唔識日文的自殺日本遊 DAY 4 之長崎大出血 (3月27日)

唔識日文的自殺日本遊 DAY 4 之長崎大出血 (3月27日) - 新 BLOG - 2008 放眼世界

話咁快就 DAY 4，其實日子真係好快過，尤其一開波已經蝕咗一個鐘比佢(日本快香港一小時)，今日主要全日都係起長崎做啲好老土嘅野，就係去睇啲長崎的名勝。包括有坐鑬車上稻佐山去睇個觀光塔，路經稻佐山公園，再落山去睇原子彈，路經舊匯豐銀行長崎分店，再去Golver Garden同中華街。

稻佐山
首先坐巴士去鑬車站，鑬車分兩段(ROPEWAY 及SKYWAY)，兩段都要比錢，但坐的鑬車就有不同，ROPEWAY的鑬車係長方型，而且只係得兩架鑬車，每20分鐘一班車，如果你有睇到Rescue Wing 的話，就知我講邊隻。而另外SKYWAY就係海陽公園一個個圓型果啲，不停都會有鑬車，但只係落一落去半個山頭去稻佐山公園。原本上山係安排晚上，但最後改為朝早去。山頂上有一個觀光塔，塔上可以看到整個長崎，另外亦有不少長崎的歷史及介紹。尋日上山同今日上山係兩個對方向，即係互望。所以個境唔同架。 (另外記得去website print coupon 出黎，買飛有特價)

平和公園－長崎原爆記念
冇讀歷史的我，我都唔記得長崎係美國放原子彈的地方，成日記咗咩廣島定唔知乜，算吧。裏面最值得睇，就係當年原爆後地下爆開幾層的地底坭層，其他都主要係記念像，同埋都係記念像，所以先話老土野。

舊匯豐銀行長崎分店記念館
只係路過，因為要比錢入場，入面有咩睇已經晨早起啲Website 睇咗，都唔鬼入去，外面影張相算。

Glover Garden (哥拉巴園)
全日的重點就係呢度，Glover Garden。Glover Garden 係乜？Ask google。裏面展出起幕末至明治時代，將外國人起長崎住的舊屋重新修復，而且並講下佢地當時的活。

裏面展出咗多間屋，內裏都係不同的內容，例如長崎的造船史，外國人家中的稻佐山至內裝修家具、另外重有長崎的文化展覽。入場費 $600 都叫抵架。Tea嘅時間去左園內一間餐廳食Castella，非常好味，不過又唔見$735yen，最後重起記念品觀掃咗一堆Castella嘅精品，完全係比Castella 洗腦。另外重起園外嘅遊客舖買咗一啲手信(又係暫時保密)，咁當然，買盒Castella 更加唔小得，所以就買咗文明堂Castella比呀媽做手信(係咁二啦:X)。

下一站，熊本
晚上坐火車由長崎->島栖->熊本繼續明天熊本之旅。

長崎特產カステラ (Castella)
Castella 係長崎的特產，雖然你起東京等大的百貨商店都會搵到特產的專櫃，但呢個長崎買的版本，會寫明係長崎總站版本。Castella 係蛋糕，外貌就似香港餅店一片長方型的蛋糕，但非常好食，食完會讚不絕口。Castella的由來？當然係Ask google 啦。一條Castella大約500-600yen，睇你買邊間品牌，我之前就食過文明堂（朋友起日本買黎香港請我食），覺得很好味，所以今次都係買番文明堂安全啲，價錢平貴已經唔係問題。

50000Yen遊日本！
尋日用剩 $34982yen (HK$2310)，不過今日就高消費了。鑬車、Lunch、Golver Garden嘅Tea、手信、電車、便當等等，夾夾埋埋差唔多成萬Yen！
鑬車 ($1080+$450) = $1530 (HK$101)
午餐拉麵店 $950 (HK$62)
Golver Garden 入場費 $600 (HK$40)
Golver Garden Tea $735 (HK$48)
手信 $4605 (HK$304)
電車 $450 (HK$30)
晩餐便當 $398 (HK$26)
合共 $9268yen(HK$612)，餘下 $25714yen (HK$1698)。
聽日起熊本，睇下聽日點算！

由於時間關係，今日嘅「日語一分鐘」暫時播影，敬請留意。

小傻新，豆知識
今次講下垃圾。垃圾都好講？起長崎，好難先會搵到垃圾桶。由於日本的垃圾及環保及回收係同香港有唔同。例如家居垃圾係要用指定的垃圾袋裝，然後在指定的日子先放出收集站。而買垃圾袋的價錢係包括垃圾處理費用，所以你起街邊，冇乜機會會見到圾垃桶。另外，垃圾收集都分三樣，大至和香港一樣，包括鋁罐、膠樽以及可燃物品(一般垃圾)。一般起汽水機都可以搵到收集鋁罐同膠樽嘅垃圾桶，但一般垃圾桶就好難搵到了，所以你要儲起啲垃圾，一見到普通垃圾桶就拿拿林 Dum。以下推介幾個必定有垃圾桶的地方，包括：急速列車、便利店(大部份都有)、遊客區同埋番酒店Dum。千其咪Dum起街，咪做垃圾虫。不過如果你起東京，就好好多了，起大部份的地方都會見到垃圾桶。