深圳一日遊(二)
繼續上回的行程，首站就係去「深圳黃金高登」的華強及賽格。
華強電子世界、賽格廣場
非常之易去，只要搭地鐵去到華強站於A出口一出，左手邊就係華強電子世界，裏面「大到冇朋友」頭兩層都係賣電子零件，如果你係想睇電腦野，咁就要上到三樓，或者行去新翼，裏面有 N x Y 咁多檔個體戶及舖頭檔，不過檔檔都係賣果啲野，可能你行多兩三層就已經悶爆。
離開華強，對面就係賽格(小心過馬路)，同樣賽格頭兩層都係賣電子零件，電腦野要上上面，同樣入面賣黎賣去都係果啲野，就好似你去黃金高登賣極都係果啲。咁番大陸睇咩好呢？主要買啲國產野啦，例如國產 Server Case 、國產 WebCam 、國產TV Box 等等、不過通常果啲係香港佬番黎批發咁運落香港，當然你散賣一兩隻都冇問題啦。
上回預告話我買咗樣平到喊的電腦產品，開估了，就係 D-Link DI-504 Router =.=。
香港都有得賣啦，咁有咩咁特別呢？首先香港賣緊果隻款，係右邊圖果隻款，而大陸賣果隻，係黑銀兩色，型爆好多。香港DI-504 大約賣緊 $168，你估下大陸賣幾錢？只係$100人仔！真係抵到爆！囉到番黎用狂試狂Download 都超級Stable冇斷Connection，超值！
不過起大陸買電子產品，要留意大陸插蘇腳係兩腳插，你可以起百佳(大約$8)、實惠(大約$12)買一個轉腳插(通常寫住鬚刨1A轉插)，咁就可以用了，唔一定要去鴨記買個個火牛貴到喊。另外，由於大陸買，隻Router入面的Web設定版面都係簡體字，我唔敢Firm 番個台灣/英文版入去，廢事炒，還掂都係Set一次咁大把，平時又唔係日日望住佢，所以就無謂攪了，炒咗就麻煩。
請留意華強同賽格的開放時間為朝9晚6，唔同香港黃金高登開到夜晚8-9點，所以太夜去就會落閘放狗。
少年宮書城
下一站就係書城，少年宮書城係新開的，樓高兩層，書店起地面呢層，另外重有好多間不同的舖頭及食店，睇到悶就可以去食下野(不過要比錢離開書店先 XD)，另外重有一間細細的24小時書店，不過我諗你唔會真係留起度睇架啦(呢啲留番起台灣誠品先做)。
少年宮書城又係好易去，首先就係搭地鐵去到會展中心站，轉四號線去少年宮站。呢家四號線仍然係單線雙程行車，所以兩個方向的車都係起同一個月台上/落車。去到少年宮站，起D出口一出轉右，就會見到書城中心城的超長大樓。
書城中心城共分為兩翼，左邊(南翼)係賣美術設計的書，另外有間進口書店(番香港買吧)、24小時書店及二手書店(都係番香港買吧)、右邊(北翼)就係賣音樂、戲劇以及書城！書城共有兩層(地面及地庫)，地面主要賣一般類型的書籍、地庫賣電腦書、兒童圖書、醫學等等技術書籍。
老實地講，如果你諗住買普通大陸書，不如番香港買，因為香港的大陸書店(例如綠野仙蹤)都會有特價，平過書城賣正價，就算你入會，平時都只係有95/98折，每個月15號先有88折(未計每兩年$25入會費)。
所以一係黎睇下書(唔介意買一兩本)，一係就買啲香港搵唔到的書，又或者黎睇/買電腦書(尚書房賣電腦書較貴，以及書城較多選擇)。
另外買 Art & Design 書都不錯，因為香港書店不多這類書籍，而且近年大陸印刷美術書都已經有良心，印刷效果已經算係滿意，不再是甩版。
最後我起書城掃咗三本 O'Reilly 的英文影印版原版書(不是中文翻譯)，由最平的58蚊到最貴的100蚊，三本加埋都係二百幾蚊，肯定抵過你買原裝書版本(每本$300)。另外亦買咗一本色書及一本講商品攝影的書，呢本商品攝影的書係韓國書大陸翻譯，裏面介紹多種不同的產品的攝影方法，例如衫、筆、Poster、玩具、鞋、皮包、書、眼鏡、香水、生果、點心、蛋糕等等，重有教你Photoshop修正同基本攝影知識，只係賣 $59.8，真係抵睇到爆。
下午茶：滿記甜品
上次都提過，如果你驚起大陸食野食壞人，咁你一係去番啲大型商場裏面一啲出名的店舖食野，或者一啲港資北上的餐廳。今次我地的下午茶就係滿記甜品。呢間野係完全無意中行行下賽格發現的。價錢同香港好似一樣，不過起碼有信心啲(好過街邊檔)。
另外提大家，你最好買定一支飲品袋起身，因為有時候唔係咁易比你見到七仔便利店，尤其你又唔敢起街邊買大陸品牌飲品的時候，你袋定一支隨時囉黎飲都得。大七仔都唔係起街隨處見到架。
晚市出擊：小肥羊
預告講話帶大家去一間勁易去的小肥羊，呢間就係小肥羊國貿店。笑話又黎了，旺角警處唔起旺角站起太子站；長沙灣廣場唔起長沙灣站起荔枝角站，小肥羊國貿店並唔係起國貿站！小肥羊係起老街站的，所以千其咪落錯車。
起地鐵老街站 C出口，行一大段路…離開地鐵站進入地庫的商場，轉右就可以步出地面。其實對面就已經係小肥羊，不過比巴士站啲廣告遮住咗，所以會勁留意唔到。轉左行上平台，再轉入天橋，天橋右邊就係小肥羊的門口，唔洗五分鐘就到。如果你係想早啲食，6點鐘就好去囉位，否則會勁多人要等好耐。如果唔係就8點去囉位，一般黎講9點前都可以入坐。
入到去就快快落單，如果你係諗住搭地鐵，記住留意尾班車係幾點，你預大約11點番去坐地鐵番羅湖，咁就可以早啲番香港休息。
睇下我地呢單小肥羊幾豐富，三個人食，落樓只係位位$70，真係抵過香港食架。重買咗一堆書同超平 Router，呢次真係滿載而歸。
下期的深圳一天團正在企劃中，會再去其他更正的地方，下次去完再為大家介紹。
下回…
旅遊/觀光
回應的RSS
暫時未有引用通告
2007年03月27日
網上行翻新相簿 snaap! 大測試
網上行以前已經有Net album 服務，不過今次重新包裝，加強功能，變成一個snaap! ™ 品牌，以簡單的界面，一站式服務，多媒界的睇相方式，主攻家庭市場。snaap! 有幾勁？即刻黎做個測試先。(以下內容唔係hard sell 佢架，我真係試完係咁照寫出黎)
(閱讀全文)
日記, 消閒/嗜好
回應的RSS
暫時未有引用通告
2007年03月24日
HKBNTV 續約Plan價錢開估了
HKBN Sales 勤力可加，都唔夠兩個月，又打黎Null我將呢個「試用」達一年有多的bb10努力上約外，再繼續Null我為由04年每個月八蚊睇到呢家$28/一年+$88/半年(共年半約)的HKBNTV再繼續續約，由於HKBN呢家出咗BB25同BB50，所以今次冇再Sell我BB100，Sell BB25/50，但價錢真係冇留心聽，因為根本唔想簽。
要講重點係 HKBNTV ，大家如果有睇報紙，都有留意 HKBNTV 將於四月推新台新服務新台，首先有bbBOX，型式就好似AppleTV，將你電腦裏面的音樂及片段(電影)，於你的電視收看，亦可以經互聯網分享出去。
但由於我呢家係 1) 用舊式第一代電視Decoder 、 2) TV 同 BB10係獨立兩條線入黎兩條線插，所以我都諗我可能係用唔到呢個Services。因為我見佢話只係起呢家原有個Decoder度Upgrade個software就可以…係咪真就要四月正式推出先知了..
另外就係TV台終於不再是大陸共產123456789台同埋聽唔明的內蒙古話台，王老闆始終都要面對現實，內容先係吸引之處，不停將國共帶入香港就不斷共產化。呢次王老闆將國家地理頻道、國家地理野生頻道、A1、AXN、MTV、Nickelodeon(最初HKBNTV是有Nickelodeon，但後來應該係因為成本問題Cut咗)，再加埋呢家已經有的Animax同MGM，再一次黎個「八大精彩頻道」(之前係八大電影頻道)，再一次以吸引的內容推佢的電視。
另外報紙重話佢會加強呢家新聞台的資源想攪好佢，呢個真係聽住先啦，CableTV攪一攪都講緊成百萬，呢家新聞台就已經攪到「錄影假雙主播」同埋「每段新聞不斷剪輯重播」咁，要攪好真係有排改。
收費電視的主要收入，主要有客戶月費，廣告收益及賣片比其他國家(如有自製節目)，HKBNTV 自製節目冇賣出去，咁已經冇收入，客戶月費又賤到爆，廣告我都唔知有幾多，至多都係新戲果啲 Trailer，攪得唔好，除時就變 TVMART咁….黎得快，摺得更快。
終於番回正題，續約Plan幾錢呢？最初王生開盤價係 $168/月 簽24可以睇晒所有台，而今日打黎佢開比我的價係….$68/月 簽24 可以睇到9X個台(算啦)，加送一個「適合十八歲以上人士收看的頻道」 (即係咸濕台-_-)，以及大韓影院(都唔岩)，以我的作風，當然冇興趣，重講明會Cut，繼續等佢開賤Plan，呢個$68未夠賤XD，我唔太記得我的合約係6月定7月完，要check番。
要佢出賤plan，首要任務係囉Cut Form，跟住Fax番去，到你真係Cut Off 要還 Decoder 前一兩日，就會有人主動打黎「回心轉意」，出一啲賤到冇朋友的Offer，我期待這一天的來臨。
隨心
回應的RSS
暫時未有引用通告
2007年03月21日
電影節首場只是惡夢的開始….
我的電影節首場節目惡女花魁終於成功入場，但現在只是惡夢的開始….
HKIFF 今年亂到爆燈大家都可能已經略有所聞，而我地就係正正的受害者=.=
(圖為電影惡女花魁監督蜷川實花(右)、木村佳乃(中)及安藤政信(左)，咁岩今日囉住支Canon 50mm f/1.4, ISO800, f/2.5 1/125，影出黎非常滿意，快靚正)
我和我的朋友共三人都算是貪少便宜，夾埋一齊於2月24日(網上售票當日)一齊訂了20張飛(除番開每張只係$1手續費)，但佢地今年的系統真係有問題到爆，除了收唔到電郵通知外，地址錯咗(錯得好攪野，覺得係佢地Online 個Database 未能同出飛/出信個Database配合，好似人手重新key in 過個地址咁)，三月頭Call番佢地收唔到Confirm Email 後補收番時發現，再出Email叫佢地改番岩。
但點之，到上星期五都重未收到戲飛(第一場係20號)，咁咪打去追，佢地覆話已經寄咗，但跟住到星期一(尋日,19號)都收唔到，後尾再Check 番DB，個地址又係錯，都唔知寄咗去邊，最後攪一餐，佢地唔肯出過晒啲飛，但我地又收唔到飛，佢就出封信比我地，用黎只係今場入場，但要我地去警局報失，連同報失警方封信一齊入場。而其他果18張飛，呢家仍然冇信冇票，又唔知寄咗去邊。HKIFF 更話啲飛分咗兩次寄，兩次都可能係唔同地址….
所以我地仍然要為呢18張飛努力追尋解決方案…收咗我地手續費，但資料又攪錯，飛又唔知寄去邊，又唔肯出過啲飛，又要我地去差館報失，浪費警力，遲下可能重要我地親自上去追番呢18張飛，真係慘過乜。過一過海車錢都唔指$20…(訂飛果位朋友住屯門，要出中環佢個Office 來回都廿幾蚊啦..)
看到這封信後(來自HKIFF網站)，我相信還有不少的受害者都有類似的情況，我亦於其他人的Blog 中見看有些人訂飛寄回來的信封地址係手寫的，所以我相信今年真係亂爆到暈，我星期六去HKIFF時見到Office入面超恐怖，有約有近20人不斷地釘飛同信趕住寄票，亦有一兩個人在等囉遺失的飛，完全係冇停手。而我另一套戲就係只映一場的武士的一分(點解得一場？因為戲院29號有正場…)
HKIFF下年搵我起個System啦，攪到咁嘅屎樣，我有做開 Paydollar 做Integration架(Payment Feed)，一啲都唔難，重易過大陸套云網(Cncard)，嘿嘿！
我上HKIFF攪乜？其實係去囉張Animax通行證，係咪今年又送唔晒有多呢？
電影, 隨心
回應的RSS
引用通告(2)
2007年03月21日
「步步高睇真啲」粗製濫造
最近電視新聞逢星期一至五都加插咗套連續劇「步步高睇真啲」，日日用高科技介紹「步步高」每天走勢，但由於趕住出街，真係好多都粗製濫造，以下係精華重溫：
TVB
呢個真係「超低能」，我都唔明點解要囉支筆圈圈圈，都唔知圈黎有乜用，諗起以前世界杯時代用黎講點入球果啲畫面，跟住重要個記者一路剔，背後人員就搵隻Mouse 框番個剔黎 Delete，之後又要剔到一Pat野咁…真係「勁攪笑」。 (林狗毒又發作)
除咗「圈圈」之外，重可以留意下啲差佬行路，係90度屈腳行，直頭「K」型人。
步步高隻腳好似兩條棍插咗入隻腳度，勁似啲模型咁，警員隻手又係，直頭係模型手。
CableTV
嘩！睇見呢個真係嚇撚死，好似睇緊鬼片「午夜凶警」咁…
呢位警察隻手，就好似一隻動物的腳 (鴨)…..果然係能人所不能….
HKBNTV
步步高個樣Q版化，變咗隻「Pinky高」咁，超得意。
隨心
回應的RSS
暫時未有引用通告
2007年03月20日
[MAD] 2007特首候選人政綱知多啲
無聊之下，搵Edius + Photoshop 整咗條咁嘅片……更無聊的原因係因為尋無無聊地開住個林狗噴飯黎開OT…
隨心
回應的RSS
暫時未有引用通告
2007年03月20日
深圳一日遊(一)
前言：我起碼有六、七年冇番過深圳，我上一次番大陸的時候，最記得就係一出羅湖，就係一個大窿(起地鐵)，但由起完地鐵之後都已經兩年，但都未去過，呢次深圳一日遊係由我發起，我帶隊，我設計路線，但其實最主要目的係為咗打邊爐。原本最初只係話想打邊爐，咁就諗住去小肥羊，但後來話不如番大陸食，起碼平好多，咁所以就有呢個大陸一日遊。Plan呢個行程差唔多用咗一個星期，因為一來我真係有好多年冇去過，同埋都有好多野變咗，所以要睇下有咩玩、有咩食，不斷咁上網睇、搵書、問人等等囉資料，同埋又要睇下小肥羊點去呢，嘿嘿！
過關、換錢
以前番大陸可以洗港紙，呢家人民幣升值晒，攪到洗港紙都有難度，可能你又驚洗人仔都有假(不過呢家$1000港紙都有大量假抄)，所以你可以起羅湖過關前起羅湖站(出閘過關前月台)換定足夠人仔，由於呢家深圳物價指數都好高下，所以換多小小有So，番大陸換人仔重難過乜。
呢家過關大家應該都有智能ID Card，所以過香港海關應該超快，大陸呢家都有指紋過關，你可以先起中旅社做定手續先，或者起羅湖大陸過關度即時攪手續都得。大家一過咗羅湖橋之後，馬上落下一層過關，因為一過完關，就已經係地底隊道(圖)，再落一層就係深圳地鐵，超方便。
深圳地鐵
好似我呢啲怕坐巴士，都唔知自己去到邊又唔識落車的話，地鐵係最好的交通工具，深圳地鐵平到笑，坐一個站都只係兩蚊，坐長啲都係三蚊或者四蚊，重有廣東話廣播同埋閃燈路線路，唔怕唔識落車。
不過最麻煩係買飛，如果你岩岩換完人仔囉住一堆一百蚊紙的話，對唔住，你先要打散做幾蚊幾蚊的散紙先可以去買”Coin”搭車。另外就係售”Coin”機只係得幾部，所以買飛都要排長隊，尤其起羅湖同老街站(東門)，都幾煩。
如果你肯”投資”，你可以去買張”深圳通”卡(即香港的八達通卡)，一來唔洗排隊，二來搭車都有啲Discount，另外話張深圳通重可以搭巴士，但出張卡要比四十蚊按金，退卡要去指定地方退，另外早排又話有新聞講遲啲八達通都可以起深圳當深圳通咁用，所以買唔買你自己決定了。
深圳地鐵車箱比香港地鐵九鐵窄，同輕鐵差唔多，所以人多都會好迫，現時深圳地鐵只係有一號同四號線通車，一般大家都只會坐一號線，除非你想去新開的書城(少年宮站)，先會坐四號線，另外四號線呢家只係單線雙程行車，所以等車就要等下。
如果你未搭過，而又冇諗住買深圳通，咁要講下點買”Coin”，如果你係一班人，只需要派一個人去買Coin，可以一次過買多過一個Coin，一次入張$10銀紙，咁就方便好多，當你買完飛後，起抄錢時會同時間跌埋個綠色的Coin，果個Coin 就係用黎入閘用。
呢個Coin用高科技RFID製造，入閘時將個Coin拍起個入閘機個接收器度(好似八達通咁)，就可以入閘，而出閘時就將個Coin入落個出閘機個”窿”度，就可以出閘了。記住千其唔好跌咗個Coin，唔見咗要罰$15蚊架。
最後要提的就係深圳地鐵夜晚11點每邊開最後一班車，所以去食夜飯時記住起地鐵站Check下最後一班車番羅湖係幾點，否則就要坐的士番羅湖，再夜就真係要去搵皇崗24通關。
女人商場
老實講，行呢啲購物商場就真係唔岩我地幾個「麻甩老」，不過當然如果你拖男帶女上去，就要知下有咩商場同其他野行行。
國貿站：金光華廣場 (地鐵 A 出口已經是金光華地庫B2層) <--懶係高級商場咁
老街站：東門 (地鐵A出口直達) <--岩晒候生仔
大劇院站：萬象城 (地鐵C3出口) <--首推，多野食及玩(不過今次時間所限去唔成，下次去番)
科學館站：中信城市廣場[吉之島](地鐵D出口到達地面向前行一個街口）<--麻麻
購物商場站：CoCo Park (吉之島於07年4月開幕) ，但仍然比較爛，同埋太多香港舖頭，不值得去。
點解要知啲女人商場位罝呢，因為你搵野食，去女人商場一定有，起碼衛生啲，不過就唔好太大驚喜，因為可能去到發現有啲舖頭香港都有，例如味千拉麵、海皇粥店等，番大陸食真係有啲低能，更加你覺得已經番咗香港咁。
我的午餐：鼎泰豐
點解揀鼎泰豐？因為我起台灣八日都冇食過，所以番大陸咪借機試下，都好過食Pizza Hut或者味千拉麵呱。由於呢間鼎泰豐係囉專利開，價錢係貴的，不過用料都幾好，我地三個人食埋都要除番開每人六十幾蚊，都算貴架，推介係小龍包，有機會可以試下架。
地址：國貿站金光華廣場 B2 層，即地鐵一出果層，一出行到最尾轉右
金肉其外，敗絮其中
睇落深圳新開啲商場真係好高級，個格局又靚爆咁，但可能，當你一走去個廁所，就發現係另一個景況……..
下回預告：
- 講番男人聖地「深圳黃金高登」的華強、賽格，我估唔到起華強買咗樣平到喊的電腦產品，香港都買唔到呢隻款色，用落超抵超Stable，真係估都估唔到咁驚人。
- 新開的少年宮書城超大，睇到餓重有大把餐廳慢慢食，掃咗二百幾蚊英文影印版O'Reilly電腦書，超抵，買番原書每本閒閒地三百幾蚊港紙。
- 去最方便的小肥羊，唔洗坐的士，只要搭地鐵一出就係，重有地圖教埋你去。
下回…
旅遊/觀光
回應的RSS
暫時未有引用通告
2007年03月19日
(0) 
