最低消費$1000yen，同樣入閘入飛，出閘入飛，就攪掂。
但要留意日本儲值卡同八達通有不同，如果Suica卡/儲值飛的餘額不足以搭一個站的最低消費，係入唔到閘的，因為一入閘就會扣你最低消費。咁要點？先講Suica卡，只要你去Suica增值機，插入Suica卡，再入現金增值就攪掂。而儲值飛，咁你就可以買一張單程飛，然後入張儲值飛，就可以扣除儲值飛餘額，再補錢買單程飛入閘。同樣，出閘唔夠錢的話，亦出唔到閘，咁又點呢？Suica同儲值飛都可以去到出閘站閘內的精算機，插入Suica卡或儲值飛，再補錢出閘。亦要留意JR及每一間地鐵公司都各自有一日任搭的車飛，但互不相通，所以其實未必抵坐。另外佢地亦有回數券等其他飛種，不過都係唔適合旅客。
儲值卡用唔晒咁點呢？Suica 的話，留為記念下次番黎用過囉，都係幾百Yen姐:P (可以Refund的..)，不過如果你離開日本係諗住坐Skyliner的話，你可以去JR日暮里站，轉坐Skyliner，買飛時用埋張儲值飛(每次購票最多用兩張)，咁就唔洗浪費。儲值飛用晒的話，會退番比你做記念，所以買儲值飛都有著數架。
新訂內容：由2007年3月 18 日起，全新的IC Card PASMO 將會取代原有的 Passnet 儲值飛，而 PASMO可以與 SUICA共用，即係你只要用一張Suica或者PASMO卡就可以搭晒東京JR、私鐵以及巴士，非常方便。
以下講下最常搭的JR線以及ゆりかもめ線
JR山手線
起東京搭得最多就係山手線，佢係一個圓型，點都唔會搭錯方向，不過問題只係浪費時間。所以，起香港出發前，點都要背熟山手線數個大站名稱及位置，尤其「東京、品川、涉谷、新宿、池袋、上野(順時針)」這六個站，咁去到東京就可以去岩月台搭山手線。由於山手線月台通常都不是在同一月台，所以上錯月台又要落番隨道再去另一個月台。另外由於山手線係勁多人搭，所以非常之迫，尤其番工放工時間，所以小心財物。另一樣就係山手線列車內都用晒電子屏幕，顯示列車路線及轉車資料，其他站就冇了，全部都係由車長廣播，所以唔識日文都有機會會出事。
JR中央線
中央線打橫穿過山手線，所以由東京西去東或東去西，坐中央線再轉山手線，可以快十五分鐘。而中央線有分普通及快速線。主要分別係有啲站會不停站，但果啲站通常並不是遊客去的地方，所以建議坐快速線。在月台指示牌會列出普通與快速那些站停或不停，以及所需時間。
如果你有彩色Printer，最好印定東京區的JR火車及地鐵圖方便隨時囉出黎睇。
ゆりかもめ(Yurikamome)
ゆりかもめ係一條無人駕駛的空中鐵路，由新橋站去到豐洲站(2006年3月27日新加的，之前只係去到有明站)，不過如果你係電車男，搭ゆりかもめ真係可以令你變電車男。ゆりかもめ每一個站的案內牌、精算機及洗手間的發聲牌，都由一位名聲優錄音，包括有浅野真澄、山本麻里安、鈴村健一、森川智之、中原麻衣、鈴木達央、保志総一朗等等)，所以有興趣的話，可以先去新橋，買一張$800yen的一日任搭車飛，坐足16個站，去錄晒啲聲，然後就可以順路去台場Shopping。
其他小貼子
定休日
日本嘅舖頭都幾惡，成日都會有定休日，即係每星期或每個月都會有指定日子為定休，例如逢星期二、每月的三、十五、二十九日等等(每間舖頭都不同)，如果你今天去到某個勁想去的舖頭，但當日係定休，你都肯定黑到爆。我地就試過去中野一個大型專賣二手貨品的商場，點之當日係每月定休(黑到爆..)，成個場半個死城咁，唯有即改行程第二日再去過。當然你起香港唔會知佢地幾時定休，所以你一定要留時間，預正呢啲事就即變/改，尤其如果你係Last Day勁想去果個地方的話，咁就黑爆了，下次再黎日本再去過啦。
搭自動電梯
起香港，搭自動電梯大家咪會企起右邊，左邊就係留比人上落，但原來起日本關東地區(如東京)，就倒番轉，左邊係企右邊係行，咪企錯位，否則都幾核突。
的士‧巴士
起日本，咪搭的士，的士的最低消費等於你一餐飯，搭一搭你會破產。至於巴士，東京巴士同香港一樣，上車比錢，所有站一樣價錢，而且遊客未必識落車，所以坐番火車地鐵比較安全。
日語ABC
如果你好似我真係一句日文都唔識，咁你起東京真係死得。唔好諗住有人會識英文，我試過起大間的服裝公司及Animate比錢期間，收銀員不斷同我講日文，跟住我話我唔識日文，英文得唔得，條友會即話「唔緊要，有佢」。所以你係咁二都要學識聽基本日文，以下係我經歷多日聽番黎必要識的日文。
- 五十音表：平假/片假名都要背晒佢！背片假名好重要，因為好多外來語都係用片假名，尤其英文，所以識睇同讀片假名，都可以聽得番個英文。
- 數目字：0-10、百、千等等等
- 禮貌用語：多謝，唔該晒，你先，係，唔係，等陣，呢個丫，我明白了…等等…多到數唔到，記得幾多得幾多。
錢
日本貨幣由最低1yen到最高10000yen紙幣都有，硬幣有1yen,5yen,10yen,50yen,100yen,500yen。紙幣有1000yen,2000yen,5000yen及10000yen。
由於日本硬幣太多，搵會幾唔方便，尤其1yen,5yen,10yen 會較小用(通常係買野找錢番黎先有)，所以建議你得閒起Hotel就將啲硬幣過濾，將1,5,10yen抽走，留番50yen,100yen同500yen，方便搭車食飯囉錢時快啲。另外留意，入錢機(飲品機或購票機)都不接受1yen 及5yen，所以真係留黎交稅用(食飯買野時比晒佢)。
起機場用剩啲硬幣有咩用？
起機場離境大堂，會有幾部入錢汽水機，我就用晒啲散硬幣去買晒罐裝野飲番香港，飲完又可以留番個罐做記念。
小傻新，豆知識
最後一集了，每次諗豆知識都諗到頭爆，咁岩有一晚Jacky Jacky 一入Hotel係咁打電話黎，一聽電話就沙沙聲，後尾聽到係佢，之後搵番2b打比佢，話打黎問候我，比我屌咗佢幾句之後($8/min 漫遊)，重要話朝早打咗幾次電話比我都唔聽，我又屌佢起日本漫遊係廢的，因為好多地方都唔比講電話。所以今次就講下手提電話。
起日本，以我所知就有三大流動電話供應商，包括au by KDDI、NTT DoCoMo以及Vodafone。NTT DoCoMo 及 Vodafone 為3G(WCDMA)平台，各大本港3G流動供應商，而你的電話又係3G電話的話，都可以起日本漫遊(au.KDDI 用cdma2000)。差不多日本每個角落，都可以接收到，電話預設都會為你選擇當時最好的網絡供應商，所以去到不同的地方，有時電話會跳到 DoCoMo，有時就會 Vodafone。不過我後尾發現，如果個Network係 DoCoMo 的話，會冇咗來電顯示，但用Vodafone的話，就有來電顯示(唔知係咪因為我用Smartone關係)，所以如果你都係用 Smartone的話，最好起電話Lock住用Vodafone，咁就可以見到來電顯示。
新訂內容：最近發現有間可以起香港租日本電話的公司，可以揀日本電話唬碼或包埋飛線的香港號碼，如果你揀日本電話號碼Plan，接聽來電係免費，但用香港飛線Plan的話,接聽香港電話係每分鐘 $6 。如果你個電話冇3G去到日本冇漫遊，又或者你經常要聽／打好多電話，呢個服務岩晒你。
例 如你自己有啲好平的IDD 服務打去日本係平過佢($6)的話，你可以將你個手提號碼經IDD飛去果個日本號碼度，咁就可以平過佢，唔洗比佢賺。不過你當然要計埋租機錢同埋打番香港 的費用。如果你係經常要聽Call，當我好似$8/分鐘的漫遊錢，如果我只係計租機7日$280，唔計飛線的$4，($280/$8 = 35分鐘)講 35分鐘都回咗部電話租機錢，打番香港都係$6，都平過電話漫遊回撥的$8，如果你當部電話只係用黎去日本的朋友大家通訊(分開去街然後打電話約番一 齊)，都好過一個打IDD番香港，另一個就用漫遊聽番日本打黎的Call。不過都係果句，量多就抵，如果只係一兩個Call加埋都冇20分鐘的話，租電話 就真係唔化算。
不過，起日本漫遊，真係冇乜好處，點解呢？
- 漫遊費用貴，以我呢家用緊Smartone為例，呢家接聽本港來電每分鐘都要 $8/min，直撥打番香港要$13/min，用佢的回撥都係$8/min，如果你起hotel或街邊電話，用PCCW 的Calling Card的話，只需要$4，平一半。不過呢樣都算。
- 起日本，除咗起條街度，其他地方好多都唔比講電話，電話亦要設定為震機，有啲地方重要你熄埋電話。例如地鐵/火車車箱(月台可以)、餐廳、飯店、一些商場等等。例如我有很多時間都起火車的話，都不比講電話。所以日本人經常都會以SMS與其他人聯絡。地鐵/火車內的優先位(比小朋友/大肚婆/老人家坐)的附近，更加要你熄電話(但當然呢樣會冇人理:p)而起新幹線，只可以在每卡車箱頭尾的接駁位置講電話，其他地方如坐位內都不可以講電話。
點解唔比講電話？
- 講電話聲浪會影響其他人，所以只可以set震機同用SMS溝通。
- 電話的電波會影響大肚婆，同埋要用心臟病儀器的病人，所以要熄電話。所以，起日本漫遊，啲人次次打黎都係坐緊車或者其他，行得去車頭車尾/落車都收咗線啦。
所以，一係熄咗個電話，一係用SMS吧。所以我都係SMS番香港，每個$2.X(睇網絡)，至經濟實息又可以坐起火車地鐵都可以溝通的方法。
50000Yen遊日本！
哈哈哈哈，大家其實已經比我呃咗了！邊可能用5萬yen就可以遊日本丫…..由於Last 三日不停消費，條數已經亂晒，我都計唔番了，大約夾埋都洗咗七萬幾Yen度啦(當然都係未計酒店)，哈哈哈哈哈哈哈哈哈哈哈。如果你學咗咁囉住五萬Yen遊日本…….我…祝你好運…。
講下，如果你起日本唔夠錢，咁點算呢？
- 信用卡，日本好多大型商場都收信用卡，對番港紙都係貴小小，但都OK。
- 去郵局/便利店/銀行 ATM 禁錢，不過要留意，每次禁錢都要收手續費，所以係禁就一次禁多啲錢。
呢家日本對港紙大約一對六點幾，咁我心算通常就對六就算數，例如$1000yen 就即係港紙$60蚊，$650yen 就即係 $6.5 x $6 即約$40蚊。
鳴謝
呢九日行程真係驚險，但都安然渡過，當然要鳴謝同行的Hayami安排呢九日的行程，亦都要多謝啲客冇乜打黎煩我，否則啲電話費會貴到喊。
如果有機再會去日本的話…..
如果有機會再去，我一定會再帶備更多彈藥，再掃過，另外就係想去日本其他地方，例如大坂、京都、名古屋等等….另一樣就係，學好啲日文！變成「識日文的破財日本遊！」
後遺症
番到香港之後，你有冇以下後遺症？
- 自自然然講咗日文…
- 搭自動電梯企埋咗起左邊….
- 買完野比錢後45度鞠躬…
- 搭地鐵Set電話去震機而且唔講電話..
- 將Suica卡同八達通一齊放埋落銀包…
- more and more…
- 苦練日文，下次再戰日本！
旅遊/觀光, 消閒/嗜好
回應的RSS
暫時未有引用通告
2006年04月15日
唔識日文的自殺日本遊 DAY 6 之電波少年大戰三次尾道(3月29日)
三次同尾道都唔係外國遊客會去嘅地方，因為一來起關西，二來只係個好細的地方(細到就好似一個地鐵站名咁大，例如：旺角、尖沙咀咁)，三來就係對普通遊客黎講，呢度都冇野睇。但點解會黎呢兩度呢？其實係去睇番其中兩套漫畫/動畫裏面出現過的地方。
三次
三次位於廣島縣，係一個都幾細的地方。三次是漫畫/動畫「朝霧之巫女」的地方，由於主要都係影景點，都冇乜物別，詳情就望下呢個網址算啦。
http://william.memory-off.org/travel/asagiri/asagiri.htm
朝早天氣都好凍下，落住雪(其實只係冰塊)，起街道走黎走去，搵番個景點，又凍又濕，起條街不斷探路，完全就係電波少年。不過好快就搵晒啲景點。但由於火車趕時間問題，不足三小時就坐火車轉去另一個景點尾道。尾道反而多野睇。另外由於有時間，所以又去咗一間太型的百貨商場買野，買咗一盒特價(廣告推廣品)壽司($450yen)為早餐，係咁多日之中唯一一餐有壽司的餐。=.=
尾道
尾道其實都係好細，亦都係位於廣島縣，不過佢比三次出名啲，除咗多神社外，日本有幾套出名的電影都係起尾道取景(不過我就唔太識了)，另外，呢期日本勁推「男人的大和號」，裏面用400萬製造的大和號戰艦模型，亦停泊起尾道的。
而另外，尾道亦有一連串嘅神社，行五至十五分鐘就會有一個神社，多到嚇死你，如果你每個神社都入去拜一拜，你啲穿窿銀仔好快用晒。
咁尾道係邊套動畫的背景呢？就係「神中」(Kamichu)囉。佢以80年代尾道的背景為動畫的環景設定，尾道的家庭好多都係起山上面，石坂街就成為佢地生活的一部份。有關動畫出現過嘅內容又可以參考下呢個網：
http://www.burakuri.net/archives/2005/11/post_78.html
另外，尾道山頂有一個天光寺及展望台，黎得呢度都唔差在上埋去啦，你可以選擇行路上去(咪玩我啦)，或者坐鑬車($440yen來回)，不過個天光寺係起鑬車站的下方，所以又要行番落去(約二三百米)，而展望台就起鑬車站上方，所以最好先去展望台，再去天光寺(會冇咁辛苦)。展望台可以望到整個尾道市，以及造船廠。不過記住留番時間橫掃十個神社。
番東京
由於番東京都要幾粒鐘，所以又趕車走了。但估唔到，番到東京，等架地鐵開車，等到遲咗番Hotel，間房比咗個walk-in客，最後，去咗一間爛鬼Hotel，比原本果間Hotel貴$3000yen，而且Services超差，房內重冇得上網！冇法，唯有都要住一晚架啦…..
50000Yen遊日本！
差唔多洗爆五萬Yen，呢家重有$21231yen (HK$1402)，今次洗咗起….
三次壽司及麵包 $650 (HK$43)
尾道麵午餐 $420 (HK$27)
尾道 Locker $400 (HK$26)
尾道鑬車來回 $440 (HK$29)
飲品 $120 (HK$8)
尾道巴士 $140 (HK$10)
新大坂火車站內快餐店晚餐 $680 (HK$45)
六洗咗 $2850yen ($188)，餘下$18381yen ($1209)。睇黎 Day7-9都係食自餓餐的了。
小傻新，豆知識
今次講 Locker。一般黎講，如果你起Hotel check-out 咗，你都可以寄存住啲行李起Hotel，但今次，一日去三個地方，中間冇Hotel，咁唯有就要利用Locker了，日本好多地方都有Locker，包括火車站、地鐵、商場等等。Locker一般分三個大細，細中大，價錢由$300yen起(即日)，一般Locker都需要你即日取回物品，有啲就可以限你最長儲三日(但要入回每日的金額才可打開Locker)，幾日都唔囉番啲野的話，就會有人黎清你Locker。另外就係，越大的Locker係越抵，所以建議兩三個人夾份租一個Locker，經濟之如又可以用大啲地方。不過大Locker數量有限，尤其起東京呢啲地方，好快會比人用晒，所以真係手快有手慢冇。
預告
行程有變，為咗用盡張JP Rail Pass，增加一日行程去千葉，不過唔識路迷失方向。另由於最尾三日都起東京，所以會一次過推出三日東京站以及東京旅遊小手冊。(懶就懶啦！)
旅遊/觀光, 消閒/嗜好
回應的RSS
暫時未有引用通告
2006年04月14日
唔識日文的自殺日本遊 DAY 5 之熊本城大戰三次 (3月28日)
話咁快就 Day 5 ，今日主要起熊本市區遊下，晚上就趕車去三次。
黎得熊本就唔少得去熊本城啦！如果唔係都咪話你去過熊本。所以首站就去熊本城。
首先，可以起電車裏面買一日 Pass ($500 市內 / $700 全部)，Pass 包括搭電車及市營巴士，要留意起熊本多過一間巴士公司，有市營、產交等，坐咗其他車要另外比錢架，而$500同$700分別就係$500只包市內巴士，$700包全部巴士，而電車的話，$500同$700都包晒，所以買$500就足夠了。熊本的電車都好易坐，只係得兩條線，成Y字型，兩邊的尾頭就係去兩個不同的火車站，跟住之後的路線已經係一樣，所以你除咗要坐火車外，事彈坐邊架都OK。
一般坐電車巴士最低消費都$130yen，去遊覽，坐三四次都抵番起度，又唔洗因為坐一次百幾Yen而行一、兩個電車站。重有一樣，Pass附送幾張指定參觀地區的 Coupon，去到買入場券都會有折扣，所以抵架。
熊本城
坐電車去到熊本城落車，一落車就應該會望到熊本城，向入去行就OK了。一路行入去，都會見到好多櫻花樹，又係大殺菲林嘅時候。
買飛時，記得囉番張電車 Pass 出黎買，可以用$400yen 買(原價$500yen)，入到去記得起左邊嘅屋企邊打個印記，然後就可以入去熊本城了。裏面有幾間屋都可以參觀，包括天守閣、宇士櫓、數寄屋丸、飯田丸五階櫓等，不過本丸御殿就正進行復修，要2007年先完成。
天守閣重新裝修後，內裏成了一個博物館，展出不少熊本城文化歷史及收藏品，還有全日本其他城郭的介紹。而其他可進入的房內，可以看看房內的地板、觀看四周環境，而且重可以親腳踏下屋內地板。但留意，除了天守閣外，其他房都要除鞋進入，以保留熊本城400年之歷史遺產。
冇了！
其餘時間就係起熊本及南熊本周圍走，其中去過熊本Shopping Mall、路經 Alfa System、跟住已經要趕4小時車去三次。但由於hotel離火車站都約10-15分鐘車程，去到火車站已經得番最後五分鐘，要沖入火車站，跑去前三個月台再上電梯再沖去火車上車，miss o左呢班的話，就去唔到三次。
由熊本坐火車去博多，再由博多轉新幹線去廣島再坐普通火車去三次，不過每班車都要趕車，根本冇時間食晚餐，所以晚餐都冇得食，只可以食早兩日起100Yen店買落的餅當Dinner。由於係普通火車，要坐近個半小時，而起坐緊期間，外邊氣溫急凍，重落起雪，幸好在熊本shopping 期間，去無印良品買咗件厚衫打底(原價三千多Yen，特價二千六Yen)，因為聽朝一早7AM就要起身準備起程去睇三次。但不幸的事，就係出咗火車站，雖然停咗雪，但就落住雨，落住雨咁沖去Hotel，衰在起最後一個彎口炒車，車上的長崎名物個紙袋跌咗落水，紙袋底溶晒，連盒枇杷都溶咗個底跌晒出黎，好在，裏面啲枇杷係獨立包裝，否則就傷忙慘重。
電波少年
呢幾日我都要一條友囉晒呢幾袋車，跑上車、落車、去Hotel，但第二朝早上checkout 後都會寄存啲行李起Hotel，到夠鐘上車前先會番Hotel囉再去火車站。但火車每次都要坐幾粒鐘，而且重要轉幾次車，都咪話唔辛苦。聽日重大鑊，朝早先起三次食雪，中午坐三架火車去尾道，晚上再轉三次火車+一次地鐵番東京Hotel。啲行李點算？
日語一分鐘
今日日語一分鐘又番黎了，今次又儲埋一堆起街邊見到的日文，呢啲起碼都要識呱。
片道(かたみち) - 單程
往復(おうふく) - 來回兩程
有料(ゆうりょう) - 要錢
無料(むりょう) - 免費
バス - Bus/Bass/Bath
ブラック - Black (黑色)
クリーム - Cream (奶)
50000Yen遊日本！
繼續 50000Yen遊日本，其實已經得番二萬幾Yen，點算，所以已經開始進行唔洗錢大行動，如非必要，都唔買！但衰在起件無印良品度………尋日餘下$25714yen(HK$1698)
熊本電車/巴士 Daily Pass $500 (HK$33)
熊本城入場費 $400 9(原價$500)
私營Bus $100 (HK$6)
午餐 $620 (HK$40)
便利店食+飲野 $228 (HK$15)
無印良品件衫 $2625 (HK$173)
起廣島火車站買咗杯咖啡取暖 $100 (HK$6)
共洗咗$4483yen ($301)，餘下4日，重有$21231yen (HK$1402)。
小傻新，豆知識
今日講一樣野，叫「食券」。食券就好似香港去大家樂排隊買飛，然後行去比張飛呀哥等囉野食。不過有唔同嘅，同就洗乜起度講。日本有很多餐廳都係以食券賣飛，入到舖頭，行去部食券機，入錢，揀你想要的野食(例如乜乜飯/餐)，跟住就會跌張飛出黎，如果你要再買就再禁另一樣食物，攪掂就禁另一粒制，就會找番錢比你。食券機都可以入$1000紙幣，有啲重可以入$10000紙幣，所以囉啲$10000yen銀紙打散買野都方便。
當你買完食券，就囉住張食券去搵位坐。坐低之後，待應就會走埋黎囉你張食券走。你只要安座同朋友傾下，待應就會送上你買的食品。食券有咩好？對於唔識講日文的我，對住部機入錢就可以買到野食，不知幾方便，你叫我去間要用口叫落Order的舖頭，咪玩謝我？所以如果你唔識日文，去呢啲用食券買餐的舖頭，勁方便。另一樣就係，通常你坐低之後，待應會囉一樽凍水放起你檯面，飲水就自己黎了。有啲就會有部水機起出面，你自己囉隻杯去加水飲。
次回
起三次8AM起外面食住雪咁行，凍到隻手硬晒，再去尾道上山落山掃古寺同山屋。晚上回東京比地鐵遲開攪到冇Hotel住，差啲流落街頭！明天繼續電波之旅。
DAY2 豆知識跟進
Day2 豆知識講過關於火車，啲椅倒轉，終於比我見到了，當架新幹線到總站，工作人員就會上車清潔，一面清潔，一面就將椅轉每架車箱都會有一至兩個工作人員車頭/尾咁轉，所以大約十五分鐘內就攪掂。
旅遊/觀光, 消閒/嗜好
回應的RSS
暫時未有引用通告
2006年03月31日
唔識日文的自殺日本遊 DAY 3 之長崎初體驗 (3月26日)
DAY 3 終於開始正式旅程，今日主要起長崎同附近地方走兩走，不過朝早天不造美，有小小雨，所以就要去便利店買把遮($420/HK$28)，把遮透明膠，幾精美(極有無印良品Feel)，不過發現，起街搭車／巴士，見到勁多人用呢隻透明膠遮，得一兩個用其他遮，古怪。
今日去過的地方主要係起長崎南方，包括海邊的聖母教堂及神像、諏訪神社、風頭公園、坂本龍馬像、路經眼鏡橋、諏訪町商店街購物，路經長崎県美術館、長崎水辺の森公園。原本晚間的鑬車上山就改為明天。行程緊密，重急過旅行團。
諏訪神社
睇得多巫女的動畫，但真的巫女就未見過了，真係著到同動畫一樣。另外入到神社當然要求支簽同拜過神啦。入神社首先要洗手，又有步驟架，「先洗左手，再洗右手，再用水洗口。」唔明就看圖啦。
但原來拜神都有規矩，先拋個銀仔入箱，個銀仔最好係有個「窿」起中間(例如 $50yen)，跟住先兩拜，再讀經文(一大段日文:p)，跟住兩拍手，再一拜。另外，求簽另計了，要$200 yen，當然，你唔比錢都冇人知架啦。
咁我好乖的，一定有比錢:P，至於求到乜簽？呢支簽都OK架，話我咩都會好平穩咁囉(廢話咁)。如果你抽到支壞簽，就要將支簽起樹枝上打個結。另外，呢間神社專做戀愛，所以都見有對情侶黎拜神，簽都有得抽，不過我就冇抽了:X。你重可以比錢買個牌，寫上你的願望掛起個架上面架，不過我冇咁多銀兩了。
風頭公園
主要黎係睇櫻花，我地囉住個便當起山上面食，真有另一番風味(食風果隻風:p)。而且，一路食，下邊的櫻花大會(飲酒大會;P)不停有人起度唱民歌，真係入晒鄉。呢啲賞花同埋唱歌，真係動畫睇得多(例如相聚一刻)，電視劇都好小見。風頭公園入面亦有坂本龍馬像，你識佢嘛？我都冇乜印像;P
諏訪町商店街
Shopping 的時候到了，不過主要都係買咗啲手信(買到破產;p)，至多買咗啲乜，就暫時保持神秘先。另外買咗一個ipod shuffle 膠套比自己，呢啲Product 起Website 就見得多，香港賣果啲勁 Cheap ，日本果啲真係差10條街。
長崎水辺の森公園
水辺の森公園係位於「出島」長崎港海邊的長濱公園，面積勁大，境式優美，所以大殺菲林。唔鍾意影相的包補悶親，由於對面係美術館，公園裏面亦有不少美術品，主要以石為主，另一邊就有花花草草及橋。
貴價中華料理
晚餐去咗呢間中華料理食，試咗呢個滑蛋飯，極之好味，又唔係太貴，加一個士多啤利布丁，再加$100有任飲野飲，落樓都係$1139!!!!開始食得富貴了！！不過真係幾好味。任飲我飲咗佢兩杯沙冰，就好似七仔的思樂冰咁囉，但好飲過香港七仔。另一樣就係落單唔洗Fing手叫Waiter，檯面有個鐘，一禁，入面有個Screen會見到邊張檯禁o左，就會順次序咁去你檯落Order，落Order都係Remote囉住部NEC機仔落，勁方便。
冇手囉野
越買越多野，但手就得兩隻，唔夠手囉亦冇野裝住，所以最後起100yen店(香港叫10蚊店)買咗卷膠紙，痴番個紙袋….
巴士電車初體驗
坐火車、地鐵，上車前買飛，落車入飛，極為簡單啦。但長崎，主要係得巴士同電車，就唔同了。不過，巴士都極為先進架。香港坐巴士，咪只係得分段收費，而且重要係越遲上車先有得平，而早上車早落車就冇，一定要比正價。日本就唔同了，日本的巴士起車尾上車，上車時先要囉張飛，飛會印住一個號碼，車頭會有一個燈箱，會顯示現在落車的話，要付多少錢，你就看你的號碼，再看燈箱就知幾錢，即係，搭幾長比幾長，就唔會話搭一個站都要比全費。
不過你又會問，你落車比錢，啲錢Dum晒落個收錢箱，次次唔同銀碼，又點會知呢？原來部錢箱好勁架！你一次過Dum啲錢同飛落去，佢就識得掃你張飛仔係咩號碼，重識得一次過數埋錢，跟住顯示出黎，時間只係一秒攪掂，另外重會顯示埋呢程嘅價錢同你入咗幾錢，冇得呃，岩數就會播音樂。上到車，冇散紙又點呢？部錢箱包埋散紙機，入一千蚊紙或五百yen硬幣就可以換散紙，勁巴閉。咁當然除咗比現金之外，重有類似八達通的儲值卡，上車do一下，落車do一下，非常簡單。但係，長崎嘅巴士係好唔掂，起車站度係冇路線圖，你唔會知架巴士經咩站，所以你最好上網check定。至於電車，起長崎，就係全部$100yen，不過有一個轉車站，落車時問司機囉飛仔，去對面月台轉車，落車入飛仔。
50000Yen遊日本！
繼續五萬Yen遊日本，尋日有$40481Yen (HK$2673)，今日就…
遮 $420 (HK$27)
巴士 ($230 + $230) = $460 (HK$30)
午餐便當 $420 (HK$27)
乗合タクシー $200 ($13)
ipod case $980 (HK$64)
手信 ($1060 + $820) = $1880 (HK$124)
晚餐 $1139 (HK$75)
今日貴了，用洗咗$5499 ($363)，餘下6日，有現金$34982yen (HK$2310)。
大鑊了，重有六日，咁除法，每日得番$5830yen (HK$385) 可以洗，而且last 兩日冇 JP Rail Pass，搭火車自費，貴了。
小傻新，豆知識
今日講下長崎「泥猛的」。外國人可能唔知咩叫「泥猛的」，即係幾個人夾埋一齊坐的士，去某一個地區，通常係一啲遠的地區，例如由旺角去屯門，一個人坐的士就要二百幾蚊，但幾個人坐，每人除開咪幾十蚊，咁呢啲就係叫「泥猛的」。香港的「泥猛的」係非法的，不過，起長崎，就有合法「泥猛的」，叫乗合タクシー(Taxi)，但車就唔係普通的士咁四人坐位，係七人坐位的客貨車Size，主要係去山上面的住宅區。路線係固定，你可以隨時落車，價錢固定$200yen，上車付款，都幾方便，我地就係坐呢架的士上去風頭公園。
用實例學日語
蘇民峰都用實例教風水，我都用實例學日語。今日的實例事件：
坐乗合タクシー，落車時，唔小心成個頭撞落車頂，Bomb一聲，個女司機嚇到大叫話「帶左BU？」(大丈夫)，咁你要點答？比三個答案你揀：
A. 小男人！
B. 帶左BU (大丈夫！)
C. Fine, OK.
答案：當然係B啦，答A果個真係低能。答C，你講咗等於冇講，因為都唔係好多人識聽英文。答B就最好了。日本話有樣特點，好多基本對話，人講乜你講乜都冇問題，例如「呀Le架多」(多謝)呀，「多佐」(你先丫)等等，佢講同我講都得。其實重有 D ，就係唔出聲，扮啞 :X 。
預告
Day 4 繼續長崎之行，一日內夾埋洗咗近一萬Yen呀！Day56789要起街乞食了，一係就餐餐$399便當。另外重有長崎特產カステラ (Castella) 洗腦之迷。
旅遊/觀光, 消閒/嗜好
回應的RSS
暫時未有引用通告
2006年03月28日
唔識日文的自殺日本遊 DAY 2 之東京國際動畫展2006 (3月25日)
由於行程關係，無法於Day2 晚寫起個Blog，冇法。Day2 全日就只係得一個行程，就係去東京國際動畫展2006。但場內大部份地方都禁此攝影，所以唔可以狂影相。
裏面分為幾部份，有一些歷代動畫家的介紹展館，另一個是動畫製作過程的介紹展出，例如點樣去作啲環境聲音等等，還有介紹一些有名的聲優，以及播出配音動畫的片段，包括有綠川光、川澄綾子、林源惠、石田彰、保志總一郎等等。
最有趣的是有兩個可以比參觀者試玩的配音「街機」。你可以選擇動畫/情節，然後畫面會先播放原裝配音版，播完一次後，就到你聽住及對住咪配番出黎，畫面除了有片段外，還有對白，以及評分(相似度)等，極為有趣。另外還有一些原畫展出，以及新進動畫/設計家的展覽。 (由於以上內容都唔比影相，所以大家估下係點啦)
返回主題，其餘的地方就係各大動畫製作商 Show Off 時候，你Up得出的都有（例如：AT-X、avex、Bandai、BROCCOLI、DENTSU、GAINAX、KONAMI、MADHOSE、NHK、PONY、STUDIO 4C、SUNRISE、TV Tokyo、WOWOW、XEBEC、等等等等，主要都係宣傳呢家及將會播放的動畫節目，狂派大量單張、Postcard等，另外還有Stamp印，例如地獄少女、EVA、柯南等，去晒指定的booth 印晒d Stamp 就可以換取禮物。另外當然重有一些宣傳的Function，例如聲優、歌手等等啦。亦有一啲冇乜興趣的booth，例如動畫/聲優學校、堔圳/北京的 Production house、反翻版booth (展出好多香港翻版DVD)等。
場內重見到一隊美國的Anime Press 攝制隊黎訪問特登由美國黎的參觀者，我行咗幾個轉，都見到二、三十個外國人，都算難得。原本我重想影架IGPX的模型車，但被職員話唔比影相…喊…
睇完就用咗七個鐘時間由東京坐車去長崎。
由於用Rail Pass 關係，唔可以用啲特快火車(即係唔係站站停)，所以就要買啲站站停的火車，另外就要轉幾次車，總共轉咗三次…未計之前重要搭一次地鐵加一次火車去品川。不過，用七個鐘嘅時間就由東京去到長崎，日本的子彈火車真係好鬼快。
不過，由於趕火車，冇時間去食飯，所以晚餐就只係呢幾件麵包，咁午餐呢？就係399yen 起便利店買的意粉便當。好似電波少年走難咁。呢樣都算，跟住不幸的事件就發生了，入住晒動畫展D單張的紙袋，一出長崎架火車，未行到去出閘，就爛咗了……….幸好還頂爛上咁番到去hotel。
點算一下，原來囉咗好多好多單張、Card，重有Files同埋雜誌。
50000Yen遊日本！
今日，真係買嘅野，就只係起場內的Keroro公仔，300yen，平到嚇死你，緊係要買啦！
尋日有現金 $42920 yen (HK$2834)
減去今日支出：
搭車 ($230,$320) = $550 (HK$36)
飲品 ($150,$140) = $290 (HK$19)
午餐 $399 (HK$26)
Keroro公仔4盒 $1200 (HK$79)
共用了 $2439，餘下7日，有現金 $40481yen (HK$2673)
日語一分鐘
經過呢兩日，精選咗啲成日用到但你唔識就唔掂嘅日文！搵個唔識日文嘅我黎教日文，教錯大家咪大檸樂？嘿！
切符【きっぷ】 －車飛咁解，搭火車，間唔中會有職員查飛，唔識就唔知佢做乜了。
激安【げきやす】 －起街邊啲Banner會經常寫住「激安」，意思就係貨品減價去非常便宜，近似「割引」【割引】(減價)。
大盛【おおも】－個午餐意粉咪印住「大盛」，即係比一般大啲的器皿。就好似老麥的「加大」。
間も無く【まもなく】－搭地鐵火車經常都會聽到廣播，一開始就講「まもなく」，原來係解「即將」(Soon)，[好快到下一個站，東京。]
生命【せいめい】－間唔中會見到一啲公司招牌，XX生命、YY生命，呢啲公司係做保險的，而「生命」就係指人壽保險。
小傻新，豆知識！
今天繼續豆知識，今日講下火車。每架長途火車車位都有一個火車指示圖，講每架車箱的設備，例如邊個車箱有洗手間、可以講電話等。留意一下個圖，佢寫埋車頭同車尾係邊邊。咁你會問，咁樣，回程車又點呢？個人倒轉坐？架車只係單程，來回有兩架車？
原來係車底有個腳制，一踏落去，就可以將成排兩個坐位倒轉。咁，每日都要咁轉有位，咁咪用好多人力？另外，車票有分三種，自由席，指定席(普通)以及Green Car 席。自由席即係冇劃位，咁你就要同人迫，指定席即係劃位，咁就保證有位坐(Miss 咗班車另計，Miss 咗的話，你可以坐番同一日的車，但只可以去自由席)，咁咩係Green Car 呢？架車環保啲？原來係解頭等車卡。不過我眼見，頭等真係冇乜人坐-_-。
預告
Day 3 及 4都會起長崎，而Day4 夜晚就會坐車去熊本，主力推有內容有「巴士、電車初體驗」等等！期待中。
消閒/嗜好, 旅遊/觀光
回應的RSS
暫時未有引用通告
2006年03月26日
唔識日文的自殺日本遊 DAY 1 (3月24日)
一連九天的日本遊終於到來了，雖然尋晚起街玩到成兩三點先番家清埋要帶去的行理，在六點準時出發坐一粒鐘平價巴士去機場，然後等Check-in 及上機。估唔到行程一開始就帶為好運，由於為了同我另一個朋友一齊坐(他當時在香港站Check-in，我就準備在機場Check-in)，將我們由經濟位升級到商務位！！商務位服務同野食都差好遠，而且重有大班倚，岩晒尋晚玩到直落未訓過的我。
一個識聽小小小小小小小小日文但唔識講日文的我，去到日本會點呢？我已經有兩手準備。包括咗 PSP 的Talkman，哈哈，係咪真係Work，咁就要遲下先知了。另外我亦有一本手指日語的書，隨時緊急時候可以用，不過，通常緊急的時候，呢啲書都係未必有用，因為書裏面冇你想講果句日文。
其實呢九日會去邊度呢？對我黎講都唔重要(雖然我起呢一刻係唔太清楚:P)，但黎到日本已經係我其中一個夢想，不過呢家已經實現了。日本24時遊記現在開始！(以下時間全部以日本時間為單位。)
2:20PM一黎到日本開著個電話，就已經比Mailbox 不斷打黎，但我又唔想聽，因為一聽就8蚊，而且重可能係啲好無聊冇留Mail的電話，所以都廢鬼事聽了，留番去到Hotel 上到網搵個HKBN 2B 打去聽下 ($1，都好過$8 係搵吉)。
2:45PM好順利咁過咗開關之後，就開始進入日本世界了！
3:29PM 坐緊JR出東京，大約要坐一小時。
4:30PM 不斷轉JR，路經秋葉原 (電車男!!)，然後到達淺草酒店checkin。上到房就急試HKBN 2b 電話，點之唔work ~_~不過又趕住走去池袋了..
4:58PM 起TSUKUBA Express打SMS比香港同事，睇下可唔以起個VPN黎。
5:30PM坐咗半個鐘JR終於到池袋，終於有機會入一入animate, k-book 等動畫舖頭，不過就冇買任何野，因為day2 已經要去長崎，遲下番黎東京先買。
7:30PM 去咗UNIQLO 掃貨，掃一掃就買咗四千五Yen 衫。價錢真係同香港差唔多，不過款就新同多。
8:15PM 日本啲商場舖頭，八點就關門，真係悶到爆，跟住起池袋食咗餐買飛仔的飯。不過我啲日文真係勁唔掂，已經變咗個啞人。
8:45PM 諗住過一過去涉谷，但最後都係繼續起池袋動畫舖頭睇下。睇得最多係啲三仔商業漫畫/同人誌。佢地幾有趣，有啲新書就會包一本Demo比客睇，有啲同人誌的書就會影印兩頁出黎縮細貼起本Sample書度比你睇。(比你睇晒成本重睇買:p)但影得果啲都係三級部份。另外，有啲新書，重會放大影印咗書中三級頁內容做Sample貼起度比你睇，有啲重係彩色，舖頭入面重幾多日本男人黎買。
10點回Hotel作今日檢討。坐番Free shuttle bus 番hotel，上網問番send 比sms 的同事，問佢幾點收到，大家對番，都係4:58PM，漫遊SMS 都即時收到，果然勁！起咗VPN後，終於可以HKBN 2b 同VNC 等等，另外重睇埋cable news 。(同自己起香港有咩分別?)
50000Yen遊日本！
我身上，扣除頭七日JP Pass 、hotel同機票呢啲開支，只係有5萬Yen，咁我呢五萬Yen 點洗呢？
今日洗咗….
搭一次TSUKUBA EXPRESS 由秋葉原->淺草 hotel ($200)
買一張TSUKUBA EXPRESS 1千Yen 儲值飛 ($1000)，後尾知有儲值飛，唔洗下下買
買咗聽日Anime Fair 入場飛 ($800)
UNIQLO 掃貨($4520 連稅)
晚餐(松屋) ($560)
餘下8日，有現金 $42920yen
每日檢討！
日文都係一個好大問題，發覺連買野，個收銀講乜都唔知，一咪點頭:P，最後找完錢多謝我我又唔知UP乜。係食飯果時，討論過，叫哥哥仔比杯水我日文係乜。(以我的日語程度，就會講：「書呢媽聲，ME書屙呢佳司乜。」(中譯：唔好意思，請給我一杯水。)，不過我朋友就話可以囉起隻杯講：「屙多嘩LEE。」(中譯：再來一杯)。
我係時候囉部talkman 出黎望番啲場境，練番幾句基本日文先。
小傻新，豆知識！
每日都會將起日本見到的新奇事，揀一樣較特別講比大家聽。今日講呢個靜電板。呢塊靜電板起我住間hotel 的lift 入面貼咗起度，原來係話日本冬天靜電好勁，你出街前/番黎時，將手放起呢塊靜電板，就會吸收你身體啲靜電，咁就唔怕開門開電器時比靜電電到。
消閒/嗜好, 旅遊/觀光
回應的RSS
暫時未有引用通告
2006年03月25日
(1) 
Castella 係長崎的特產，雖然你起東京等大的百貨商店都會搵到特產的專櫃，但呢個長崎買的版本，會寫明係長崎總站版本。Castella 係蛋糕，外貌就似香港餅店一片長方型的蛋糕，但非常好食，食完會讚不絕口。Castella的由來？當然係Ask google 啦。一條Castella大約500-600yen，睇你買邊間品牌，我之前就食過文明堂（朋友起日本買黎香港請我食），覺得很好味，所以今次都係買番文明堂安全啲，價錢平貴已經唔係問題。
