新 BLOG - 2008 放眼世界

圖1：許仕仁在五號政改否決對後見記者。

5號政改一Q清袋大局已定，許仕仁就拿拿林開記者會怒屌、發老啤，個個都鬧，不斷推波，一咪講自己冇錯，錯係果啲立法局議員同點名果兩個人士，真係「老許推波」。我從來都對5號政改冇表態，所以不會話贊成定反對，但今日議員及許仕仁、林瑞麟大家互推波，大家互插，某部份已經令我反感，再加埋早排曾生硬銷政改，電視廣告、街頭簽名等等…比起23條更惡頂。

另一樣想講就係「人數」，今日大部份支持的人士都不斷拋一堆數字出黎，話係主流民意，曾生上次遊行又唔講數字，民建聯個簽名會就話有近八十萬個簽名，早排早央先話兩邊的民意都要聽，呢家就話要聽主流民意要贊成，所以都幾「神又係你，鬼又係你」。乜都你講晒。

圖2：許仕仁在早前於關注大聯盟收集簽名送收政府後見記者。

經過呢幾日之後，政府同民建聯係咩關係？曾生同許生見記者後面都一班民建聯，民建聯黨政府？香港的政黨、政府、政治氣候都仍然係「得把口老吹」，同埋重有「中央」最後話事權，咁其實如果中央一直BAN你啲07/08、2012的話，佢都可以BAN到去2047，不如討論普選時間表前，不如叫中央定個普選年份出黎好過啦，就算話呢家有70%民意係2012普選，中央又黎一個「解話」，隨時「解話」到2047你都吹佢唔脹。

圖3：陳方安生日前見記者，叫曾生公開解釋。

最近陳方安生多次表態，令外界估計她會去選07特首，或者組「手袋黨」，但她表明不會。我覺得佢呢家話不會係唔想影響曾生現時的總治，因為佢出聲話選特首的話，大家就會有比較，隨時會反映曾生無能同失職。不過我覺得，如果陳太出黎選特首或者組黨，香港政界都會幾有趣，可能有180度大改變。至少可以改變呢家三大黨的特點：「為做中央的走狗而贊成」黨、「為做政府的走狗而贊成」黨，以及「為反對而反對」黨。如果陳太做特首，香港更加有趣，可能會脫離董生的「中央扯線特首」，以及曾生的「獨孤推銷員」，令香港注入新機。

圖4：曾蔭權於電視發表講話

最後，曾生呢一戰，輸得好核突，一咪硬銷，最初叫大家行一步，跟住就玩恐嚇，反對就乜Q都冇，停滯不前。講得衰啲，佢呢戰重差過喬治布殊出戰伊拉克，一個推銷員出生，呢家就硬銷貨品，但令買家反感，最後佢就輸粒糖，香港輸粒廠，誰錯呢？誰最大責任？相信呢兩個問題會起聖誕有排討論……

圖5：蔡素玉於上年立法會選舉論壇中，說民建聯在政網上有07/08普選。

我都覺得，好簡單，最終要普選嘛，咁話要討論幾時普選，曾生肯的話，攪個公投，叫香港市民投票選出幾時普選，最多人選果個年份就係最終普選的年份，大家都係想知幾時係終點，中間的過程都只係「循序漸進」，咁咪除開佢一件件咁進囉。雙贏的方案係大家傾出黎，政府唔讓步，民主派唔讓步(政府係讓步，但唔係讓前面的路)，其他民建聯/自由黨呢啲只係應聲虫，政府話A佢就A，政府話B佢就B…但最後市民一亂就轉軚。

 時事/新聞  回應的RSS 按此回應  暫時未有引用通告   (0)
2005年12月22日