深圳一日遊(三)
呢次深圳一日遊主要補完上之冇去的地方，同埋去玩玩食飯。
萬象城
上次冇去到萬象城，所以今次點都要去番，只要搭地鐵去到大劇院站落車，向 C 出口方向行，經過一大段地底隊道，就會到達，可能你一路行就覺得好鬼似又一城。
好似我地幾個男丁，去又一城有咩做？一個字，「冇」，所以去萬象城，最岩睇的，就係去超市。萬象城入面有間 ole 超市(起B1層最尾)，雖然唔算大，但都幾多野買，如果你未食早餐，入去買野食，你都會有驚喜。如果你想食麵包，就要去試下 BreadTalk嗱 (B1層中間)，真係好味的。
B1層有好多不同的餐廳，肚餓就要去試下，而樓上主要都係舖頭，不過可能價錢重貴過香港買(正貨)，所以如果香港有的話(例如名牌衫/鞋)，番香港買吧。我地亦研究過入面間 ESPRIT Salon，價錢亦同香港差不多，但對呢家人仔升緊，番香港剪可能重抵，所以呢家番大陸買正牌野真係要睇住價錢。
萬象城似又一城除咗個格局似外，同樣就係有一個Roller 場，個Roller 場大過又一城果個，但價錢都唔係平，所以又係睇錢做人了，我唔識踩冰，都唔太清楚，不過呢，起大陸受傷始終冇咁好啦，尤其入院，可能除時變植物人架，所以真係要小心為上。
午餐：墨西哥餐廳塔可鐘 [劣評]
呢間野起萬象城 B1層 ，一由地鐵站行過黎就已經見到，墨西哥風味餐廳，佢地全日都係果個Menu，所以你Lunch或夜晚去食都係咁的價錢。
不過呢，個Menu裏面的食物款色就真係唔多，每款食物的份量亦比較細，價錢我個人覺得係貴，味道方便都算唔錯，但總活黎講，覺得比上次去食「鼎泰豐」差的，食完真係有啲不滿，差啲比我啲團友屌到媽媽聲，完全係劣評。
插曲：食完飯比錢都講價？
我地起塔可鐘食完Lunch吹緊水的時候，見到對面檯兩個大陸佬埋單，個女侍應囉張單話佢知幾銀，但個大陸佬囉小咗錢出黎，然後同個侍應講價話收平啲，跟住個女侍應即刻「變臉」，黑晒口面，再啤住條友，啤咗廿秒，條友最後先再囉埋條尾數出黎埋單，真係大陸佬就係大陸佬，冇錢就咪黎高級餐廳食野啦，真係吹啤。不過大家留意，起大陸餐廳食飯，唔興比 Tips 的，佢找錢比你，記住囉晒走。
生意探路：福民文具玩具批發市場
點解會咁攪笑去睇文具？如果你想搬一堆平文具番屋企/公司/區會用 (膠File、筆、計數機等等)，又唔介意用大陸野，呢度就係好地方。
批發市場唔係太難去，只要搭地鐵去褔民站，經出口轉去福民路一直行就到。裏面都算幾大，樓下主力賣文具，樓上主要做玩具同其他野，先講樓下，裏面真係好鬼多舖頭賣同一樣野，但個場都覺得幾靜，佢地點搵錢架呢？真係幾想知。佢有啲文具係日文牌子，不過有啲係國產牌子，重係咩「國內十大名牌」，敢唔敢用就真係嘿嘿嘿。
二樓都有一啲幾大的舖頭，有間專係賣絲帶，裏面款色多到爆，另外又有啲賣模型，雖然係「假」(翻版)，不過有啲都幾靚，但我唔保證過關捉到會唔會罰錢架 XD
體育活動：球王保齡中心
除咗買野、睇書、行街、食野，不如加設體育活動，之前提過萬象城有 Roller 場，不過又有啲難學，咁所以就介紹下大家去玩保齡。
呢間球王保齡唔係好大，有24條道AMF，覺有啲但價錢都算幾平，貴時段都係15蚊局，加$5 租鞋錢，玩一局都係$20，我地五條友有三條友從未look過鈴，兩個好耐都冇look，傻下傻下咁玩，一局都玩到一粒鐘。我地去果日港紙人仔都收，重係1對1，比港紙重抵過比人仔。
下面張相左邊果個就係我了，我係咪look得好水皮呢，最後估唔到我60分都唔到，輸到喊晒口。
呢間球王保齡都幾遠下，起華強站出閘，向華向北路方面行幾條街，經過茂業百貨，轉入去食街(華強路口巴士站)，見到北海漁村就坐對面馬路(小心車輛)，行入去就會見到。如果你地行完華強賽格六點收工，就可以行去玩番一兩局，肚餓就可以行番出食街開飯局。
高級晚餐：廚房製造
Lunch 果餐比人媽叉到暈，所以為咗補償大家的不滿，所以就去一間高級餐廳廚房製造。呢間野係中西日Fusion，你起門口已經覺得非常之高級，入到去更加高級，跟住你就會好驚個銀包好快清袋。佢地以開放式廚房設計，氣派超高級，Menu都有幾本，每本都有唔同野，一本中餐、日本野、西餐、酒等等…
我地五個人，選擇咗兩個西式 Set Menu，包括前菜、湯、主菜、甜品，Share 食的話，五條友就可以食五個款的主菜，所以都幾豐富，大家估下幾錢 
法式麵包/鮮果沙拉/凱撒抄拉/波菜野菌湯
焗紐西蘭青口/法式焗蝸牛
極佳級牛排骨/檸香黑椒龍利柳/法式烤羊朳/德國豬手/酥炸鵝肝醬/海鮮雜扒 (主菜配飯/意份)
提拉米酥/香橙蛋糕/酥炸黃金朱古力/法式溫蘋果派/冰奶油杏仁凍
大家估下食呢個餐，五條友，連埋茶錢加一，再加埋呢度的派局，合共埋單幾錢？
就係… $640人民幣！除番開每人只係$128人仔，真係超級抵到爆。呢間野可以比港紙，大約對1:1.04，所以比人仔會抵好多。
地址：地鐵國貿站金光華廣場7樓2-3室(坐觀光電梯)
歡迎各位報料正野！
我地會再攪深圳地鐵團，如果你地有啲深圳吃樂玩樂推介，不坊留個舖頭名同地址(大約邊個站落車同邊個方向)比我地，我地睇落又正的話，下次就親自去玩下番黎介紹比大家一齊分享！
旅遊/觀光
回應的RSS
暫時未有引用通告
2007年04月30日
回應…
平時我都唔會咁開個Topic講comment reply，不過為咗證明係我寫…所以開個 Topic 講。岩岩忙完番黎，望下個blog，就發現 Willy 的回應。
我睇極都唔明講乜，尤其「傳媒人」，我諗咗好耐，跟住就試下望番 log 睇下啦，就發現咗黎自佢個blog 某一個 Topic ，終於真相大白。原來有人扮我起 Willy個blog post 咗呢段野，重留埋個網址，呢家明白發生乜事了。
「本人僅止聲明，呢個comments 唔係我寫的。」
老實講，我唔會起人地d blog 踩場留自己個網址的，不過真係多謝 Willy 你睇我的blog，小弟的blog 都只係將平時生活無聊野寫出黎。我之前亦有睇過你個blog，blog就係一樣有趣的野，有時候唔覺意就會 click 到入黎….
不過講起「傳媒人」，我以前(96年)，曾經起香港某份「食得」的報章有個專欄，主要都係寫Internet News (其實係呃稿費)，後來有一啲原因離開咗，之後亦曾經在某雜誌、某網站都寫過稿繼續呃稿費，當年寫Internet的野，都算係吃香(試想下你起邊年上網？)，所以稿費真係好吸引 (曾經試過寫四份稿[一星期一份]，可以達五位數字)，不過後來科網爆破，稿費急跌…跌…跌到原本以「蚊」做單位跌到去「仙」做單位，另外計算方法亦由以前「字」做單位到呢家「頁」做單位，就算你多字小字，多圖小圖，都已經係不值錢了，最後我亦離開寫稿佬生活….
所以如果有留心，有時候我寫果啲野，其實都有一啲雜誌文筆的影子(除咗廣東話啦)，我真係寫稿都會盡量寫番書面語唔寫咁多白話。
如果你有睇開「老母」廣場，裏面將 D blog 變為一個專欄，吹下水，發下up風，重慘過睇報章文采版，可能睇到你屌屌聲，但其實我以前都係呢類人。
跟住講下 M 的Comments：
講下火原先，首先我之前係唔識有呢套「金色的琴弦」，係自從睇咗動畫之後，先知有呢套野，跟住就覺得火原好可愛 ，所以game 就想溝佢了 (信不信由你 XD) ，但土埔我都覺得幾型架 XD。
跟住講下啲字，blog 啲圖張張我都係搵Photoshop 整過晒再加Credit架，所以寫一個blog 我都用好多時間去處理啲圖，尤其多圖或者係專題介紹，近期我做埋地圖，都係我親手畫的(不過有啲當然係跟住個稿重新畫啦:P)
我覺得金琴2都唔係太難玩，不過要玩爆咁多個結局同 100% CG 就要花啲心機(對我黎講係冇可能 )，但我已經達到目的，就係成功溝到火原同土埔(兩個都爆燈)。
我覺得買琴譜要睇住時候黎買，一來要睇住自己個Level，自己Level練番果個Level 的琴譜會升得最快，練低過自己Level的琴譜，升的數值會不斷減少，另外亦要留意你啲「好朋友」練琴譜，有時候你啲「好朋友」已經練晒你手上啲琴譜就會得閒冇野做，浪費晒啲時間，所以要成日monitor 住佢地。尤其到最尾，我玩到的情況係我想佢地出場的朋友，唔夠Level 去練啲歌，攪到要去買番啲舊樂譜同埋不斷用道具再私下練習，幫佢谷番夠Level出場。
由於金琴2啲時間有限，所以呢要去多啲莉莉度買道具，盡量谷快啲，唔好浪費每一個練習，同埋我suggest 集體練習最好係起每日放學第一次練習機會去練，因為有時候佢地咪會鬧交，如果第一次練習就鬧交，第二同第三次練習就可以即刻搵佢地私下練，咁就可以即日和解，越快和解就唔會因為第二日的事hold住你。
爆到某個角色的話，Ending Credit 首歌就會由佢唱，不過我諗遲下OST 實有Full Version 版本，可以忍下手。
我 Cap 咗幾張爆機圖起全文，未爆機又唔想睇就唔好click入去啦。有人問我點解PS2 d圖唔係直接起電腦 Capture，因為呢，我係起公司偷懶打 PS2 的，所以只可以對住個電視影。有傳聞我公司遲下會買部Wii番黎聯誼，到時可能全公司都會日日停晒工 :O 。
(閱讀全文)
隨心
回應的RSS
暫時未有引用通告
2007年04月30日
小休一星期
由於趕工起貨中(搵真銀)，本blog 小休一星期…下星期五回來：
下周預告：
- 吃樂玩樂：深圳一日團第二激
- 電視劇：24 第六季越睇越爛
- 專題：反吸煙條例產生的問題
- 吹水：屑紙機
隨心
回應的RSS
暫時未有引用通告
2007年04月20日
「明智理財」有幾明智？
我之前起匯豐有一個儲蓄戶口、一個「萬用戶口」、一個普通證券戶口。
儲蓄戶口一向都係 $0 ，平時D 錢都放起「萬用戶口」，個戶口開咗都差唔多有十年，以前開黎因為貪佢有 VISA 用，方便網上買野同埋出街比錢，但後來匯豐停咗 VISA 功能，另外重要收月費 ($3000以上要收 $15/月，$3000以下收$35/月)，不過一直用開，個A/C Number 又好記，所以都冇理。
岩岩呢個月匯豐好多「運籌理財」客戶都收到通知戶口的最低總值由一萬蚊升至二十萬，嚇死大家，而將一萬蚊呢個門檻就出番隻叫「明智理財」戶口，咁我一直儲落啲股票加埋都過一萬，咁就諗不如將我手上啲戶口轉晒去「明智理財」啦。
計過條數，我平時一年的銀行手續費支出有萬用戶口月費 $15/月 x 12 = $180，再加埋倉租 $150/半年 x 2 = $300，總共 = $480/年。但如果我轉去「明智理財」的話，我每個月已經唔洗比手續費(過一萬)，倉租平咗每半年只係一百蚊，咁即係一年只係$200，另外包埋我一直都想開的外幣戶口以及上年比東亞凍結咗的支票戶口，果然轉去「明智理財」係「明智」。
「明智」同「運籌」最大分別只係有Special Queue 排櫃位，對我黎講冇乜用，我主要都係起櫃員機禁錢多，入錢我呢家都只會寫Form叫速遞攪，至多都係間唔中去排下支票機，而且呢家「運籌」要廿萬，等我買多幾期六合彩中咗先講。
最後，我起匯豐理財中心，攪咗一個鐘去開新戶口、CUT 萬用戶口、轉倉、轉錢、信用卡加新A/C等等，之後重要攪番啲保險/基金 Autopay、去OK開番PPS戶口、囉張卡去櫃員機改密碼，打電話去電話理財改密碼等，勁麻煩，所以先一直懶得去攪個萬用戶口。
隨心
回應的RSS
暫時未有引用通告
2007年04月13日
排隊 「Cheap 精」
呢兩日親身經歷排隊 「Cheap 精」
1. 尋日起地鐵站排隊禁錢，一條龍排兩部櫃員機，當時排到下個到我，我後面亦都有人排緊。
咁最尾(出口)部櫃員機果條友禁完錢走，我正走向前之制，突然間有個「賤」女人殺出黎，囉定張提款卡，起出口行入去即”隊”張提款卡入櫃員機，我啤住佢，佢就扮乜都睇唔到，跟住禁完錢就即閃走埋。
2. 今日同樣起地鐵站禁錢，條隊係 L 字型，我行去隊尾，前面有兩個呀叔推住架車仔(放滿回收Toner)起度傾”繼”，我起度諗呢兩條友係咪禁錢，跟住有個女人走埋黎又係想禁錢，佢企咗起我後面。 (因為係 L 隊型，我望唔到禁緊錢條友禁完錢未，咁我就間唔中”裝”下佢禁完未。)
咁我見到條友禁完，跟住前面兩個呀叔又唔行，咁我咪唔理佢，走去前面啦，點之排我後面個女人沖上前走上去(重快過我)，同一時間，又有另一個「賤」女人起隊尾走入黎，即時隊張卡入去，變相我又要排過。
經歷呢兩個「Cheap 精」，諗起有日起元朗搭68X巴士出黎…
68X 平時好多人排隊出旺角，尤其放工時間，咁果日我排大約10個度…
期間隊中有個男人走咗出黎，行去隊頭個路牌度，我以為佢起度望下路線圖啦..
望望下，巴士到，停埋站，一開門，個男人就即沖上車…霸位坐… Cheap 到爆！
嬲嬲地下次又見呢啲「Cheap 精」真係影佢相唔打格放出Forum，跟住蘋果可能無聊地Quote 咗出黎重貼埋個「Cheap 精」張相，等全港市民認住呢個 「Cheap 精」都好。
隨心
回應的RSS
暫時未有引用通告
2007年04月12日
可愛教主無處不在
當睇完林海峰踎低噴飯後，真係出一出旺角都會見到幾個「可愛教主」，鑊鑊見到都要忍住笑咁行過…..最記得有一次……
有一個星期六由元朗搭車出旺角，落車後路經豐澤門口，見到有一班大陸人企起度，有男有女，有啲似係旅行團起度等其他人起入面買野咁，之後見到其中兩個一男一女的候生仔(大約廿歲)，個女仔話要影相，個男的囉部相機出黎，女的就背住豐澤正門，擺出「可愛教主」的 V 字手勢，我岩岩起佢地面前經過，即時想笑出黎 
，真係要 Dup低頭笑晒口咁經過。
上星期去睇濱崎步演唱會，入場前觀眾都要Check袋查相機，演唱會期間重有實Q睇場，一見到有觀眾影相，就即刻搵電筒照住條友「人贓並獲」，捉條友出去。完場後，場內觀眾啲相機突然全部爆晒出黎，啲女仔不斷咁背住個舞台影相，突然間眼前左右方都出現多個「可愛教主」起度影相，「可愛教主」無處不在。
你又見過幾多個「可愛教主」？包唔包括以下呢個？ XD
隨心
回應的RSS
暫時未有引用通告
2007年04月11日
硬幣條例
今日睇蘋果，提及「硬幣條例」，講話小過1蚊的硬幣唔可以比多過$2的金額以及$1或以上的硬幣唔可以比多過$100的金額。相信大家都儲儲埋埋一堆找錢找番黎嘅毫子，我都有一堆「神沙」儲埋。搭巴士Van仔又話唔得，咁重有咩用呢？
根據本港《硬幣條例》規定，市民可以拒絕接受以少於1元的硬幣，支付超逾2元款額，或以1元或大於1元的硬幣，支付超逾100元的款額。不過，商戶是否接受硬幣作為支付某項商品或服務費用，為商業決定。
Quote from 蘋果日報 07年4月10日服務版
※條例只係講商戶是否有權接受，並唔係代表係犯法。
根據法例的話，以前買麥當勞軟雪糕未加價的時候($2)都重可以比 20個一毫子/10個二毫子，但呢家麥當勞軟雪糕已經係$2.5，雖然你比25個一毫子我覺得老麥姐姐都唔會唔收你的，但「面左左」啲囉，比5個五毫子反而冇咩問題。
搭電車($2)及搭過海船($2.2)，比20個一毫子都應該會比人屌爆，入五毫子都反而冇咩問題，真係一兩毫好難用到，就算平時去七仔買野比錢都用唔到幾多個，儲儲埋埋一大堆一毫兩毫子「神沙」點用好呢，有咩方法係可以「硬食」對方「冇還拖」呢？
我呢家的洗法係….(當然係得閒冇野做的時候..)
一、二毫：去郵票機買 $1.4 郵票….(入到傻咗先買到一個…-_-)
五毫：番工放工用黎買地鐵飛….
(機器收錢，佢點都要「硬食」，除非郵局地鐵改個程式令到多過指定數目的銀仔就自動拒絕，否則我仍然可以用呢個方法洗緊啲一毫兩毫，問題只係企起部機面前不停入錢傻傻地咁囉。)
隨心
回應的RSS
引用通告(1)
2007年04月10日
(0) 
