新 BLOG - 2008 放眼世界

Full Metal Painc Second Raid 10 之香港一集遊 (Beta 1)

今集 FMP Second Raid EP 10 帶大家遊香港，因未有時間實地考察，我又冇駕車，有部份是向網友查詢大約位置，如有錯漏，歡迎指點。

先看看香港的地圖，都算Update 播，起碼填咗海的地方都有，唔再係十年前漁港。

啲實景真照抄，連中原地產，七仔呢啲都保留番晒。

呢度叫輝皇豪園，都算係高上的住宅，佢地就係起呢度的高層單位開會。樓下停車場就泊咗兩架貨Van。今次冇畫錯駄盤方向了。上次 RODTV 倒轉咗左右駄。另外「狩人清潔有限公司」的「狩人」係日本用語，係咪應該叫番「獵人」？(請指教)

呢張真係名乎其實一張「假」的駕駛執照。我都相信香港人唔會改個咁的名叫「郭爽慧」（應該係台灣人名），另外左邊拼音，GUO, SHUANG HUI 係國語拼音，但都重岩，最錯係果個中文電碼，三個電碼都唔啱。根據中文編碼網頁裏面的中文商用電碼表，1801係「必」，1109係「壼」，0320係「儒」。我唔知台灣係咪有另一組電碼，但呢度係香港，呢張係香港駕駛執照。張執照後面翻得幾足，真的一樣。

開車了，車由輝煌豪園，路經羅便臣道轉去摩羅廟街。（都唔知岩唔岩的:X）  跟住應該圖２係高主教書院果個位置附近，跟住唔知架車點駛法了，我都唔識。遲啲有時間去實地考察之後再Update 番。

我問過下，圖片3 應該係花園道近美國領事館，跟住架車已經落咗去中環告士打道（圖片４）。

咁就就去到灣仔，轉入會展菲林明道（圖５），再駛入紅隨（圖６）。黎到呢度停一停先。

黎到呢度，就考你唔係廣東話又唔係國語，係唔知咩話的聽力能力。好明顯又係搵台灣佬譯啲廣東話出黎攪到古古怪怪，初頭「明白拿」都重聽得到下，後尾已經變咗電子字典機咁讀出黎….

士兵：「咪行！」
Melissa：「明白拿，開『車』（窗）」
Melissa：「獵人清潔有限公司的人，XXXX」
士兵：「後面個袋，乜野黎架？」
Melissa：「就係果啲清潔工具，有咩問題？」
士兵：「冇…野」
Melissa：「行得架啦？」

一出紅隨，留意下佢畫出紅隨啲太陽光閃下閃下果個位，好真實。跟住出到黎果兩個廣告（圖７），其中一個係唔係地鐵多點時間多點生活？另一個廣告就唔知…另外，廣告後面個火車站唔見咗。跟住，唔知點架車兜咗去Polyu 燈位（圖８），之後就轉咗入去呢個Polyu正門噴水池同博物館位了。

經過一幕的士飛車特技，同又唔知UP乜的廣東x國語話之後，我們的歷史博物館同 Polyu 鍾士元樓就爆咗了，你去過歷史博物館未？我都未去過，未去就快去了，爆咗就冇了:X

宗介繼續被愛情洗腦呢家傻下傻下咁，離開了尖咀，預告話去咗油麻地，唔通呢個公園就係廟街？

PS： ED Credit 士兵ABC都應該係大陸／台灣人，全部都係拼音黎。

 動畫與漫畫  回應的RSS 按此回應  引用通告(8)   (0)
2005年10月07日