每週一Blog (其實都有兩週)
CODE GEASS
近期迷上 SUNRISE 新番 CODE GEASS ，除咗係 CLAMP呀，制作組大河內一樓、谷口悟朗、音樂的中川幸太郎都係以前有追開嘅作品Producer，包括以下我喜歡又好好睇嘅：無限のRyvius﹑SCRYED、Rahxephon、Planet ES、GUN X SWORD等等…，不過最令我記得都係頭三套，無限のRyvius劇本係最正，真係玩心理戰，SCRYED最記得係Kazuma同劉鳯大戰(乙HiME都唔知係咪番炒佢)，Rahxephon 就覺得自己係咪睇緊 EVA 咁，不過一講頭兩套就唔可以唔提黑田洋介，不過呢套 CODE GEASS冇佢份XD，但最主要都係呢啲中毒入骨嘅片，都係來自 SUNRISE，好似上套 Zegapain 未比佢毒夠，呢套CODE GEASS 再毒過你，一開波頭兩集就好有魔力，好吸引，如果有時間，我都會每集整番個Blog，但呢家真係冇時間……
地海傳說
同「宮崎」有關的戲，我都會仆去睇，所以今次特登星期四上果日就去睇咗場 2:40PM (日語版)。後尾望番Yahoo Movie 入面啲Comments，講到好差咁，雖然我未睇過原著小說，但都望過wiki 同其他website大約知個原著講乜。
先講下畫功，畫功算不錯，與上套 Studio Ghibli 嘅哈爾移動城堡比的話，叫Keep到囉，不過我覺得呢套的作畫有啲似番上兩套的千與千尋，另外有部份畫面好似似曾相識咁，例如基度坐住隻奴仔跑果度，好似幽靈公主男主角咁，件服裝又似，係個男主角老咗四十歲。另外最尾大戰哥普果幕石磚地凹落去，好鬼似哈爾移動城堡搵 3D 做果幕咁。跑上塔頂果幕又好似睇緊貓之報恩咁，總之好似睇過晒咁。
另外作畫方面，有一幕真係非常老土，我睇到差啲笑出黎(估到-__-)，就係女主角蒂露由龍變番人果幕，我都諗佢會點變架呢，點之玩埋呢啲白痴人先用的分鏡，老土到爆。
音樂呢次搵寺嶋民哉做，真係有啲似久石讓咁，覺得幾好，不錯不失，女主角清唱果段，有網友話廣東話版係變咗做中文，真係要領教下唱成點，日語版手嶌葵唱得很好，我都好滿意。ED首歌亦很好，但估唔到望番Ed Credit 先知新居昭乃 + 保刈久明 作曲，真係估唔到。 (Zegapain OP 就是新居昭乃 +保刈久明)
Comments 不少都話故事悶，拖得長，唔知講乜，條龍做乜鬼等等，我睇又冇呢個情況，究竟係咪廣東話版配完出黎之後表達得差？我諗我會再搵朝睇早場廣東話版了解番個情況，不過的確有一部份內容佢係表達得唔清楚，而有部份係因為來自上兩輯的小說內容(雖然係改篇)，所以故事就冇詳細交代，所以我都諗住買番本小說煲下。
母親14歲
起女王的教室出名的志田未來，今次出演呢套比女王的教室更受爭議，果時睇女王的教室覺得志田幾可愛架(實又比人話我幼齒)，呢家佢起劇裏面覺得老咗添…但講番劇情，呢套母親14歲的確幾好睇，尤其囉黎當教育片咁播比年青人睇都岩，所以我覺得 TVB或者Cable會買黎播，不過一播就有排比外面插。講番志田，原來佢早排同女王的教室另一個男主角松川尚瑠輝(真鍋由介)拍咗套偵探學園 Q 的特別編(飾澤數馬)，而志田就做美南惠。
City W SU
呢個真係一個笑話，早兩日番CityU上堂，見到民主牆貼滿一本 SU 筆記簿封面，寫住找錯處遊戲，原來封面 City U SU 打錯為 City W SU，由於封面用了線條式的藝術字型，所以初頭都不為意是錯字，但後來望真，U字的確小了一橫。樓上就貼了壹周刊唐副校的新聞，雖然已經是舊聞，但有學生在相片中，唐副校身邊的女人的腳上，畫上了 <-- ? --> (大脾有幾粗) ，又係勁爆笑。早期民主牆冇乜睇，呢期真係多番啲娛樂。
街邊凍啲定商場凍啲？
無聊在葵芳吉野家，囉個溫度計測下有幾凍.. 21.3度。咁 25.5 度起邊度？原來係起某 Data Centre …
PS:
銀髮阿基德
尋日望 Aniwave 見到預告介紹銀髮阿基德都覺得可怪，原來11月16日上番正場，想睇番就去睇了。
早前咪話過Cable 娛樂台個乙Hime廣告打錯字，但原來無意中望到佢地改番了。
隨心
回應的RSS
暫時未有引用通告
2006年10月30日
家居網絡保安全廣告雜誌
呢家個個屋企都可以上網，而且速度重越黎越快，由以前的28.8k 數據撥號上網，到呢家已經有 100MBps 寬頻上網，呢家真係好方便。但係唔知大家對網絡嘅保安又知幾多呢，其實呢家你上互聯網，就好似開咗屋企度大門咁，有好多不法的人士會不停咁入侵你屋企，就好似你屋企度鐵閘大門比人爆開咁，你屋企就話可以裝套勁的防盜系統，咁互聯網又點防盜呢？
有好多人屋企都會買啲俗稱 Router 即係路由器嘅硬件，用黎幾部電腦公享上網，就算屋企得一部電腦，好多人都會買Router，由於呢啲寬頻路由器都有一啲基本的防火牆嘅功能，防火牆可以用黎阻隔不法份子入侵屋企的網絡以及電腦，一般呢啲家居路由器嘅價錢幾百蚊左右，所以好多人都會用佢。但係由於呢啲路由器所使用的處理器級數較低，所以如果真係連續受到黑客攻擊及入侵，路由器的速度就會減慢，令到你上網的速度大減，甚至不斷斷線，無法正常上網。現時本港各大 ISP 的網絡都不斷受到黑客及其他受病毒或木馬入侵的電腦進行攻擊，情況非常嚴重，所以網絡的保安不可以缺少。
唔用Router又會比人入侵，用Router又會令到隻Router負荷過重而癱瘓，咁點算好呢？今次我就為大家推介一隻價錢平而又功能強大的防火牆產品，就係呢隻 Sonicwall Pro 100 防火牆。
Sonicwall Pro 100 採用 Toshiba 3927 H2 (133 Mhz) 處理器，內置 16MB 記憶體，支援 PPPOE 及 DHCP 嘅寬頻連線方式，亦內置 DHCP 伺服器，以及 DMZ 連接埠和 One-to-One NAT網絡設定，再加上你可以自行設定不同嘅Rules 同Filter，你重可以購買高階網絡過濾系統以及網絡級防毒及電郵過濾模組，令你家居上網比以前更安全，而且就算受到黑客攻擊亦冇咁容易令到你上網癱瘓，令你可以24小時都可以極速上網，無人阻擋。雖然呢隻產品已經推出5年，但仍然屹立不倒，足以證明呢隻 Pro 100 係可靠嘅產品。
聽落好似好正，你可能會諗呢隻 Pro 100 係咪好大隻架呢？咁又唔係播，雖然佢功能多多，但體積就同一個寬頻電視機頂盒大細差唔多，所以好適合一般細少的家庭用，你呢家用緊果隻Router 可以即刻收埋佢。
咁呢隻野重有咩功能呢？如果你屋企有小朋友，用呢隻 Pro 100 就岩晒，佢裏面有上網的連線的時間設定，你可以設定某一部IP嘅電腦，只可以起某個指定時間上網，咁就可以控制小朋友唔會上網太耐而影響功課，另外重有內容過濾，你可以輸入一啲指定的文字或網址，例如 “Game” 、 “性” 、 “icq.com” 等字眼，當下載的網頁含有呢啲文字，就會即時中止讀取個網頁，你亦可以訂購過濾功能，裏面預設咗一堆以不同組別分類的網站，例如”遊戲”、”賭博”等，更可以有效控制小朋友唔會去到一啲不良網站。
有咁多咁正嘅功能，係咪好想即刻買佢番屋企看門口呢？呢家就係好機會了，今日我介紹得，就當然有正正優惠啦，Sonicwall Pro 100 原價(五年前)賣緊 HK$13,888 ，今日超級特惠價只係賣 $388 ，你冇聽過，全套今日超級特惠價只係賣 $388 ，而且重有獨家優惠，再送你本港免費送貨及一小時基本安裝服務，真係抵過普通爛鬼 Router 架，優惠只得呢一秒，快啲打黎 (853) 2888-1888 (接通按3字)，同我地嘅客戶服務員聯絡。
再講多次，全套 Sonicwall Pro 100呢家超級特惠價只係賣三百八十八蚊！只係得 10套，就算你住起甲級保安嘅私家樓，但未有甲級網絡保安嘅話，呢家只要三百八十八蚊就可以擁有，重唔快啲打黎 (853) 2888-1888 (接通按3字)，同我地嘅客戶服務員訂購呢甲級網絡保安嘅 Sonicwall Pro 100 防火牆！10套好快就賣晒架啦！
(以上內容全屬攪笑，唔好真係打去訂 
)
隨心
回應的RSS
暫時未有引用通告
2006年10月08日
地鐵一日遊
香港站： Bloomberg 接收訊號出問題，請等待……
葵芳站：「瓹」，呢個咩字黎？…….
灣仔站：一入地鐵站，就見到個煙灰缸燒著垃圾….跟住八掛伸個頭入去望下入面，就突然勁噴煙…
優惠站：入惠康影番呢個儲分有 R7.77 期間，見到杯麵「黃牌」減價，減一毫子啊！(老麥餐都可以平一毫子！)真係著數黃牌。
隨心
回應的RSS
暫時未有引用通告
2006年10月07日
老麥奇遇記
某日凌晨2:30AM獨自走進旺角一間廿四老麥
行到櫃枱買餐…發生了以下對話…
我：當然係我 麥：老麥姐姐
我：唔該一個5號餐
麥：(望望後面…)5號餐冇了
我：咁…(望望天花餐牌..)咁6號餐..
麥：(再望望後面..) 5、6、7號餐都賣晒了，不如要板燒餐..
我：(諗咗一陣..) 咁要4號餐…
麥：要星星薯餅？
我：(..?…突然唔識答佢..) 普通薯條得了..
麥：飲乜野？
我：可樂
老麥姐姐禁禁收銀機，之後行去囉薯條同包…我望見收銀機寫住$24.8，再望番上面，明明4號餐係$24.3，唔通深夜加收五毫子？咁我再起銀包囉多五毫子出黎…跟住..
老麥姐姐囉個板燒包出黎放起餐盤，我一見到就話，我係要4號餐播。老麥姐姐拿拿林囉番走個包，然後改收銀機，銀碼顯示 $24.3，我又收回五毫子。
囉完包回來，我同姐姐講話比現金(八達通)儲分，然後我放銀包起八達通機上，收銀機顯示要拍卡，等了十多秒，都未有反應，後來出現”Bee”一聲，老麥姐姐話卡錯誤。
我：吓？
麥：你張卡係咪未啟動？佢話你張卡有問題。
我：唔係呀嘛，未啟動？我儲咗差唔多8蚊架啦。
麥：你試下呢家再拍卡我同你Check下。
(我放回銀包起八達通機，收銀機即時顯示有 $7.77 積分)
我：冇事播。
麥：咁冇法了，唔好意思。
我：咁同我Cancel咗個餐佢我再買過。
麥：唔得架播。
我：咁，有佢啦。(比面色佢睇..)
麥：一係我比番一毫子你啦。
我：唔洗拿。 (比一毫子我，當我係乞衣？乞衣都唔要啦)
（跟住去囉支飲筒然後離開…)
食緊薯條期間，門口黎咗一個紫色衫小肥女人，她起老麥行來行去，她一見老麥姐姐拿住袋大垃圾走入後行位，她馬上跟隨，重想入埋去，咁我心諗就知佢係專食「口水尾」嘅女人，後來佢見到我起度食緊薯條，就企起我面前十幾秒，後來重坐起我格黎張檯，好明顯係等緊我走食薯條。
咁我就特登食晒所有薯條，然後囉埋個盤去垃圾桶倒埋佢，點之一野「線」手，成塊餐盤跌埋落垃圾桶入面 (呆) 。
你估下我之後點做？
- A. 起個垃圾桶入面囉番塊餐盤上黎
- B. 扮唔知，然後離開老麥
- C. 走去同個肥女人講我啲薯條Dum晒入垃圾桶，你自己伸隻手入去囉黎食啦。
隨心
回應的RSS
引用通告(18)
2006年10月06日
呃晒 - 嫦娥奔月
特登走出去西九龍海演長廊影呢個「大型綵燈展覽」嫦娥奔月，點之入到去，真係得一千零一個綵燈 -_- ，搭車去九龍站，再步行入去足足15分鐘….呃晒 -.-
隨心, 攝影
回應的RSS
暫時未有引用通告
2006年10月01日
(0) 
