Sony LocationFree Base Station (LF-PK1) 測試報告

前言

之前咪講過其中一件玩具就係一件可以起街睇到屋企電視的硬件，其實就係 Sony LocationFree Base Station。呢件野起Sony 訂咗一個月有多先有貨到港，初頭以為呢件野都幾垃圾，應該冇人買，不過原來又唔係，下面會提及….(內容好鬼長…所以有心的話慢慢睇……)

LocationFree 係乜黎？

LocationFree 係一個令你可以起任何上網的地方，用你的電腦或PSP都可以收睇到屋企電視的訊號，家用的寬頻要求並不高，ADSL 的都可以睇到(512kb)，不過當有然10MB/100MB 就更好。

LocationFree 與其他同類產品的特點就係除咗電腦可以睇到外，用PSP亦可以睇到(都係SONY嘛)，令部PSP除咗可以打機之外，重可以睇電視。除咗起街睇外，起屋企都有佢的用途，例如屋企人爭電視時、起張床上面訓唔著、去緊廁所但又追緊電視劇….香港賣的 LocationFree 已經內置了無線發射裝置 (802.11b/g)，手提電腦/PSP 可直接經無線網絡連接到LocationFree 上，非常方便。

(如果你的 PSP 是「免碟改良版」的話，現時版本的 Firmware 並不包括 LocationFree Player，而如果你又想起PSP睇的話，咁就會出事了…)

不同地區售賣之 LocationFree

香港賣的 LocationFree 為第一代版本 LF-PK1，與現時美國售賣的 LF-B20 (第2代) 、台灣售賣的 LF-PK1 和日本售賣的 LF-PK20 都各有不同(可參看下表)，第一代與第二代的最大分別是使用不同的視訊編碼。

第一代使用 MPEG4 ASP 編碼，而第二代使用 AVC/H.264 編碼，用更小的 Bandwidth 就可播放高畫質的畫面(簡單黎講即係畫面靚咗)。而另一樣不同之處就是第二代內置遙控(IR)自動學習功能，第一代使用 Profile制，如果你的錄影機/解碼器並無Profile話，就無法控制了。

不過香港暫時未推出第二代，而購買外國版本，保養仍然係一個大問題，以及一般購物網站都不接受將LocationFree送出本土，要買外國版的話就要搵住該國的朋友代買了。

LocationFree Base Station

本港版的 LocationFree 套裝包括了以下配件：Base Station、底座、AV線、火牛、IR線、說明書及CD一隻。

CD 內附了 LocationFree Player (LFA-PC2)，背面貼了一組 Serial 號碼，請勿遺失這隻 CD 及Serial ，否則你便無法再安裝及登記到 LocationFree Base Station。每條 Serial只可登記到一個Base Station，即是不可以同一條Key於兩部不同的電腦登記到同一隻Base Station，如果你想兩部電腦都可登記到Base Station，必須要購買多一隻Player CD (PSP唔洗用Key)。另外每部Base Station 只可以登記最多4件Device，而同一時間只可以得一個人Connect 入黎隻Base Station 收睇電視(呢樣係非常重要)。

不過你又唔洗驚，Register 咗的Key 係可以起Base Station 移除的，唔會lock死以後轉唔到機，不過只係限你一條key只可以裝起一部base station 咁解。

Base Station 背面共有兩組 AV 輸入，以及一組 IR 輸入，即是只可以控制一部錄影機/解碼器，另外亦有一粒 SETUP MODE 的制，按實數秒不放，就可以進入 SETUP MODE(於正面會有橙燈閃)，於SETUP MODE 才可以登記 Player 到 Base Station。而於側面，會有一張 Base Station 的貼子，附有 WEP 及 Web Page Admin 的登入密碼。

IR線有一個小型輸出組件，以及雙面膠貼，你可以將IR貼到你錄影機/解碼器遙控接收器上面，咁就可以控制轉台或播碟。

LocationFree 設定

將電視輸出插到 Base Station 背面，插上 CAT5 線(不包括)及電源，基本上就可以開始設定。LocationFree不包括Router功能，所以你需要自備Router，一般來講Router 啟動了DHCP 之後，LocationFree 就會自動取得 IP 地址，你可以從Router 見到IP地址(例：192.168.1.4)。

要設定Base Station，首先又係要起隻LocationFree背面禁實 SETUP MODE 制，等到前面橙燈閃後，就可以打 http://192.168.1.4去Admin Page，然後輸入貼子上WebPassword 的密碼，就可以進入 Admin Mode 。Admin Mode 分為Easy 及Advance模式，當然入去 Advance 設定啦。

為方便Port Forward，IP Address 最好就係 Manual Set 啦，或者你由Router Set 咗 DHCP Table指定呢個Mac Address 派同一個IP地址，另外就係放Port令可以起外面入黎睇到，佢個Port 叫 NetAV Port (預設5021)，起Router 放呢個Port 指去Base Station 個IP就可以。

一般野大家都應該識架啦(冇乜特別)，咁就唔提，最主要講其中三樣：

初初我試的時候發現狂斷線，後尾熄咗佢個 UPnP Setting 就冇事，可能因為隻LocationFree 不斷去問Router 囉Setting再Reset而引起，所以我建議 Disable UPnP，然後自己去 Router 開個 NetAV Port 5021，比你可以起街外入到黎。
Dynamic DNS 支援ChangeIP，不過當然你亦可以自己用番Windows 版黎Update DDNS，你起Player/PSP 都可以自己Set 個connect 的hostname，所以用唔用佢亦不大。
如果你覺得下下都要禁住SETUP MODE 制先入到黎Web Admin太煩的話(會Timeout的)，可以起 Security 修改，Device Registration 亦可以 Enable ，但我試過 LAN 係唔得的(即仍然要禁實SETUP MODE制)，即係只可以起外面入黎 Remote Registration (例如公司部電腦)。

LocationFree Player 畫質測試

起Windows 裝好隻LocationFree Player之後，LAN 的話佢基本上會自己掃到隻 Base Station，跟住同樣你先要禁實SETUP MODE 等轉橙燈，跟住禁 Player 裏面的 Connect ，就會開始用你條 Serial 去登記落個Base Station，OK的話，已經會有畫面睇。初頭你會發覺畫面好差咁，因為佢預設Quality 係Auto，禁去Rate粒制，裏面就有得改 Quality。

Quality共分六級，最主要分別係用唔同的Bandwidth，以下係用 Kerio Personal Firewall 睇住個Traffic測試番黎不同Level所用的Bandwidth。

Quality 6 我都覺得唔錯，始終係用 MPEG-4 ASP，450KB/sec 真係能力有限，Full Screen我都覺得算係咁，間唔中都會起下格。至於 Delay 方面，LAN 測試時大約係 Delay 4-5秒，完全係可接以受的。而 CPU 方面，我係用咗一部 P3 800Mhz 的手提電腦(幾年前:P)，平均用上50%的CPU，用起呢家勁快 CPU 的電腦上，CPU 都只係食小小 (約5-20% CPU)，亦係可以接受。

另外由於 450KB/sec ，即係如果你用 ADSL (512kbit uplink / 約60KB)的話，起街外睇係唔夠bandwidth，即係大約要Set 到Level 3(約60KB)，先可以好smooth 咁睇。

遙控功能

Player 本身都內置咗一堆牌子的 Remote Profile，但當然冇收費電視解碼器的設定，你可以到 Sony Support 網站，佢地整咗 CableTV 同 NowTV 的解碼器Profile，我兩個都試過， CableTV 果個唔岩我用，NowTV 就冇問題。佢個Profile 係一個Text file，啲碼用BASE64 Encode + Checksum，我都試過起google search 下有冇人整咗個profile generator，但又搵唔到，SONY內部亦唔肯放出黎，所以祝大家好運。 [Support 網頁亦有新Version 的Player Update 下載]

Download 咗個Profile之後，將個file 放起個叫RC_DATA 的資料夾入面(安裝完個Player之後起桌面會有多個RC_DATA 的shortcut)，跟住起番Player 入面的Setting 就可以見到Remote Setting，選擇番岩用的Remote 就可以試下，唔岩用就幫你唔到。

呢兩款就係我用的CableTV 及NOWTV解碼器：

呢隻 CableTV 解碼器用唔到Remote Profile

呢隻 NOWTV 解碼器用到Remote Profile

Windows版 Player Remote 登記

例如我呢家想起公司部電腦睇LocationFree ，咁就需要Remote Registration 了。首先起隻LocationFree 的 Admin Page裏面的 Device Registration，先 Enable “Register Devices”，之後下面就會有一組隨機的密碼，抄下此密碼。

番到公司，裝好LocationFree後，Connect時輸入你屋企的 IP / DDNS 地址，之後就會問你 Password，輸入呢個Password後就可以成功登記。

PSP 版LocationFree Player

LocaionFree 一大賣點就係可以起PSP睇，同樣地，第一次用的話都一樣要Register 你部PSP落Base Station，一樣都係先要禁實Base Station的 SETUP MODE 制禁到出橙燈，跟住就可以起PSP 登記。

首先禁去 PSP 的 Network -> LocationFree Player，第一次用的話，佢會自動去Search你個 LocationFree Wifi 然後自動Save 到你PSP 設定內，非常之簡單。第二次用的話，就會彈出Network Connection，只要揀番LocationFree 的SSID即可。

PSP 版遙控設定

由於PSP 版LocationFree 並無預設的 Remote Profile，你先要首先按△進入Menu，選擇 Setting->Remote Control Settings -> Version Information 下載Remote Control Data(一般大牌子)及Additional Control Data (CableTV/Nowtv 解碼器)，下載後就可以設定用Profile。

街外收看設定

如果你部Base Station 並無Set 到 DDNS，首先要起 Setting -> Advanced Setting ->Dynamic DNS Settings 入面預先定你的 IP/Dynamic DNS 網址及Port ，才可以在街外收看電視。

街外Wi-Fi 實戰

講咗咁耐廢話，終於黎到成部野最值錢的地方，就係出街睇電視，現時街外有兩大 Wi-Fi類的收費Wi-Fi 公司，包括 PCCW 及Y5Zone。

呢次測試於07年4月29日進行，連線住的Base Station 使用HKBN BB10 網絡，Router 使用 D-Link DI-504，其間並無何任下載工作。另Notebook及PSP 都已經預先進行註冊。

我地首試係起觀塘老麥試睇，老麥呢家係Y5Zone的重地，另外亦有聯營的 HKBN。我地用番HKBN 於Notebook 做測試，首先要用番瀏覽器進行登入程序，成功登入後，開啟 LocationFree Player，於 Connect 輸入Base Station的域名，按Connect後成功收看。

於 PC 上，用到Level 6 (約400KB/sec) 真係唔夠好夠快，睇睇下經常停頓，始終街外Wi-Fi可能會被其他人用緊而影響Bandwidth，而Level 5 (約120KB/sec)連睇10分鐘都幾Stable，好小有停頓/跳格，質素都算幾滿意。測試其實重有老麥姐姐走埋黎問係咪用佢地的無線上網就睇到電視…不過當佢聽到隻Base Station 賣$2280的時候就眼都凸埋 XD。

(始終Youtube 咗條片質素較差…睇下佢順唔順就可以，畫質不可作準)

PC 測試非常滿意，跟住就到PSP，我地用一部PSP Firmware 3.30進行測試，但點試極，都無法Connect到Y5ZONE同HKBN，後尾亦到過旺角24老麥以及APM 的Y5ZONE AP 亦無法順利取得IP。

之後我地轉到 APM 的Starbucks 用PCCW測試PSP，由於都係要Login，首先要用Internet Browser 連線到 PCCW AP，事彈搵個Page去就會指到去 PCCW Login 頁，輸入Login/Password 登入先，成功登入後，離開Internet Browser，再選擇LocationFree Player，跟住揀番PCCW Wi-Fi，PSP會重新囉過IP，佢會記低你部PSP 的MAC Address，10分鐘之內都唔會要你重新Login，成功囉到IP之後即刻可以睇到。

PSP 裏面Level 只係得1-5，冇第6級(應該係因為PSP只有802.11b問題)，起Local 直接連Base Station 試 Level 5 係非常之順，但出到黎街外，用Level 5 經常停，要Set 番3-4 先可以睇得算順，畫質方面起PSP 始終畫面細咗，起格都冇咁覺眼，而用4的話，都算幾滿意。

不過今日(5月12日)將部PSP Upgrade 去3.40再去觀塘老麥再試，終於成功Connect到Y5ZONE及HKBN。呢次用老麥20分鐘免費Wi-Fi 進行測試，同樣都係先經Internet Browser 登入咗先，跟住close browser 再去番LocationFree Player，佢亦會記底你MAC Address。

連線後，用最高 Level 5 都非常之順暢，未試過停頓，極為滿意，不過20分鐘後就自動 Cut 線了，有興趣就要買Daily Pass 繼續睇落去…或者用HKBN 月費計劃。

於Pocket PC 及電話收看

除左 PC 及PSP，LocationFree 亦可用於電話及Pocket PC 上，現時電話就只有 Sony Ericsson P990i 上內置了LocationFree ，而於Pocket PC 上，Access 推出了NetFront LocationFree Player for Pocket PC，不過寫明LF-PK1 並不支援，即係冇用。

出街睇電視收費

用Wi-Fi無線寬頻連線的話，PCCW 及HKBN都有提供月費計劃，睇下你用緊邊間ISP，如果你真係間唔中一個月一兩次起街睇的話，用預繳通行證會比較抵，因為始終大家的熱點都不同，用預繳會較為彈性，但如果你係經常都想起街睇的話，咁選擇月費係較為好的選擇，但千其咪揀「按用量收費」，因為當你用多過1個鐘之後($18)，已經變相貴過全日通行證($15/$20)，所以小心小心。

但如果你係用 3.5G/HSDPA 的話，由於 Video 的Bandwidth最低都要10KB/sec (Level 1) ，以現時Smartone $100/50MB 的話(每$0.01/5KB為單位)，最低消費每秒鐘$0.02，每分鐘$1.2，但如果你Set Level 2(40KB/sec)的話，每秒已經要$0.08，每分鐘已經要$4.8，秒秒都係錢，當然如果你選擇月費任睇的話，可能佢會Block咗你唔比睇，要另外再加錢開通，即係每個月就變成近$600月費，都算係幾高消費。

同類產品比較

以我所知，坊間呢家有三隻同類的產品，包括 Slingbox 、 Adigit gogomedia 以及Sony 呢隻LocationFree ，大家價錢都係差二三百蚊度(唔計gogomedia plus版)，咁我就起google搵咗一啲佢地的資料，作比較。

如果比較資料的話， gogomedia 的確係幾好，可以多人一齊睇(啲版權唔見晒)，重可以錄影，亦內置埋Router，台灣野果然係乜都集齊。不過如果你冇PDA/PSP，想用電話搭車睇的話，轉用3 X-series 都唔錯，因為佢有package 買隻 slingbox 以及用每月$68睇60個鐘，唔洗限住 Wi-Fi 熱點，但電話就變咗要用Nokia N73 / E65 (部電話都四千蚊)。而PSP 好處就係個畫面比電話及PPC大，價錢平，一機多用，所以的確各有各好處。

購買後記

LocationFree 起唔同國家反應都幾唔同，台灣方面好Bi 呢件野，幾受歡迎，更有人因為覺得台灣賣緊第一代較差，走去bid 隻日本版番黎用，日本及美國方面都OK，佢地已經賣緊第二代，重出埋其他Accessories用。但我成日都覺得香港呢邊谷唔起，最主要原因係因為大家部PSP 都被「優化」，唔見咗隻LocationFree Player，即係連佢其中一個賣點都已經用唔到，咁點解要揀佢呢，另外佢亦多多限制，一條Serial只可以登記在一隻Base Station度，即係同一條serial起Notebook Reg 完再起公司Reg 已經唔得了，限制太大。

另外我買的時候，Sales講明係未支援Vista，我亦上網Check過，第一代的Player (LFA-PC2)未有Vista，但第二代Player (FLA-PC20)已經有 Vista更新，應該遲下都會出的了。

後來無意中問了SONY內部人士，得知隻LocationFree第一批貨200幾隻貨都賣得晒，呢樣我真係估唔到(可能啲人只係會裝落Notebook出外國用)，不過就有唔少客都反映隻野多多限制，買果時又唔知，買完先知中晒計，尤其係一條Serial 只可以Reg一個Base Station呢樣，真係冇乜提及過，跟住話條Key香港係有得賣的($280)，所以有唔少人都比佢搵笨咗。

重點重溫

最後，你睇完咁耐，都仍然係對隻LocationFree 有興趣，咁你要細心閱讀以下的重點，冇問題的話，咁你去買啦。

每個Windows 版 Player的Key只可用黎登記一部電腦到一隻Base Station
每部Base Station 只可以登記最多4件裝置
同一時間只可以得一個裝置Connect 入黎睇
並無Router 功能，需自備Router
並無TV Tunner 功能，需自備有AV輸出功能之錄影機/TV Box，或插於收費電視解碼器上。
CableTV 的遙控Profile 唔係每款有線解碼器都岩用。
玩老翻的PSP Firmware 並無LocationFree Player。
於Windows 版的Player 入面只可以設定兩個AV輸入為 NTSC 或 PAL (不可以一個NTSC一個PAL)，PSP版可以獨立每個Video Source Set NTSC或PAL
Windows 版Player並無較光暗/色彩設定，PSP 可禁光 LCD作為推光畫面。
起Sony Shop 舖頭購買可用信用卡做12個月免息分期，但網上購買並無分期。
如果你Set 唔掂，SONY 有提供上門安裝，但另收$240。