庶民 Macro - Extension Tube + 長焦距手持攝影小測試 - 新 BLOG

庶民 Macro - Extension Tube + 長焦距手持攝影小測試

Macro 我真係冇乜幾何會玩到，除非自戀到將自己啲玩具模型不斷放大，再變態到將女模型「特別部位」放大狂拍，否則冇乜幾何用到。但「機」佬每年總有幾日點都要玩 Macro，就係一年一度的花展，雖然花展已過，我就唔想買支 Macro 鏡，所以就買了個庶民 Macro 產品，就係 Extension Tube。

好簡單講下咩係 Extension Tube。老實講我都係新丁一個，所以都係講兩句就算，有興趣就去Google 睇多啲。Macro 係乜應該大家都知拿呱(即係微距)，咁Extension Tube 就係將支鏡後面反射番黎的光源再加長，咁令到中間個畫面更大，做到Macro效果，所以 Extension Tube 裏面就係空中得個殼咁。而由於用 Extension Tube 只係將原本你有的鏡變成有Macro 攻能，就係庶民超值之選。

另一樣係，庶民唔識計數，叫我計咩比例等等，咩加咗Extension Tube 後咩放大、聽完都唔知係乜，過份地理論，我只係會理起實際上係點用，出黎係點，「講一套‧做一套」

鴨記都有一啲普通的 Extension Tube 賣，不過比起 Kenko 呢支 Extension Tube 就差得遠了，鴨記果啲啤位差啲，鋼水又差啲，亦由於冇晒電子接觸，會冇晒AF同測光，Kenko 呢支 Canon 用的 Extension Tube 共有 3 個環，分別係 12mm、20mm、36mm，三個環都可以獨立拆出黎及合埋，砌出不同的長度，只係賣 $720 ，將你手上嘅鏡變晒做 Macro 鏡，都算係超值架。不過呢支 Kenko 的 Extension Tube 起 Canon 上只支援 EF 鏡頭， EF-S 鏡頭就用唔到了。

以我個人測試，Extension Tube 用起70mm 以上的鏡頭，就較為適合，而今次我就借了支 Canon EF 70-200 f/2.8 L IS USM (小白IS) 番黎配合個 Extension Tube 試下好唔好用(唔係買架！我邊咁有米！)。

70-200 2.8 好鬼重，1.5KG，連埋body都幾易斷手，再加上Extension Tube 一層層加長，攪到部機勁似一支火箭炮。雖然我係有興趣買支，但暫時只係想買 f/4 IS (小小白IS)，一來比小白 IS 輕一半(750G)，價錢亦平好多。

用變焦鏡比起用定焦鏡的好處係可以自由控制想影個主體幾大，然後再轉動焦距及對焦去影，不過由於Macro咗，景深就自然超級地拉窄，如果你想影番長景深，就要開超細光圈(f/22)，但換來就要落腳架，而今次我只係無聊試下，全部都係手持攝影，光圈大約在f/4 - f/5.5 之間作測試。

測試環境就只係我電腦檯前的一個小地方，有支白燈直接打落主體，原本想搵啲公仔做主體，但發現啲公仔囉晒番公司，所以就囉部iPod Shuffle 就算了。另外由於iPod Shuffle 表面係金屬，反射都幾勁，所以就將燈斜斜打落 iPod 。不過一般影Macro都會有個圈圈燈放起鏡頭前直打，我呢啲庶民何來有呢啲野呢。

由於我呢次係手持，所以都要睇 ISO 及快門速度，否則就會好易手震。另外其實主要係想測試，不同 Extension Tube 圈數以及焦距，可以距離件物件幾遠，以及近的話又可以放到幾大，以及個景深去到幾遠。而由於用了 Extension Tube 後，只有得一個指定的位置可以對到焦，所以如果你其中一個變數(距離位置、鏡焦距)要古定的話，就會非常之難「就」另一個變數黎影。例如你用腳架Set好一個指定位，而你係用變焦鏡，就可以隨意校個焦距去Tune番正黎影，但如果你係用定焦鏡，由於攝影距離固定了，所以腳架就未必一定可以Set到，尤其你要對住件物件非常之近而又放不到腳架(尤其細過70的焦距)。

以下的測試圖片全部都係冇剪裁，另外資料上的 E: 係代表個 Extension Tube 加咗幾多mm， D: 係代表鏡頭(最前端)距離件物件對焦的位置幾遠，而由於我的 DSLR 並非 Full Frame 機，所以在焦距上係乘 1.6 。

先開到最細焦距(70mm)，落一個中間大(20mm)的Extension Tube，距離物件22cm影出黎，由於(差唔多)水平咁影，成部iPod都可以清楚地影出黎，景深大約有2cm。而背景就blur 得不太勁。如果背景用番白色的話，退地更方便。

跟住直接試下加晒三個Tube (12+20+36=68mm) ，焦距效至 95mm 再手持黎影，已經開始非常惡影，由於手持相機，會開始容易鬆，另外景深已經去到只有約1cm，都算開始難影，另外現在仍然距離約8.5cm 攝影，所以仍然有足夠燈光去影。

再將焦距效大至115mm，Tube仍然係三個(68mm)，鏡已經要距離物件 12cm 才能對焦，但由於手持關係，所以要推大 ISO加快快門，而令到物件微粒加大，而景深更窄至4-5mm。

失敗個案

影 Macro 最麻煩就係光以及手震，所以有啲人會買燈環玩，但如果唔夠光又要開高 ISO 影，影出黎就會超恐怖，之前試 ISO 800 已經開始有微粒，開 ISO 1600的話，個主體就會超核突。另外，焦距越遠就又想開細光圈去加大景深的話，快門速度就自然越慢，所以就必要落腳架，有啲人會講「安全快門」(即 1/焦距) ，舉個例支鏡Zoom到去 170mm ，即係安全快門為 1/170 -> 1/250 (最接近之快門值) ，但問題係越高快門當然又要大光圈或大 ISO 補償[No Free Lunch]，唯一解決方法就係落腳架，所以呢如果你真係要手持影，就盡量唔好用咁大焦距，距離物件近啲黎影，咁去補番條數。

亂影一餐‧個人意見

Canon 起70打後的變焦鏡就只係得 70-200、70-300及100-400，價錢由最平的四千五蚊到萬四蚊，而較多人會用70-200 F/4 (小小白)，價錢較平亦已經係 L鏡，雖然近期亦出了 IS 版 (賣8千)，但如果將IS 用起Macro 的話，分別真係不覺，而光圈大起 Macro 環境下亦未必有用，尢其如果你會用腳架影的話，囉住支小白真係重到成支火箭炮咁，所以我覺得用 F/4 已經足夠亦較為有彈性，手持及腳架都會適合，當然如果你用副廠的話，價錢亦平好多添。

不過呢，有心玩Macro，就自然會去買支 Macro 鏡啦，例如支 EF 100mm f/2.8 USM Macro 都只係四千蚊，同埋景深壓得冇咁勁，亦可以當普通鏡用。但咪忘記之前係講緊假如你已經有支普通的鏡去「一鏡兩用」，個Extension Tube 重可以配合其他鏡用，所以條數唔係咁計的。

老實講我就真係未玩過 Macro 鏡，唔知用番Macro鏡影出黎個景深差幾遠，有機會要問人借黎玩下睇下差幾多。