網上行翻新相簿 snaap! 大測試

網上行以前已經有Net album 服務，不過今次重新包裝，加強功能，變成一個snaap! ™ 品牌，以簡單的界面，一站式服務，多媒界的睇相方式，主攻家庭市場。snaap! 有幾勁？即刻黎做個測試先。(以下內容唔係hard sell 佢架，我真係試完係咁照寫出黎)

上會先要自認係 Fans

要加入 snaap，首先你要係 PCCW 的 Fans，即係你要用兩項 PCCW 的服務，如果你係 netvigator 的寬頻用戶，再裝埋nowtv或者用PCCW家居電話，咁你都入到會，如果你好似我唔係 netvigator 寬頻用戶，但你屋企電話係用緊 PCCW，只要順手登記埋你個電話去IDD服務，咁都夠兩樣，又或者你係用緊 PCCW Mobile (SUNDAY)，再事彈申請埋你屋企個非PCCW家居電話去 IDD 0060，咁又攪掂。好在我重有個 $50 一年的 hkstar 撥號戶口 + IDD 0060 ，咁樣搭夠兩樣，都可以免費入會。免費的會員包 100MB 儲存空間，但如果到時唔夠用，你就可以每月交$38，每月除咗有5GB容量外，重送你每月曬 20 張 4R 相(以每張 $0.8計..都成$18架)。

上載工具簡單易用

成功入會後，第一件事緊係upload相啦，你除咗可以經web base 一張一張相咁upload之外，亦可以用佢個snaap 上載軟件，然後一野揀一堆相upload，重可以upload 前resize張相個size或者 Crop番去 3:2 Size (4R 比例)。如果你係電話snapshot迷，同時間用 symbian os (Nokia)電話，同埋用 PCCW Mobile的話，亦可以裝佢個 symbian 版本，直接經電話將相同影片upload上去。不過我唔係nokia fans(超憎:P)同埋我亦唔係用pccw mobile，所以冇得試。

裝咗隻 snaap 上載工具後，開始時你要先填番 netpass 個戶口資料，咁就可以加相了。加相後，你可以剪裁張相、轉方向，或者用佢的工具去Tune 番張相。(不過我都不太相信，所以你一係搵其他software tune定先，例如Adobe Photoshop、PhotoImpact、Picasa等。)

另外上載工具支援JPEG、BMP及 TIFF 相片格式，而 Video支援手機 3gp, mp4, avi, wmv, mpg, wmv 及 flash flv，但就唔支援 RAW，所以如果你影 RRAW的話就先要轉番做 JPEG先。

除咗呢啲之外，你重可以同啲相加水印 (watermark) ，咁就唔洗張張走去改再加野，人地偷你啲相用都有你個水印。Watermark 你可以自己整個Logo放入去，亦可以落透明度及定大小及位置，都算係非常方便及易用。不過你要留意就係，加咗watermark後上載的相，如果你囉去沖曬的話，啲樣都會保留番個水印，所以如果你諗住放上去係比朋友曬的話，咁就唔好加watermark了。

岩岩花展完，我就搵咗幾張花展的相，試下放上去睇下，揀好相後，禁上載，佢就會彈出黎問你放去邊個相簿，不過佢只係支援一層的相簿，即係你唔可以分幾層咁去放啲相。相簿分為公開及私人兩類，公開即係其他人都可以睇到，而私人就係密碼保護，你可以設定密碼，透過電郵將開啟相簿的連結發送給你的朋友，朋友要輸入密碼先可以睇到。

可經網上Crop及Rotate相亦支援hotlink

Upload後，再望番snaap 主頁，就即刻可以見到花展個相簿了。裏面有一條網址，如果你想比呢個相簿朋友睇， Copy 呢條網址就可以了。另外亦可以起呢版去複製或者搬啲相去其他相簿、刪除圖片，或者揀啲相去沖曬。

畫面左邊有一個相簿資料的顯示格，做到懶係好似數碼相機果啲格仔字，覺得有啲白痴，又唔係太好睇，其他版都有類似的畫面，用番右面呢隻Design Style 咪好好睇睇，攪左邊呢件野真係破壞晒成個畫面。

你可以每張相去輸入說明文字，或者再編輯、剪裁及轉方向，即係就算你冇起個上載工具做到，呢家都可以做番。另外亦可以見到 EXIF 的資料，例如用咩相機影，光圈快門設定等。我上載果時加咗個水印落去，所以張相右下角就有個水印圖。起相的下面有條link，係可以直接睇到張相，即係可以直接hotlink。

簡單講下咩係 3:2 先，一般平的 DC 數碼相機(非DSLR 單鏡反光機)，所用的比例係 4:3 (例如 800x600, 1024x768)，但如果你想曬出黎的話，3R 的比例是 5:3.5 (1:1.43) ， 4R 的比例是 3:2 ，所以大家比例不同，就會出現需要剪裁，如果你唔想留白邊，又唔想曬果時電腦亂咁裁，咁你就可以預先以 3:2 的比例框裝咗想要的畫面用黎曬 4R，咁就Good拿。不過呢，佢個剪裁功能係冇3R的比例，所以如果你曬 3R 的話，除非你預先起電腦搵軟件裁番岩個比例，否則點都會比佢切咗，呢家佢曬 3R 同4R 都係$0.8，如果你唔係入 3R 相簿，咁緊係曬4R啦，大張好多播。

snaap 的相sorting 幾好，完全係drag & drop，低能的都應該識用。之前咪講過每張相可以直接hotlink，但如果你比個相簿的網址朋友睇，果個就會係一個 Flash 相簿黎，裏面可以留言、剔指定的相出黎一次過Download(會將已選擇的相壓縮為一個ZIP檔)，遲下重可以揀黎沖曬(未推出，可能係未攪掂公眾用戶點收錢問題)。

於NOW TV 一家大細齊睇相

snaap 除咗可以起電腦睇相之外，佢重話明係四大平台，起PCCW流動電話、NOW TV 電視及PCCW固網(未推出)都可以睇到相，起電話睇都OK的(Just for Fun)，起電視睇又會點呢，即刻開個 NOW TV試下先，禁去 508台，就可以進入snaap!登入畫面。

用你登記的手提電話號碼登入後，主頁就係你的相簿，直接選擇你想睇的相簿禁入去，你可以每張相揀黎睇又得，開啟投影片模式等佢慢慢播又得，由於電視的解像度比電腦較差，所以睇落都唔會覺得太差的，不過唔知點解張相打直的時候，佢Show唔晒全張相，頭尾冇咗。

公開相簿偷睇人地啲相

如果你將相簿設定為公開的話，其他人就可以起「館友相簿」入面睇到晒你啲相，所以如果啲相有你個樣，你又唔想比人睇到的話，你都係唔好設定做公開了。不過由於佢係「自由」性質，發現有啲用戶將啲電視畫面上載上去，又變另一個Youtube咁-_-。另外「下載」的功能係唔支援Video，即係你唔可以Download番人地啲片落黎，不過如果你識電腦，應該都可以用啲 Flash Movie Downloader 的程式偷番佢落黎的。

一站式服務可曬可做精品

做生意，當然要搵錢，比你免費放100MB野又點搵錢呢，當然要攪啲搵錢工具啦，除咗可以曬出黎之外，重可以用相去訂製精品，佢曬同做精品都係同快圖美合作，用富士激光沖印，所以質素都有保證架，至於價錢方面，美好的回憶唔係用價錢黎形容，正如你去旅行都買唔少手信啦。 XD

佢曬 3R 同 4R 呢家都只係 $0.8 (直接經快圖美網上印相服務呢家做緊優惠係$1)，咁不如試下曬啲花展相出黎睇下啦。

只要起番相簿入面，剔番你想曬的相，再禁「沖曬」，就可以在購物籃內，選取要曬的相片大小，每張相都會顯示沖曬質素，如果你上載的時候選擇了較低的解像度，沖曬出來就會欠佳。

另外在最頂的位置，你可以一次過設定將所有相片沖曬那一個大小及數量，無需每張相Set，不過要小心記住要揀番3R/4R先(下圖紅框位置)，因為佢預設係2R，揀錯咗就每張$3 了。另外亦可以選擇是否列印日期、留白邊或全紙出等設定。但這三個設定係代表全沖曬相片，睇唔到可以每張咁獨立設定。再提一次，如果你係用普通數碼相機影，最好都係自己先去剪裁張相去適當比例(例如 4R係 3:2)，好過「全紙出」的時候，曬完出黎冇咗個頭或者手。

$0.8 曬一張，佢有冇最低消費呢？我都Search 過下Forum，有啲人話快圖美舖頭要最少曬10張或曬10蚊，起Google Search番黎的 Sina +快圖美，最低消費為 $12，咁snaap 係幾錢呢？真係禁極都唔見有文章講，最簡單方法就係，只係曬一張試，當確定之後就出現句錯誤訊息，寫住「最低消費 $4」，嘩！抵到爆，$0.8一張即係最少曬5張。

唔好咁衰啦，曬夠6張啦。咁去邊度囉相呢？原來可以起任何一間快圖美取件，快圖美唔就腳的話，又以去 OK便利店都得，如果你唔趕，又唔想行，寄比你都得！香港地區重係免郵費，曬$4佢重要貼$1.4郵費比你，真係賤到爆。

快圖美囉相的話，早上 8點前落單，中午 12點後有得囉，我朝早5點半落單，即係訓醒就有得囉，快靚正。如過過咗8點，就要第二日12點後有得囉，都OK的。當你填晒啲資料後，佢就會確認你張訂單，然後將你啲相 Send 去比快圖美，錢就會經網上行張單收你錢，即係「後數」，又唔洗填信用卡資料，幾好播。攪掂晒之後佢會有一個訂單編號，你只要抄個訂單編號去快圖美/OK便利店囉相就OK，非常簡單，重唔洗比$4.8咁鬼「寒酸」。

正當等候佢 Send 啲相去快圖美時，就彈出了 “Failure” 的訊息，衰咗！再番去交易記錄度 Check 時，都出現不成功的記錄，唔通快圖美個system有事？定係我黑爆？定係又好似電影節個system咁勁多bugs？

再試多一次啦，經過不斷咁又重覆的輸入…以及耐心的等待，終於成功了，email box 亦會收到佢的確認電郵，裏面會有寫到個訂單編號的，所以唔記得抄個畫面個no都唔洗驚。

相片到手，佢有一張用相紙印的「單」(應為2張，一張簽收佢收走，另一張比番你)，裏面重有snaap!的logo，果然係相紙呢家唔值錢。真係$4.8完全冇附加費，超值！啲相曬出黎真係好鬼靚(唔係講我拍得靚XD)，$0.8真係超值，不過再提一次，如果你用過水印的話，曬出黎的相都有水印的，所以記住再upload過啲冇水印的版本，揀錯咗的話，就會好似下面咁…柒到爆 =.=(我明明係delete晒所有舊水印相再upload過先曬，點解會咁架…….)

總結：攪咁多野，都係想你比錢

總括黎講，snaap! 的確幾易用同user friendly，曬相又平(@$0.8 3R/4R)同埋最低消費只係4蚊，的確好抵玩，不過100MB的話好快會爆，如果你一張普通的 JPEG 相要1MB的話，咁即係只可以放100張相，所以其實都有啲局你上會 Feel ，另外當然係幫快圖美曬多啲相啦，由其呢家個個都 DC 唔曬相，相舖生意更難做，如果你上會，但你又唔曬相的話就蝕咗每個月20張相的Quota比佢，所以係咪騙案，你自己決定了。

所以如果你啲Friends 想曬相，但數量又唔係太多的話，你不如幫佢曬，一來可以用你個Quota，二來又平啲，再衰啲的話，收番佢錢，當補貼月費，賤人就係咁黎，嘿！

附加資料：電視相簿

NOW TV 的snaap!相簿，即係可以透過電視睇番自己的相片，你可能覺得係全港首創，但其實香港寬頻數碼電視 (HKBNTV) 起兩年前(冇記錯的話)已經有一個「相簿台」，你可以將相片 email 去一個指定的電郵地址，佢就會將啲相放上去，不過乜功能都冇，例如冇得分相簿，冇得睇 EXIF 資料，你又冇得經 Web 去攪啲相，你亦睇唔到其他用戶的相，連每個用戶有幾多MB放相都唔覺有講。