解讀(毒)不能
好聽到不能解毒(讀)……
隨心
回應的RSS
按此回應
暫時未有引用通告
(0)
2007年01月31日
HKBN打黎話我知要加價了…
尋日收到HKBN Sales的電話，話我的無合約 bb10 由下個月開始要加價了，開頭不停咁話bb100 加到$399, bb25加到$288，bb10都加價了，又開始叫我簽約了(起呢半年 sales 前前後後已經打咗黎null我簽約都有五次以上，次次都話好快加價叫我快簽，今次真係講到明下個月會加，當然報紙亦有賣，我已經有晒心理準備)，跟住，好戲來了，終於講出bb10 唔簽約只售$168/月 (我呢家係$148無合約)，如果簽約的話，可以好抵咁只要$138就有bb10，$168有$bb25，$188有bb100(全部簽24個月)，我當然唔簽，又開始一場電話互戰(太多粗口，下刪一千字)，講完一大餐，繼續仍然 $168唔簽約，對完資料後，唯有收線。
估唔到，收線後1分鐘，Sales再打黎話..經理睇過我個profile (惡人谷)，見我用緊家居電話(其實數碼電視我都有仍然用緊)，再次比咗個更賤的Plan我，$138 bb25(同樣簽24)，真係一價還有一價低，當然仍然唔簽約，佢都耐我唔何，吹咩！
以上價錢供大家參考，當你呢期bb合約到期，呢啲價錢可以比你參考下，你平啲定我貴啲….
你重記得我個2b嘛，終於到期了，但我完全冇興趣比錢，唔知HKBN會唔會搵到我null我renew 呢?
隨心
回應的RSS
按此回應
暫時未有引用通告
(0)
2007年01月29日
忙到嘔之2007之一
忙到喊, blog 都買小見小….所以儲儲埋埋一堆blog…-_- 當你清咗一兩個job之後，新job又不斷咁堆埋黎，睇下我死先定你死先。
1. 自備購物袋
呢家惠康逢星期二都冇膠袋日，所以記住唔好星期二去問佢囉個膠袋，否則就會好似咁……
不過，出一張五毫子的單，
究竟用小一個膠袋，同出小一張單，邊樣環保啲？
不過呢家超市真係，樣樣都話特價，但其實一啲都冇得特，尤其惠康，好多貨品都係局你買兩樣先有得平，果個「平」即係以前買一件的價錢，但如果你買一件，個價錢又會比以前買一件貴，所以根本係貴咗＋搵笨咗，騙案到爆，所以，一係你就屈服買兩件，一係你就蝕比佢，加價了！
2. 電腦展騙案
早排電腦節，有人同我講支huey好鬼平，貼出黎話$450抵到爛，咁我都冇野好講啦。
不過好友bryan上到電腦節，諗住去買支huey黎用，點之一望就被騙！佢囉張單張望，原來係單買$650，你要買塊二千蚊的手寫板，先有得用特價$450換購支huey，真係騙到爆，因為貼出黎果度只係貼$450但冇寫明係要買野換，嘿！
不過老實講支huey 的確OK架，另外huey 岩岩出咗 Ver 1.05，主要係支援Vista 同埋加入繁體中文支援，唔岩的話唔洗更新…
3. 又一騙案…人仔台 Blackberry新定義，無限=50MB
最近研究緊啲新Project，同Email 有關，咁就有興趣想搵部 blackberry 試下用，咁我知 fee 佢有用開blackberry，咪問下佢囉，佢就同我講人仔台呢家有$0機價無限任用，咁吸引，當然又去睇下啦，點之一望個pages，$0機價係回贈，要比$4180買機，再分24期回贈，重慘過24個月無痛分期。
跟住再望下無限任用plan啦，原來又有一條公平使用條款，用爆50MB，佢有權收番你錢，咁咪即係變「無限 = 50MB」 ？真係呃人到爆，雖然佢話”可以”收你錢，咁但係對用家黎講，冇任何保障，真係人仔騙案。
4. 減壓品：Tales of the World
真係有幾個月冇打過 PSP Game，所以上兩個星期就買咗隻 Tales of the World玩，買之前我完全唔知隻Game玩乜的，買完先知原來係Monster Hunter Tales 版，即係打任務，但唔可以Online打，只可以Online d/l 啲人落黎比你Add落去請佢去一齊打Mission。
另外你都可以將自己Upload上去佢個網度，比人Download，so 都幾有趣。Tales系列我都打過幾隻，但唔係隻隻都有心機打，呢期都有打番Tales of Destiny，但由於太忙，一星期只係打得兩三個鐘，進度非之慢。我都有upload自己上去，呢個就係上星期的我.. -_-
5. 家香雞晚餐
呢家又開學了，所以夜晚又要起又一城出現搵餐飯，呢期家香雞出咗個晚餐，咪去試下啦。
分別試咗個1號同3號餐，我只可以用三個字黎形容，「好唔得」，重要唔包野飲，要另外加$6，$32食個咁嘅餐，真係「Delay No More」。 (編按：將「Delay No More」讀咩小小，就變成粗口)
6. 理大藝墟 2007
藝墟又到，忙極都要去一陣，code geass大熱，有cosplayer 做齊全套Zero重有個頭盔，真係好正！邪神 Fate/stay light 亦出現攪攪震，最近終於有錢同部相機買番支燈同支鏡，終於可以試下，果然係差好遠。正所謂一分錢一分貨..就係咁解。
自從上年開始忙同埋資金不足，就開始冇攪Cosplay，上年去台灣見到一兩個角色好正都令我有啲想Cos果個角色的沖動，但造衫同諗個道具點整先係最令我頭痛，有人同我講番大陸做咪平囉，但我已經有多年冇番大陸，我上一次番大陸的印像係…一出羅湖就見到一個大地窿(起地鐵)，咁你幻想下我有幾耐冇番上去-_-。
最後，請大家玩完後清理一下啲垃圾………
問唔中起cosplayer forum 見啲人成日都鬧會展實Q話D cosplayer換衫同攪頭長期霸住個廁所，整完又攪到成地垃圾，但只係一咪話人，自己亦唔去改善，呢期 CW23 又開始出現鬧劇，小朋友果然係小朋友，諗野真係好小朋友。
PS：24非常緊張，不過冇乜時間走去集集寫，所以….大家努力。
隨心
回應的RSS
按此回應
暫時未有引用通告
(0)
2007年01月29日
24 Season 6 EP 1-4 6AM-10AM
Unbelievable!
估唔到電視未播(1月16日)，電視同步賣的 DVD 已經比流咗出黎！之前起Online 播果條Trailer都係來自 EP1-4裏面，四粒鐘已經咁精彩！
警告：以下內容有劇透，唔想睇唔好Click入去！
(閱讀全文)
電視
回應的RSS
按此回應
暫時未有引用通告
(0)
2007年01月09日
遺忙了的2006Blog - 閒談
又繼續Blog債時候…
始まりのヒト/バーテンダー
近期發覺，原來我有一年冇講過同音樂有關的Blog，所以都要無無聊講兩句，最近真係汁都Load埋，連Bartender 都有睇，裏面的OP/ED細碟Natural High 的「始まりのヒト/バーテンダー」的確幾好聽(唔好Google 錯網站XD)，日本太多歌星，有時真係識唔晒，另一樣就係太出名果啲呢家欠缺驚喜，有時真係聽多啲/認識其他歌手作品，好過來來去去都係濱XX、宇XXX、BXA、MoXXXXg娘呢啲…
如果你問我「Bartender 好唔好睇？」，我就會問番你轉頭「蟲師好唔好睇？」。
以後會寫多啲好聽的歌Blog。
Suica + Passnet = PASMO
之前去東京，身上起碼要袋住Suica卡同Passnet飛，呢家終於可以改寫了，日本仔果邊終於傾掂數，出張叫PASMO卡，除咗可以搭埋私鐵外，巴士都OK，另外Pasmo 亦會同 Suica 共通，即係事彈一張卡就可以攪掂晒，好在我張Suica重起銀包，3月18日起就可以用得了！想知邊啲車搭得，可以去 PASMO網站睇下，如果你主要都係東京圈同近交的話，都包保OK。
繼陳志雲話抽起唔會再播東華Yumiko甩褲片段但又起自家娛樂新聞台無刪剪翻播外，TVB新聞又起2006大事回顧入面，再次播出三號風球派比安垃圾筒KO女人片段，呢家啲傳媒真係冇面比！
金色的琴弦 (金色のコルダ)
最近同音樂有關的節目都人氣急升，首選的當然係交響情人夢，高收視之餘，呢個月11號更會推出動畫版，男女主角有關智一同川澄綾子，極高Cast。另一套帶起的就係由漫畫同遊戲都有推出的戀愛故事/遊戲金色的琴弦 (金色のコルダ)，不過今次就試下玩隻 PC Game 版本，玩法都幾有趣，但玩玩下都有啲悶。
我一向都唔鍾意玩呢類戀愛 SLG 遊戲，而且重係勁水皮果隻！更可以用「奇差」黎形容。隻Game 一邊又要搵樂譜，又要練習，又要周街比演，又要買Item，當然唔少得最重要的「溝仔」！所以玩完最後係輸晒，一條仔都溝唔到 XD。不過真係幾好笑，當個主角理解能力低的時候，演奏真係好難聽，走音之如，個畫面重有一堆 ^*@&^&*@ ，睇見都忍唔住想笑。另外，3月15日重會推出金色的琴弦2 PS2版本，繼續添食落去！不過Website 重未有介紹隻Game會點玩法，到時先算。
Ys Origin
Falcom 真係好賤，伊蘇出極都有，呢次重玩埋前傳，個主角終於唔再係Adol，不過今次個故事就起晒個「白色巨塔」入面，好似玩緊Persona3 咁XD，不斷每層上。呢集個故事講乜就去呢度睇啦， 無謂講，畫面方面由於都係用番之前Ys6個Engine，畫面係OK靚，不過啲敵人同大佬暫時都算易打，就算你唔夠打，出去升番兩三個Level 就肯定夠打，同普通RPG 打法冇咩分別 XD。由於聖誕「休戰」，呢家只係打到第三個大佬「轉轉機械甩手怪」，暫時要升番一兩個Level 先夠打大佬。另外比一個Tips大家，得閒無野做的時候，可以長期戴住個「敵人隱形面具」周圍打下，你會無意中發現一兩三個隱形寶箱的。
Shopping
聖誕期間收到 U2 寄黎又有 Private Sales，咁咪去望下啦。點之今年真係經濟好咗，有7折至5折的衫係小咗好多，早一兩年係大部份都有7折，呢家係得果三四五件先有，而且自從U2用番 G2000個名黎賣之後，男裝衫係縮咗水，小咗一半有多，越黎越難揀，不過都好彩買咗條褲(折咗$17X)，平過Uniqlo(折咗都要$200起)。我 比較喜歡去Private Sales，一來人小啲，冇好似平時Big Sales咁師奶狂搶貨，另外就係買褲會足碼，我試過Big Sales去買褲，條條都斷碼，最後一條都買唔到，所以Private Sales 有呢樣好，當然折頭就小啲啦，但都好過冇。
另外就係有次去IKEA(我的至愛)，見到呢張新Product檯，咁都要賣$860，IKEA 啲價錢每次都令我有「驚喜」，另外起兒童部見到呢隻「馬」，用黎Cosplay啲Online Game 真係好正，不過我諗唔到有咩角色，一係我自創一個出黎。
KIDNAPPED
上一季動畫真係套套爛到冇朋友，07年頭果啲更屌屌聲，所以開始轉煲劇集，日劇都睇咗交響情人夢、母親14歲同地獄少女，後尾連 Prison Break 成個Season 1 煲晒，呢家煲緊Season 2，岩岩重開始起 AXN 追 KIDNAPPED，呢個月 Prison Break 同 24都會有新季，所以更有排追。
Prison Break 的確幾好睇，我以前都有睇開 CSI，但睇咗四個Season之後，真係悶到頂唔順冇再睇，Survivor 、 Amazing Race 同 The Apprentice都有追過，但又係頂唔順了，原本都有睇過幾集 House Season 1，但後尾又爛咗冇再睇，覺得都係要睇連續劇先有心機追，每集單完故事好在係Miss 咗一集都冇問題，但睇得多，來來去去都係咁頭咁尾，就已經覺得好公式化，就好似 CSI 咁睇極都係咁，開始已經頂唔順，再加上一拆三，整埋 New York 同 Miami，一個遊戲三個玩法，真係頂唔順 X 3 。
不 過係我對外國電視劇的認識真係小中之小，有時都唔知邊套好睇邊套唔好睇，另一樣係香港本地電視台播的外國電視劇真係唔多，有時播極都係果幾套出名，所以 AXN 起香港都幾多觀眾，自從 Sony 起亞洲區開 Animax 之後， AXN 就摺咗動畫呢個Section主力攪好劇集，佢呢家播的電視劇好多都係新播的，好似呢家呢套 KIDNAPPED 就係岩岩 NBC 先播完一季 ，真係快過 TVB/ATV (好似又叉開話題)。
待續…(我已經盡量寫多啲字，廢事又比人話我好似壹仔咁字多過圖)，另外起新一年祝大家斷線/龜速快樂。
隨心
回應的RSS
按此回應
暫時未有引用通告
(0)
2007年01月04日
遺忙了的2006Blog - 廣告
由於聖誕檔期趕Job，新年要出街，所以話之地震斷六親都唔得閒理，呢家岩岩清完一個Job終於可以偷得半日清閒，所以就要清下Blog。
24通消老麥廣告
以前全港都有幾間通消老麥，後來摺到得番三間，呢家係咪因為經濟好咗，多咗人出夜街唔番屋企，又見啲24茶餐廳同幾夜都有咖啡店都有得做，都所以大推廿四老麥。
廿四老麥最難應付就係啲街頭露宿者，佢地入晒黎過夜，風涼水冷，而且重有人地食剩的薯條充 飢，簡直唔休食，又唔洗交租，抵到爆！再加上「老麥精神，唔會趕人」，坐足四十八小時都冇人理你，所以老麥真係好正。不過，老麥啲野食真係貴到嚇死人，我 都係早兩日先知熱香餅早餐冇咗個薯餅-_-(好耐冇食)，有次就試咗個通心粉，真係好唔掂，冇聞冇味，重衰過茶餐廳。不過果日先發現，老麥Menu個架， 以前係打開個框黎換Menu架嘛，呢家轉咗係「轉」出黎，好攪野，真係唔望住佢地「轉」都冇為意。
另一樣更攪笑係老麥廣告個「月亮人」，好似武裝練金入面果個Moon！極為笑爆。
刷紙膠都要賣電視廣告？
鉛子筆賣電視廣告就見唔少，刷紙膠都要賣廣告？呢次重搵埋Purple 姐姐出黎同舊刷紙膠唱歌跳舞，真係有冇錢賺架？睇完都想笑下。
新聞台賣廣告
呢期有線「最前線」廣告賣到街知巷聞，跟住無意中睇亞視佢又整個「企人牆」廣告，真係服咗亞視，不過呢，有線呢個「企在最前線」廣告有幾多個版本呢，唔知我儲唔儲得晒呢？
PS: 「大家姐」上個星期聖誕假期誕下男孩，恭喜。
比華利山廣告
樓盤廣告以前睇開，都係講一堆無關係的廢話，然後突然間就會影住座樓盤再講埋個名出黎，有時好似啲結婚廣告咁，有時就似旅遊廣告，真係睇時都唔知佢賣乜。不 過今次呢個比華利山真係好攪野，搵成十個風水叔叔出黎企起度Hard Sell呢度有「山富人肥」，當然呢度尺價就嚇死你啦，不過岩岩山頂賣地賣得咁好成績，呢個「比華利山」當然唔洗比面，坐地起價。
不過呢，睇完呢個廣告就發現，啲風水叔叔係咁講住呢度會搵大錢發大財，但如果入到去住之後破產咁點先？告個樓盤廣告失實？另外，個廣告唔見早期人氣急升的蘇民峰，唔通佢果「派」風水命理起果度係陰盤？不如搵蘇叔叔入去睇下比啲意見 XD。
補習社廣告
呢家補習社比以前更難經營，現代廣告真係幾年都重係咁 Style，簡體字再加上懶係”In”，我都開始覺得有啲老土…。
以前讀書時代已經有補習，由中三開始補過現代，跟住轉過去英皇，當時候現代我補過數學(W Lee)，英文(曾經過上Ken&Roger)、Geog(Linda Lau)，英皇補過數學、英文同Econ(唔太記得啲名)。以當年(無謂講幾時，咁咪知我幾歲XD)黎計，以我補過的黎計， Geog 的Linda Lau真係算教得好，W Lee 都好，Ken&Roger 當年太過「名師」過頭，反而覺得「吹水」多過頭，後尾所以去咗英皇…。數學都過咗去英皇，揀咗一個唔出名的Tutor，因為佢由 Form 4 由頭教過晒，我啲數學真係好鬼屎架，所以佢由頭教過晒我真係學過晒打好個底，所以最後會考出黎，數學係最高分D7，Account就囉D8，其他..咪 EEEEFFFF咁囉….總之最高分已經係數學 
。
返回正題(又叉開晒:P)，我果時都冇咁多補習學校出黎，呢家多到爆，而且由於出生率下降，中學都已經開始縮班，過多兩三年會考人數會不斷減少，到時更加難 爭。以前風光時代，睇 Video 上堂啲學生都肯制，呢家個個要求高咗，已經話睇 Video 錄播都唔得，所以今時唔同往日，廣告囉卓頭都好緊要。
不過做補習都可以發達架，你睇下Ken就知，連原本起皇仁教開書的Burce都轉去做補習，真係做補習好過做教師，起碼壓力冇起學校咁大。不過當然，果年Tip唔中題目下年就會「大檸樂」。
待續….送你一個廣告 Screen Cap…
隨心
回應的RSS
回應(1)
暫時未有引用通告
(0)
2007年01月04日
| 1
