新 BLOG - 2008 放眼世界

起 IVE 生活(涯)了三個月，終於都忍唔住要講幾句。

點解讀 hi dip 重辛苦過讀 Master架??????
咁不如我走去讀個 phd 啦=.= 

我並不介意IVE的同學知我係 Master背景(有同學已經知道)，但最緊要係唔好歧視我(當然唔好拉我去打啦！)，始終 Design 係我未正式讀過，我都只係一個新手。近呢幾個月，聽咗好多聲音，最多係問我「點解要讀番轉頭？」 (包括我媽)

我的確係好想讀啲拍野、寫故仔、創作、幕後等的 Course (雖然曾經起Project 裏面跟過其他人做過下)，不過我都想正統咁學番。另一樣係想玩電視台的System，不過呢家我先發現我報呢個Course係冇！！！

起呢三個月，我聽到好多同學都講個 Course 好多問題，例如導師教得差，教咗=冇教，問番你轉頭有冇教錯等等，雖然我都對某一兩個導師有小小反感，不過其實就算讀 Master，幾幾野讀一科，裏面都係咁架啦，其實有好多野，唔係起堂上面教到你，最重要係佢開咗個頭，令你踏出第一步，之後就係你自己從功課中的過程、經驗、錯誤中學習，就算大學的課堂，好多都係書冇教，你自己起課外的時間睇書、功課等其他地方中吸收番黎。 當你明白咗呢個學習的模式後，你就會覺得自己從被「迫」要交的功課中，學到好多野。

就正如今年我起某校教的 Course，初頭好強迫性咁要求一班小學生每組交一個故仔 (我好自私的決定)，但最後一堂，大家都能夠交到一條片出黎，雖然有啲做得好，有啲做得差，但最緊要係，佢地起呢個一個 Course入面，學到的野，肯定多過我教的「理論」。

舉一個例子(我從負責老師聽回來)，其中一組的同學，約了到一個同學的親戚的家做訪問，他們約了12pm起學校門口等，但其中一個早了番黎，又見唔到其他同學，又唔打電話比佢地，跟住佢自己走咗，另外個組員黎到，但又見唔到個同學，又唔識得打電話，個組長又唔知，最後大家各自各走咗，最後又攪到個親戚白等一日。

好老實講，我唔覺得呢家教的野係冇用，可能因為我讀書經歷太多，好多野都睇化咗。不過我真係有退學的念頭，原因並不是教得差，而係番學同功課都太多同趕，完全真係將一個 Full Time的課程搬到 Part Time，再加上我呢啲 IT人只會得閒死唔得閒病 (雖然呢家已經病咗幾日)， 番工＋番學＋功課＋每晚的 OT，每日都訓唔到6個鐘，訓訓下的期間可能重有電話打黎要聽，真係人都癲。

令我起 IVE 的推動力，完全係我班的同學仔，起 IVE 番學就好似自己番咗中學讀書咁，開開心心咁番學放學，有時又同成班同學去食宵夜，同我Group的同學亦體諒我的自私同態度，雖然我有時都會攪下笑攪下氣氛，但認真的時候我會好認真的。雖然最初番 IVE 的心態係興趣班，但呢家就變咗係番去同同學仔 So So。年紀大，又會諗番讀中學時每天的開心番學放學同玩，呢家變咗一個大細路。

多謝我的 IVE 同學。

番 IVE 同番 Parttime U 心態係好唔同，番 U 入面個個都係D 真係黎讀書的人士，唔會咁同你玩玩下，傾都係傾功課，個個比成十餅黎互相爭鬥，大家都想 Grad 畢業，壓力係完全唔同，另外由於啲科目係任你剔，好多時自己識的同學都唔係讀埋同一科，交流又會小咗，Group Project又唔多，大家都係番黎，坐起度聽三個鐘然後散水落堂。功課方面，U的功課唔會好似個個星期都比你或者咁多份，好多時一科只會有一兩份功課，當然個 Volume 會大份啲，但其實好多時只需連續做兩、三日就攪掂(唔計Group)，唔會好似 IVE 咁個個星期都有，或者科科都咁大份。另外 U 我可以根據自己公司的工作量，去自行控制呢個學期讀多D 科定小D科，冇 IVE 咁冇得唔讀住。

起讀 IVE 前，已經有朋友同我講會好辛苦，但我仍然向前走，現在已經辛苦到天天叫救命…(我諗我有D同學都已經係咁…) ，不過我希望我可以涯到畢業，但之後重會唔會再繼續讀書…我呢家都答唔到..可能到時我都想休息下。

今日睇 Cable 08 講一個睡眠的測試，平均每人每日應該要訓8小時，我都好希望每日訓到8小時……

 隨心  回應的RSS 回應(1)  暫時未有引用通告   (0)
2007年12月10日