新 BLOG - 2008 放眼世界

台灣很滋味 (三) - 台北通訊！

前前言：由於太忙了，所以爛咗幾個星期，相信寫完呢個之後會再爛多一星期…..見諒。

呢集台灣很滋味(縮水版)，先講下有「台灣黃金/高登」之稱嘅光華商場的新大樓即將落成啟用，帶大家睇下新大樓係點，另外帶你去台北有名的18禁咸Game咸碟之地「新光華」走一轉。當然順路帶你去埋台北上年新落成的誠品信義店，除咗買書外，點都要買個手信。另外重會帶你睇下台北史力加同變形金剛，最後當然唔少得食番一餐。即刻送上…遲來的….台灣很滋味！

全新光華商場

我上一次去台灣的時候…光華都仍然係起天橋底下，一入去就分上下兩層，樓下賣舊書舊野，樓上賣電腦硬件，門口企咗啲男人囉住本Files賣A片(咸碟)同翻版，完全係香港的黃金商場翻版，但自從2005年馬英九話要拆光華之後，光華搬左去一個好神秘的地方，就係五排鐵皮屋入面暫時做住生意，而起格黎就起緊座全新的光華大樓。

 

老實講，香港買野都幾平下，所以一向都唔建議起台灣買電腦野，尤其硬件及RAM等等，不過如果你睇見中一啲配件，例如Mouse、Keyboard、Card Reader，平平地的話，起光華買係OK的，我呢家用緊果個Card Reader都係起光華買的。買硬件有咩唔好？唔講價錢的話，有壞你唔通飛番台灣整？光華重有一啲舊的書/漫畫/光碟/Game/日劇/動畫賣，正版翻版都有，帶出境係冇問題的，所以可以放心。

咁新的光華呢，佢起正呢家臨時光華格黎，睇樣就樓高7層，唔知到時係咪真係會改名叫台北資訊城，又或者最底兩層叫番光華商場都唔定。呢家咁睇(6月尾)，都起到「七七八八」，佢地預計係年尾可以入伙，我都覺得應該可以趕到年尾開張大吉，到時大家可以又再去一次靚仔版光華。

去光華之前提提大家，台北腦場商圈同日本有啲舖頭一樣，每月都有指定日子為公休日，每個月逢第2及第4個星期二都係公休日，記住呢啲日子就唔好去了，唔記得咗Last Day去到公休而又果晚飛，咁都幾黑爆。

光華商場/台北資訊城
地址：台北市中正區金山北路77號
交通：坐捷運到忠孝新生站落車行約5分鐘就會見到

新光華商場

去完光華，順路可以入埋去對面馬路新光華商場，裏面上一層(2樓)有間「遊戲便利屋」，分為兩邊，左邊賣咸碟(A片)，右邊賣H Games，通常賣NT$150一隻(翻版)，入會重有得平，近期日本BL風吹向台灣，岩岩又有一隻BL舊Game「帝國千戰記」起台灣/香港推出繁體中文版(全年齡版)，男女性向都岩架，如你去台北車站K-Mall 店的話，重有埋日劇同埋動添。

點解台灣會重有呢啲舖頭，比你H-Game 四仔都去BT啦，呢間舖好多年的了，真係老店黎，不過我諗台灣寬頻好多都重係 ADSL，冇香港咁恐怖有成100MB 以上，速度比較慢，所以仍然會有客仔唔想download走去買隻老翻番黎。

不過講起呢隻帝國千戰記，起香港見到張 Poster完全唔覺有提係BL Game，可能因為跌咗落去全年齡版，而資料片千夜之夢先追加番BL 18禁畫面，唔知有冇男仔「唔知頭唔知路」買完番去玩「媽媽聲」呢？

遊戲便利屋
新光華總店：台北市中正區新生北路一段7號2樓 (忠孝新生站)
台北站前旗艦店：台北市忠孝西路一段50號K-MALL廣場地下1F (台北車站)

史力加、變形金剛

起香港鬧市睇到大型的電影宣傳的實物模型，已經買小見小，但起台灣仍然係好落足本錢，今次就起捷運同鬧市都會見到史力加同變形金剛的模型，而且經常都會起地下街／商場都會見到有佢地的Promotion，香港真係個個都BT攪到片商都唔肯比錢做大型Promotion咁。

講起睇戲，如果你有時間的話，起台灣睇戲都唔錯，一來都係繁體字幕，同聲同氣，至多係翻譯人名會有啲唔慣，第二就係啲片保證新鮮，以及會間唔中有好多香港唔播的戲，例如新一套柯南電影已經起台灣開始播了，但香港就經常都音訊全無，或者一兩三年後電影節先又會出現下。所以如果你咁岩有啲時間，走去西門町睇番套戲都唔錯架。

誠品信義店

誠品起台灣應該冇可能冇人未聽過，簡單講佢係一間書店，但佢唔指賣書，重有賣潮流野、衫褲、連Food Court 都有，集文化及潮流於一身。以前去得誠品就一定去誠品敦南店(24小時)打書釘，但自從上年新開的信義店後，人流分散了，信義店比敦南店更大，唔計停車場，由B2去到6/F共八層，賣普通書的都有三層、計埋兒童書、設計及進口書等，包你一日都睇唔晒，真係大到喊。

awfully chocolate black as chocolate 

如果你喜歡食朱古力蛋糕，咁你就要順路起地庫B2層買個朱古力蛋糕。原本正是想推介 awfully chocolate，但咁岩台灣方面與新加波的合作起07年8月1日完結了…. awfully chocolate 亦變晒做 black as chocolate，原本賣$580-$690的蛋糕，加價去到$800以上，不過黎得台灣，點都要買個番Hotel食啦！

Black as Chocolate
信義誠品店：誠品信義旗艦店B2美食街電扶梯旁 (捷運市政府站)
週日～週四11:00~22:00
週五、週六11:00~23:00
http://www.blackaschocolate.com

行完誠品重可以過對面，行埋新光三越、台北101等等….行完之後可以坐番穿梭巴士番捷運站架。

浪漫館橫浜

去開微風廣場的話，肯定唔少得行6樓的 Tokyo Hands (台隆手創館) ，另外3樓今年4月開咗間叫 Plaza 的舖頭(無印對面)，不過裏面主力賣少女向產品，行完肚餓，當然上樓上 7樓食個午餐，首選浪漫館橫浜。

話說浪漫館橫浜最出名的就係炸豬扒，佢用的炸豬扒係用一隻豬裏面只有1.5%的里脊肉做出黎，所以非常之貴。另一樣就係可以比你自製芝麻醬，等你點餐後慢慢磨下芝麻等開餐。

首先用佢附設的木棒將黑白芝麻壓爛，越爛越好，爛晒後，就可以倒入燒汁，咁就攪掂了！

黎得食，當然要揀個炸豬扒食啦，雖然價錢真係幾貴，但話晒真係高級野，咪好似去扒房食牛咁，點都要試下。一食之下，件炸豬扒真係非常非常好好食，同普通豬扒真係差十條街，不過個咖哩汁就冇乜驚喜，反而「點」自己磨的燒汁重好食。

食完後附送一個紅豆甜品，不過覺得甜過頭，冇晒紅豆味，但食到呢隻炸豬扒，真係抵番晒。

要留意一點，Menu上豬扒餐，都會寫明呢個餐用邊隻豬肉，因為唔係只係得里脊肉的，真係想食的話唔好點錯。另外一提，呢間舖的女侍應都係著 Maid 服架～ (編按：又係Maid)

浪漫館橫浜
地址：台北市復興南路一段39號微風廣場7/F  (捷運忠孝復興站)
(加一服務費)

下回預告（如重有時間寫的話…）

下次會帶大家離開台北，走去郊區，去下淡水、八里、公園、九份、十分，吹吹風，影下相。

 旅遊/觀光  回應的RSS 按此回應  暫時未有引用通告   (0)
2007年08月16日